Read Samburu Luka 1 Bible Online

Luka 1 - Samburu bible

Luka 1

¹Ketonyua apa ltung'ana kumo aaiger nana baa naaitabayieki taatua iyioo,

²ana natamakita iyioo lolo ootoduaa aasipu nenia baa ta ng'asunoto, nera sii laisiaayiak le ilo rerei.

³Tankaraki inia, kore aidipa nanu atisipu nenia baa pooki ta ng'asunoto, nadol sii nanu ajo, keiririkino payie aaigeroki iyie Teopilo kitok oyanyiti, to nkoitiei naipidari.

⁴Kataasa ana, payie itum ateyielo sipat ee mbaa nikitilikaki.

⁵Kore apa ta ng'amata e Erode lkinkii le mbata e Yudea, netii laitainoni la lasar oji Sakaria le ntipat ee laitainok la lasar le Abiya. Neyem apa ntito e ltim la laitainoni la lasar oji Aron, naji Elisabet.

⁶Naa kore apa ninche, kera pukura ltung'ana loosipat tekue Nkai, neibung'a nkitanapat o lkerreti pooki la Laitoriani, meata ntioto.

⁷Nemeata ninche nkera, amu keolipi apa Elisabet, netaarrarrita pukura.

⁸Kore mparri nabo eitaita Sakaria lasar, era nkata naisiaaicho laitainoni obo la lasar le ntipat enye,

⁹nerriakino ninye ꞉nkuko, tana netiu te lkerreti laa laitainok la lasar, payie ejing nkaji e Laitoriani, apej lasar orropili.

¹⁰Kore eomonito lturrur kitok to boo ta nkata napeji lasar,

¹¹neipung'oki ninye ꞉lmalaika la Laitoriani, neitache ta mbata e tetene e lperere la lasar orropili.

¹²Kore payie edol ꞉Sakaria, neiputukuny, neguretu.

¹³Nejoki ꞉lmalaika, <<Miguretu Sakaria, amu kore nkomono ino, naa ketining'oki. Kore nkitok ino Elisabet, naa ikiiki layieni, ning'amaki nkarna naji Yoana.

¹⁴Naa itum iyie ng'ida kitok, neng'idakino lkumo inoto enye.

¹⁵Amu kore ninye, naa keaku kitok tekue Laitoriani. Nememat naichuo e lmusabibu anaa ndarpoi, naa keiput ninye ꞉Ltau Sinyati, abaki ewuon etii nkocheke e ng'otonye.

¹⁶Naa kerrinyoki ꞉ninye ltung'ana le Isirael kumo netii Laitoriani Nkai enche.

¹⁷Neituruk tekue Laitoriani, to mpukunoto o to ngolon ee Elija, paa kore ltauja loo loo menye, neiwuatuwuataki nkera enche. Neiwuatuwuataki sii ltung'ana lemening'icho ng'eno ee ltung'ana loosipat, neitibiraki Laitoriani ltung'ana ooterretenete.>>

¹⁸Nejoki ꞉Sakaria lmalaika, <<Aji aiko payie ayielou inia? Amu kara nanu lpayian arrarri, netaarrarra sii nkitok ai.>>

¹⁹Newoliki ꞉lmalaika ajoki, <<Kara nanu Gabiriel, ilo oitache tekue Nkai, naaterewua maairorie iyie, naaliki ele kilikuai supat.

²⁰Naa kore taata iming'anu, nimintoki aidim airoro, ana metabau inia parri naasai kuna baa, tankaraki eitu iruk rereii lainien oitabari ta ng'amata enche.>>

²¹Kore ake eanyita ꞉ltung'ana Sakaria, neing'asia tankaraki keimalmala ta nkaji e Nkai.

²²Kore payie eipung'u ninye, naaku meidim airorie ninche. Neyielou aajo ketoduaa nduata e nking'asia taatua nkaji e Nkai. Neitodol ninche nkitodolunot, kake newuon aa ming'ani.

²³Kore payie eichunye nkata e nkisiayiere enye ta nkaji e Nkai, nerrinyo alo nkang.

²⁴Kore tesiedi nkiti kata, nenutai nkitok enye Elisabet, newuon ta nkaji meipung lapatin imiet. Nejo, <<Laitoriani laaitaasa ana, ta ng'amata naatoduaa ninye, naaworu anyit tekue ltung'ana.>>

²⁵

²⁶Kore ta lapa le ile le nutai e Elisabet, neipaaya ꞉Nkai lmalaika Gabiriel, mechomo nkop e Galilaya, lkerenket oji Nasaret,

²⁷neti nkoliontoi neitu eboitiere lee. Naa ketasayia apa ninye ꞉ltung'ani oji Yosep, le ntalochi e Daudi. Kore inia oliontoi naa keji Maria.

²⁸Nelo lmalaika neti ninye nejoki, <<Serian iyie naichooki omom! Ikitii Laitoriani tenebo.>>

²⁹Kore ninye, neng'aing'ayu oleng tankaraki lomon la lmalaika, nejo ta ltau, <<Kaji etiu ana kirorokino?>>

³⁰Nejoki ꞉lmalaika, <<Mimputukuny Maria, amu itumo omom ta Nkai!

³¹Naa kore iyie, inutai, niiu layieni, naa ing'amaki nkarna naji Yeso.

³²Naa keaku ninye kitok, neipoti ajo Nkerai e ꞉ilo ooisul pooki. Keicho ꞉Laitoriani Nkai ninye lorika le Daudi oara akuyia lenye.

³³Neitore locho le Yakobo ntarasi, nemeata nkitoria enye nkiting'oto.>>

³⁴Nejoki ꞉Maria lmalaika, <<Aji eiko ana teneasai, neitu apake aboitiere nanu lee?>>

³⁵Newoliki ꞉lmalaika ajoki, <<Kelotu Ltau Sinyati te keper iyie, nikisiapaa ꞉ngolon e Ilo ooisul pooki. Naa kore ilo oini, neji sinyati naa Nkerai e Nkai.

³⁶Kore sii Elisabet e ntipat ino, naa ketunute nkayieni ta nkarrarro enye. Ketejoki apa kera ninye olipi, kake lapa le ile ele, le nutai enye,

³⁷amu meatae ntoki nemeidimai ta Nkai.>>

³⁸Nejo Maria, <<Ng'ura, kara nanu nkaisiaayiani e Laitoriani, metaasai ta nanu ana nitejo.>> Neinyuototo lmalaika aing'uaa ninye.

³⁹Neinyuototo Maria inia ng'amata, nelo asiooyo nebaya lkerenket obo le nkop ee ldonyuo le Yuda.

⁴⁰Nejing nkaji e Sakaria, neiroroki Elisabet.

⁴¹Kore payie ening Elisabet nkirorokino e Maria, neiguran nkerai taatua nkocheke enye, neiput Elisabet ꞉Ltau Sinyati.

⁴²Nebuak to ltoilo sapuk nejo, <<Imayiana iyie alang ntomonok pooki, nemayiana sii inoti le nkocheke ino.

⁴³Aanyo payie aaitaasaki nanu ana, eji paa, ng'otonye Laitoriani lai nalotu natii?

⁴⁴Amu kore payie aning nkirorokino ino, neiguran nkerai te ng'ida taatua nkocheke ai.

⁴⁵Naa emayiana inia nairuko nchere, keitabari inia apa natiaka ꞉ninye Laitoriani.>>

⁴⁶Nejo Maria, <<Kerrep ꞉nkurruk ai Laitoriani

⁴⁷neng'idakino ꞉ltau lai Nkai, Laitejeunoni lai,

⁴⁸tankaraki keing'ura mborron e nkaisiaayiani enye. Naa kore ang'asu taata, kaajo ntowuon pooki namayiana,

⁴⁹amu aaitaasa Lopeny ngolon mbaa kutuaa, naa keisinyati nkarna enye.

⁵⁰Naa kore lng'er lenye too lolo oourie ninye, naa kebik ntowuon o ntowuon.

⁵¹Etaasa mbaa kutuaa e ngolon ta nkaina enye, nesachaa lolo oaata nkilacha taa mparrunot ee ltauja lenche.

⁵²Neitodou lkutuaa too lorikan lenche le nkitoo neiliepie lolo oobor.

⁵³Neitiemu loaata sumach too ntokitin supati, nerriny lparakuo taa nkaik naarok.

⁵⁴ Neret Isirael laisiaayiani lenye, payie eparraa lng'er lenye ta Abraam o ichioi enye ntarasi ana ilo lekutuk apa oitaka lmakui lang.>>

⁵⁵

⁵⁶Nebik Maria o ninye ng'amata nabana lapatin okuni, nerrinyo alo nkang.

⁵⁷Nebau naa nkata naichuo Elisabet, neiu layieni.

⁵⁸Kore latia o ntipat enye nening aajo keitoduaa ninye ꞉Laitoriani lng'er lenye kitok, neng'ida tenebo o Elisabet.

⁵⁹Kore ta mparri e isiet, nepuonu aamurat[1] nkerai, nesaan aang'amaki nkarna e papa lenye Sakaria.

⁶⁰Kake newoliki ꞉ng'otonye ajoki, <<Meji nejia, kake keji Yoana.>>

⁶¹Nejoki ꞉ninche, <<Meatae to ltim lino ltung'ani oata inia arna.>>

⁶²Neirorie ꞉ninche menye taa nkaik, aaipar nkarna naichori nkerai.

⁶³Neomonu nchata dapach naaiger. Neiger ajo, <<Keji nkarna enye Yoana.>> Neing'asia pooki.

⁶⁴Nebolo nkutuk enye nabokata. Neng'asu aitoki airo arrep Nkai.

⁶⁵Nejing ngureticho atua inia latia enche pooki, neimakini nana baa ta mbata pooki nabore lowuan e Yudea.

⁶⁶Naa kore pooki ootining'o, nepik kuna baa atua ltauja lenche ejo, <<Amaa sa ana kerai, keaku ltung'ani otuwuaja?>> Amu kore nkaina e Laitoriani ketii tenebo o ninye.

⁶⁷Kore Sakaria papa lenye, neiput ꞉Ltau Sinyati, neibonu ajo,

⁶⁸<<Meisisi Laitoriani Nkai e Isirael, amu kore ninye, naa keyewuo alaku ltung'ana lenyena.

⁶⁹Naa keitacheyie Laitejeunoni ogol, ta ntalochi e laisiaayiani lenye Daudi,

⁷⁰ana netejo apa too Loibonok lenyena sinyat,

⁷¹meeitejeuni iyioo taa lmang'ati lang o taa nkaik ee lolo pooki ooiba iyioo.

⁷²Keing'erru lmakui lang, neparru lning'o lenye sinyati,

⁷³aa ilo lmumai otamie papa lang Abraam,

⁷⁴nelaku iyioo taa nkaik ee lmang'ati lang, payie kitum aaisiaayia mikiata ngureticho

⁷⁵te sinyaticho o tee sipat, tekue ninye te nkichon ang pooki.

⁷⁶Kore iyie nkerai ai, naa ikiji loiboni le Ilo ooisul pooki, tankaraki inturuk tekue Laitoriani nintorioo nkoitieii enyena,

⁷⁷Ninteyielo ltung'ana lenyena njeunoto ta mpalikinoto ee ng'ok enche,

⁷⁸tankaraki kenana Nkai ang ocheke. Kore tankaraki inia, keipung'oki iyioo wong'an e nkakenya nadou eing'uaa chumata,

⁷⁹paa kore lolo oowueni taatua naimin o loip lo lkiye, neitoong, neteeyo nkejek ang to nkoitiei e seriani.>>

⁸⁰Kore inia kerai, nebulu, neponikino ngolon e Ltau Sinyati, nebikoo to lkees ana metabai mparri naibalie koon too ltung'ana le Isirael.