Read Samburu Marko 8 Bible Online

Marko 8 - Samburu bible

Marko 8

¹Kore tee nenia perot, netii aitoki apa lturrur kitok oyewuo aiturrurro. Kore tankaraki nemeata ninche ntoki nanya, neipot ꞉Yeso looiteng'eni lenyena nejoki,

²<<Kaata lng'er too kulo tung'ana, amu ketowuana tenebo o nanu too mperot uni nemeitoki eata nanya.

³Naa kore tanapalaa ninche mechomo nkang'ite eata sumach, naa keidim neiterriaa to nkoitiei, netii looing'uaa nelakua.>>

⁴Neng'amaa ꞉looiteng'eni lenyena, aajoki, <<Taaji sa etum ltung'ani ndaa naitiemu kulo tung'ana tele kees?>>

⁵Neipar ꞉Yeso ninche ajoki, <<Aja mukateni niatata?>> Newoliki aajoki, <<Sapa.>>

⁶Neitanap ꞉Yeso ilo turrur metowuana to nkop. Nerrapu nenia mukateni sapa. Kore payie eidip aichoo Nkai nache, negil neicho looiteng'eni lenyena metooriki ltung'ana, neas ninche nejia.

⁷Neata aitoki lkuni sinkirri kunini. Kore payie emayian ninche, neicho looiteng'eni lenyena metooriki ltung'ana.

⁸Nenya ltung'ana ndaa neimu. Nerrapuni nkikapuni sapa naabore ng'urrot naatelekuaki.

⁹Naa kebaya apa lolo lewa[18] matejo nkalupuni ong'uan oaatama inia ndaa. Kore tesiedi inia, neicho ꞉Yeso ninche mechomo.

¹⁰Nedir ninye nabokata meli o looiteng'eni lenyena, nebaki mbata e Dalmanuta.

¹¹Nepuonu Lparisayo neng'asu aaichankarrare Yeso, eipar nkitodolunoto naing'uaa chumata aatem.

¹²Neitodoyio ltau, nejo, <<Aanyo pee eyiaya ltung'ana le ana pukunoto nkitodolunoto e nking'asia? Kedede kajoki ntae meatae hoo nkitodolunoto naichori ltung'ana le ana pukunoto.>>

¹³Neing'uaa ninche, neitoki ajing meli, nelang ildo kokun le mpaso.

¹⁴Nerikino ꞉looiteng'eni lenyena eitu eyau mukateni, naaku meata mukateni mara ake nabo naata te meli.

¹⁵Neitaarriyian ꞉Yeso ninche ajoki, <<Entodol, nirritata ate, te nkini mukate naisiicho ee Lparisayo o ne Erode![19]>>

¹⁶Neipara ninche maate ejo, <<Tankaraki sa nimikiata mukateni peejo nejia?>>

¹⁷Kore tankaraki nayielo Yeso mparrunot enche neipar ajoki, <<Aanyo payie iroro maate tankaraki nimiatata mukateni? Ewuon ake mining'ung'u nimiatata ng'eno? Kegol ltauja linchi?

¹⁸Iatata ntae nkonyek nimidolichocho, niatata nkiyiaa nimining'ichocho? Amaa, miparrurru apa payie agilaki lolo tung'ana nkalupuni imiet nenia mukateni imiet, aja apa nkikapuni naabore mbelesat nitarraputua?>> Nejoki, <<Tomon o oare.>>

²⁰<<Oo payie agilaki lolo tung'ana nkalupuni ong'uan, nenia mukateni sapa, aja nkikapuni naabore mbelesat nitarraputua?>> Nejoki, <<Sapa.>>

²¹Nejoki ninche, <<Naaku ewuon ake mining'ung'u?>>

²²Nebaki ninche Betesaida, neyakini Yeso ltung'ani modooni, neomoni meiseyie ninye.

²³Neibung ꞉Yeso ilo tung'ani modooni nkaina, neipung'ie arik aitalam nenia ang'ite. Nenataki nkamlak nkonyek enyena, neiteleki nkaik, neipar ajoki, <<Keitoki idol?>>

²⁴Nebol nkonyek aing'oricho, nejo, <<Kadol ltung'ana etuwuana lkeek oopuoito.>>

²⁵Neigil aitoki Yeso aiteleki nkaik enyena nkonyek e ilo tung'ani. Nebol ꞉ninye nkonyek akurru, neichiu, nedol ntoki pooki aitibiraki.

²⁶Nereu ꞉Yeso ninye nkang, nejoki, <<Mijing abaki naaduo ang'ite.>>

²⁷Neing'uaa Yeso o looiteng'eni lenyena inie alo nkulie ang'ite naanyikita lkerenket le Kaisaria Pilipi. Naa kore epuoito ninche to nkoitiei, neiparichiere ajoki, <<Ng'ae ejo ltung'ana kara nanu?>>

²⁸Newoliki aajoki, <<Keti loojo Yoana Laipatisani, nejo lkulie Elija, nejo aitoki lkulie lobo loo lolo oibonok le apa le Nkai.>>

²⁹Neipar ninche ajoki, <<Oo ntae, ijoijo ng'ae ara nanu?>> Newoliki ꞉Petero ajoki, <<Ira iyie Mesia.[20]>>

³⁰Neitaarriyian ninche pee meliki hoo ltung'ani lolo omon oipirita ninye.

³¹Neng'asu aiteng'en ninche ajoki <<Kore Nkerai e Ltung'ani, meata ajo metum sina kitok, neany ꞉lpayiani kutuaa o laitainok kutuaa la lasar[21] o laiteng'enak loo nkitanapat, neri metua, kake kore tesiedi mperot uni naa keitipiuni.>>

³²Kore ana bae naa keiroro ninye eibalunyie, kake neya ꞉Petero ninye aitalam lkulie, neng'asu akusakan.

³³Kore pee emerregelakino ꞉Yeso aing'or looiteng'eni lenyena, nekusakan Petero ejoki, <<Chomo tesiedi nanu Chitani! Amu mara mbaa e Nkai iparraa, kake mbaa e ltung'ani.>>

³⁴Neipot ilo turrur o looiteng'eni lenyena meotu netii, nejoki, <<Tenetii ltung'ani oyieu naairukurukore, nchoo emiki koon, nenap lmusalaba lenye naairukurukore.

³⁵Amu kore loyieu neitejeu nkichui enye, neiminie, naa kore loiminie nkichui[22] enye tankaraki nanu o tankaraki Lomon Supati, naa keitejeu.

³⁶Amu kaa dupoto etum ltung'ani, tenotum nkop pooki neiminie nkichui enye?

³⁷Anaa nyo eidim ltung'ani aitapaachie nkurruk enye?

³⁸Amu kore ilo odol anyit tankaraki nanu o rereii lainien, too kulo tung'ana le mpukunoto torno o ne loloito, naa kedol abaki ꞉Nkerai e Ltung'ani anyit te ninye, tenelotu to wong'an e nkitoo enye o ne Papa tenebo o lmalaikani sinyat.>>