Read Samburu Luka 10 Bible Online

Luka 10 - Samburu bible

Luka 10

¹Kore tesiedi ana negelu Laitoriani lkulie ooiteng'eni 72, neipaaya ma are are meituruko aapuo lkerenketi pooki o ng'oji pooki nelo ninye.

²Nejoki ninche, <<Keikitok ndung'ore e lchampa, kake keikuni laasak le siaai, naaku entoomon Lopeny ndung'ore metereu laasak le siaai atua ndung'ore enye.

³Enchom taa amu, kareu ntae ana lkuoo lekerra taatua suyiani!

⁴Naa eminap mbene ee ropiyiani anaa lbene anaa namuka, nimirorokiki ltung'ani to nkoitiei.

⁵Kore nkaji pooki nijing'jing, entang'as entejo, <Metijing'a seriani ana aji!>

⁶Naa tenetii ltung'ani le seriani inie, newuenie seriani inchi ninye, naa tenemetii, nechukokino ntae seriani inchi.

⁷Entewueni te inia aji, ninyanya nimatmat ntoki naichori ntae, amu kore laasani le siaai naa keichiaakino payie elaki. Emipuo aarukurukoo nkajijik.

⁸Kore lkerenket pooki lijing'jing neitoomoni ntae, entam ntoki pooki naapiki tekue ntae.

⁹Enchiunyie ltamoyia pooki ootii inie, nijokiki, <Etinyikaka ntae nkitoria e Nkai.>

¹⁰Naa kore lkerenket pooki lijing'jing nemeitoomoni ntae, enchom atua nkoito enche nijoijo,

¹¹<Kore abaki nterit e lkerenket linchi naterepa nkejek ang ikipioki ntae. Kake enteyielo naa aajo etinyikua nkitoria e Nkai.>

¹²Kajoki ntae kore kenya inia parri e nkiguana, keikachieki Sodom aaitalang ilo kerenket.>>

¹³<<Oi sii ake iyie Korasin! Oi sii ake iyie Betesaida! <<Amu kore tanaa ketaasaki apa te Tiro o Sidon mbaa e nking'asia naataasaki taatua ntae, anata apa eibelekenyete ninche, neichop lkuniyiani, newueni too nkuron.[29]

¹⁴Kake kore kenya ta mparri e nkiguana, naa keiteleleki nkiguana e Tiro o Sidon aaitalang ninchi.

¹⁵Amaa iyie Kapernaum, mara mikiliepieki aaitabaki chumata? Ikintodouni aaitodoki nemeneng'a.

¹⁶<<Kore ilo oning ntae, naa nanu ening. Naa kore loany ntae, naa nanu etanya. Naa kore laatanya nanu, naa etanya ilo laaterewua.>>

¹⁷Kore lolo ooiteng'eni 72, nechukunyie te ng'ida nejo, <<Laitoriani, kening abaki iyioo lairiruani tinikikusakan aaing'ode ta nkarna ino.>>

¹⁸Nejoki ninche, <<Katoduaa Chitani esulunye ana nkiwuang'ata naing'uaa chumata.

¹⁹Naa enteyielo taa aajo, kaichoo ntae nkitoria nindachiechie lasuria o nkulupani o ngolon pooki e lmang'antita, nemeatae hoo ntoki naar ntae.

²⁰Naa eming'ida tankaraki naning ntae lairiruani, kake enting'idata tankaraki keigero nkarn inchi te chumata.>>

²¹Kore te inia kata, neiput Yeso ꞉ng'ida e Ltau Sinyati nejo, <<Kaarrep iyie Papa, Laitoriani le chumata o nkop, amu isudorie kuna baa lkursaii o laing'eni, nimbalakinyie nkera kunini. Ee Papa, inia naa apake yieunoto ino!>>

²²Kaaitarasaka Papa lai, ntoki pooki apik nkaina ino. Meatae hoo loyielo ajo ng'ae Nkerai mara Papa ake, nemeatae sii loyielo ajo ng'ae Papa mara Nkerai ake, o ilo oyieu ꞉Nkerai neibalakinyie.

²³Neiwuatuwuatakino ꞉Yeso looiteng'eni lenyena nejoki too nkurrat, <<Emayiana nkonyek naadol nenia nidolitata ntae,

²⁴amu kajoki ntae, keikumo loibonok le Nkai o Lkinkii ooyieu nedol kuna nidolitata ntae neitu edol, neyieu nening nining'itoto neitu ening.>>

²⁵Nelotu laing'enii obo loo nkitanapat, neitache atem Yeso nejo, <<Laiteng'enani, amaa, aji aiko tanajung nkichon ee ntarasi?>>

²⁶Nejoki ꞉Yeso, <<Aanyo naigero too nkitanapat? Aji inko iyie tinisom?>>

²⁷Newoliki ajoki, <<Tachama Laitoriani Nkai ino ta ltau lino pooki o te nkichui ino pooki o te ngolon ino pooki o te ng'eno ino pooki. Nicham sii le latia ino ana nicham koon.>>

²⁸Nejoki ꞉Yeso, <<Itowolua aitibiraki, taasa inia, naa ibik ntarasi.>>

²⁹Naa kore amu keyieu ninye neitodolu ajo kera ltung'ani loosipat, neipar Yeso ajoki, <<Ng'ae dei le latia ai?>>

³⁰Newoliki ꞉Yeso ajoki, <<Etodowua apa ltung'ani obo eing'uaa Yerusalem alo Yeriko, netum ꞉ninye lapurrok, neoru nankan, neidong, nepuo aaing'uaa etaa keye.

³¹Nelotu laitainoni obo la lasar aimu inia oitiei, kore payie edol ilo tung'ana nerepaa aim tabata.

³²Neitoki sii ltung'ani laa Lawi[30] alotu inie ng'oji. Kore payie ebau nedol ilo tung'ani, neim tabata arepaa.

³³Kake kore Samariai obo olotito, nelotu neti ilo tung'ani. Kore payie edol, neing'erru oleng.

³⁴Nelo neti ninye, neen ng'oldonyot enyena, neicho lmairo abukoki lata o naichuo e lmusabibu. Neitidir sikiria enye neya nkaji ee lomon, neapare teinie.

³⁵Kore mparri naijipita inia, neitai dinarini[31] are neicho lopeny nkaji ee lomon nejoki, <Taapare ninye, kake tenerepaa lmairo linchoo nenia dinarini, nalak ntoki pooki tanachukunyie.>

³⁶Amaa, alo too kulo okuni oitodolua ajo kera le latia tele tung'ani otumo lapurrok?>>

³⁷Nejo, <<Ilo /oing'urrie ninye.>> Nejoki ꞉Yeso, <<Chomo naa taasa sii iyie nejia.>>

³⁸Kore epuoito ninche, nejing Yeso nkang nabo, neitoomon ꞉nkitok naji Marta ta nkaji enye.

³⁹Neata apa nkanache naji Maria, natowuana tankalo nkejek e Laitoriani ainining nejoito.

⁴⁰Kake kore Marta keirranita siaai kitok. Nelo neti Yeso nejoki, <<Laitoriani, midol ajo aatung'ayie nkanachai maisiayia lomon apeny? Tiaaki naa ninye maateret!>>

⁴¹Newoliki ꞉Laitoriani ajoki, <<Marta, Marta, iirrana nintanyamal koon too ntokitin kumo,

⁴²kake mbae nabo ake eyieuni. Ketegelua Maria mbae supat, naa meoruni ninye.>>