Read Samburu Marko 9 Bible Online

Marko 9 - Samburu bible

Marko 9

¹Nejoki ninche, <<Kedede kajoki ntae, kore atua kulo tung'ana ooitachoo tene, ketii ltung'ana lemedol lkiye ewuon eitu edol nkitoria e Nkai eyewuo to ngolon.>>

²Kore pee eich mperot ile, neya ꞉Yeso Petero o Yakobo o Yoana, nerik nkeper e ldonyuo oodo aa ninche aapeny. Neibelekenya mpukunoto enye tekue ninche.

³Kore nankan enyena, neiborru aitintilu oleng, metaa meatae hoo ltung'ani to nkop oidim aiborrie metutuwuo nejia.

⁴Neipung'oki ninche ꞉Elija tenebo o Musa, neirorie Yeso.

⁵Nejoki ꞉Petero Yeso, <<Laiteng'enani, keisupat taa kitii ene. Maitibira nkorrimpani uni, nabo ino, o ne Musa o ne Elija!>>

⁶Meyielo ninye nejo, amu keiputukunyuto ninche oleng.

⁷Neimulaa ninche ꞉nkidis, nening'oi ltoilo sapuk taatua inia kidis, ejo, <<Nkerai ai ana nacham, entining ninye!>>

⁸Kore pee ewuap nkuechi aaing'oricho, nejo Musa o Elija mis, naaku merekure eatae inia kata likae tung'ani odolita etii tenebo o ninche, mara Yeso ake apeny.

⁹Naa kore edouta te ilo donyuo, neitanap ꞉Yeso ninche pee meliki hoo ltung'ani inia natoduaa ana metipiu Nkerai e Ltung'ani too lootuata.

¹⁰Negirakino ninche inia bae, eiparakino inia naipirita mpiunoto too lootuata.

¹¹Neipar Yeso aajoki, <<Aanyo pee ejo laiteng'enak loo nkitanapat meata ajo melotu Elija ang'as tekue?>>

¹²Newoliki ninche ajoki, <<Kedede taa Elija ong'as alotu tekue, neitibir ntokitin pooki metusupata aitoki. Kake kore etiu nejia, aji eiko pee eigero ajo, ketum Nkerai e Ltung'ani sina kitok nemenari ninye?

¹³Kake kajoki ntae keyewuo abaki Elija, neitaas ꞉ninche ninye inia nayieu pooki, ana naigeroki too lkigerot oipirita ninye.>>

¹⁴Kore pee ebau Yeso o laaduo ooiteng'eni okuni netii lolo kulie ooiteng'eni lenyena, netum lturrur kitok eiturrurrokino lolo kulikae ooiteng'eni lenyena neichankarrarre ꞉lbata laa laiteng'enak loo nkitanapat.

¹⁵Kore ake pee edol ꞉ilo turrur pooki Yeso, neing'asia, nekuet airoroki ninye.

¹⁶Neipar ꞉ninye ninche ajoki, <<Nyo inchankarrare o ninche?>>

¹⁷Neng'amaa ninye ꞉ltung'ani obo taatua ilo turrur nejoki, <<Laiteng'enani, aatirikoka Nkerai ai, naata lairirua lemeicho ninye meiroro.

¹⁸Naa kore nkata pooki nairrachu ele ayieni lai ꞉lairirua, nerriaki nkop, neitai laburra to nkutuk, nenya lala, neikarrapa acheii. Najoki looiteng'eni linono metaarai ilo airirua meeipung'o, kake nelakino.>>

¹⁹Newoliki ꞉Yeso ajoki, <<Oi ntae ltung'ana lemeata nkurukoto! Anu kenya aboitiere ntae, nang'iri o ntae? Eyautun layieni ene natii.>>

²⁰Neyakini ninye layieni, naa kore pee edol ꞉ilo oirirua Yeso, neipuch ilo ayieni aikirikirie. Nenang nkop eiperipera neitaita laburra to nkutuk.

²¹Neipar ꞉Yeso menye ajoki, <<Kebaa nkata natowuana ninye etiu nchi?>> Newoliki ajoki, <<Ketang'asua te keraicho,

²²naa kore nkatitin kumo, ketanang'aka ninye nkima o nkare ajo pee ear metua. Kake teneata nindim iyie ataasa, tereto iyioo, ning'erru!>>

²³Nejoki ꞉Yeso ninye, <<Eji tanaa indim? Keidimai ntoki pooki te ilo oata nkurukoto.>>

²⁴Neichir nabokata menye ilo ayieni, nejo, <<Kairuk, kake teretooki amu kaata ake lng'ach to nkurukoto!>>

²⁵Kore pee edol ꞉Yeso ajo kerukokino lturrur inie netii, nebuaaki aing'ode ilo airiruai ejoki, <<Iyie lairiruai lemeiro nemening'icho, kaitanap nanu iyie, tupuku tung'ai ele ayieni niming'il ajing atua ninye!>>

²⁶Nebuak ilo airiruai, neipuch ilo ayieni aikirikirie, neipung'u aing'uaa. Netuwuanai ilo ayieni ana lmeneng'ai, metejo lkumo, <<Ketua ninye.>>

²⁷Kake neibung ꞉Yeso nkaina enye nerrapu meitacho, neinyuototo ninye aitache.

²⁸Kore pee ejing Yeso nkaji, neipar ꞉looiteng'eni lenyena aa ninche aapeny, aajoki, <<Aanyo pee mikindim iyioo aataarai ilo airirua meeipung'o?>>

²⁹Nejoki ninche, <<Kore lotuwuana ele, naa to nkomono ake apeny eidimi aaipung'ie.>>

³⁰Kore pee eipung ninche aaing'uaa inie, nepuo aimaa nkop e Galilaya, nemeyieu Yeso pee eyielou hoo ꞉ltung'ani inia.

³¹Kore pee meyieu neyielou ꞉ltung'ana, naa tankaraki keiteng'enita looiteng'eni lenyena, ajoki, <<Kore Nkerai e Ltung'ani naa kepiki nkaik ee ltung'ana, neri metua, kake kore pee eich mperot uni, eidipaki aatar metua, nepiu.>>

³²Kake eitu eyielou ꞉looiteng'eni lenyena nejoito, neturia sii eipar ninye.

³³Nebaki taa Yeso o looiteng'eni lenyena lkerenket le Kapernaum. Kore etii nkang neipar ꞉Yeso ninche ajoki, <<Nyo duo iimakitata to nkoitiei?>>

³⁴Nejo ninche tau, amu kore duo to nkoitiei, keichankarrate maate ejo ng'ae oara kitok.

³⁵Newuon Yeso, neipot lolo pukura tomon o oare, nejoki, <<Kore teneyieu ltung'ani neaku lekue, meata ajo meaku le siedi too ltung'ana pooki neaku sii laisiaayiani loo ltung'ana pooki.>>

³⁶Neyau nkerai kini, neitacheyie te nkiji enche. Kore pee errapu aibung nejoki ninche,

³⁷<<Kore pooki ong'amaa nkerai nabo kini natuwuana ana tankaraki nanu, naa nanu etang'amayie, naa kore laang'amaa nanu, naa mara nanu etang'amayie, kake ilo laaterewua nanu.>>

³⁸Nejoki ꞉Yoana ninye, <<Laiteng'enani, ikitoduaa ltung'ani oaraa lairiruani aipung'ie ta nkarna ino, naa ikitimitikita tankaraki mara ninye lobo lang.>>

³⁹Kake nejoki ꞉Yeso, <<Emimbooyo, amu meatae loas mbae e nking'asia ta nkarna ai, neitoki inia katai ajo ntoki torno naaipirita nanu,

⁴⁰Amu kore lemeany iyioo naa lalang.

⁴¹Naa kore pooki ng'ae oicho ntae lkupuri obo le nkare tankaraki nirara le Kristo, kedede kajoki ntae, meimin hoo laata enye.

⁴²<<Naa kore loitopong'oo nabo ee kuna kunini naairuko nanu metaasa ng'ok, naikach teneililikini soit sapuk dapach oidong'ieki nkano murt, nenang'akini mpaso.

⁴³Naa tanaa ikintopong'oo nkaina ino taasa ng'oki, tudung'oi. Amu naikach tinijing atua nkichon[23] iata nkaina nabo alang tiniata nkaik pukura, nilo lmoti le nkima, inie netii nkima nemewuanaa.

⁴⁴

⁴⁵Naa tanaa nkeju ino nikintopong'oo taasa ng'oki, tudung'oi. Amu naikach tinijing atua nkichon iata nkeju nabo alang tiniata nkejek pukura nikinang'akini lmoti le nkima.

⁴⁶

⁴⁷Naa tanaa nkong'u ino nikintopong'oo taasa ng'oki, tukurtu. Amu naikach tinijing atua nkitoria e Nkai iata nkong'u nabo alang tiniata nkonyek pukura nikinang'akini lmoti le nkima,

⁴⁸inie <Nemeye lkurui, nemerai nkima.>

⁴⁹<<Amu kepeji pooki ng'ae te nkima e makaat.

⁵⁰<<Keisupat makaat, kake teneichunyie mpijan, nyo epiki payie epiju? Entaa loaata makaat, niakuku loata seriani likae o likae.>>