Read Samburu Luka 12 Bible Online

Luka 12 - Samburu bible

Luka 12

¹Kore inia kata, payie eiturrurro nkalupuni o nkalupuni e siamu ana metabaki neidacha ninche maate, neng'asu Yeso ajoki looiteng'eni lenyena, <<Errita ate te mukate naisiicho ee Lparisayo aa nkitaakino enche.

²Meatae ntoki naisiapa nemeibalieki, anaa naisudoro nemeyielouni.

³Neaku naa kore pooki nitejo ta naimin kening'oi to wong'an, naa kore pooki nitukurraka ltung'ani taatua lgilat le atua nkaji, naa kelikori tee nkeperi ee nkajijik.

⁴<<Kajoki naa ntae lchoreta lainien, emiurie lolo oaar sesen, laa kore tesiedi inia nemeatae nkae naaidim aataas.

⁵Kake kore loyiere niureii naa kaliki ntae: Enturia ilo laa kore payie eidip atara sesen metua, neata aitoki ngolon nanang'akinyie lmoti le nkima. Ee, kajoki ntae, enturia ninye!

⁶Amaa, mara memiri ntiitiini imiet tee sintii oare? Merikinoi sii hooyia nabo enche tekue Nkai.

⁷Kore abaki lpapit loo nkuechi inchi naa keikena pooki. Emiurieicho naa amu irara ntae le tipat aalang ntiitiini kumo.

⁸<<Kajoki ntae, kore pooki ng'ae laaibalie nanu tekue ltung'ana, naa keibalie sii ninye ꞉Nkerai e ltung'ani tekue lmalaikani le Nkai,

⁹kake kore laamiki nanu tekue ltung'ana nemikini sii ninye tekue lmalaikani le Nkai.

¹⁰Kore pooki ng'ae oiro rerei torno oipirita Nkerai e ltung'ani naa kepalikini, kake mepalikini ilo odek Ltau Sinyati.

¹¹Naa teneriki ntae tekue Sinagogini o tekue laitoriak o tekue loaata nkitoo, eming'aing'ai to nkoitiei nimitietie ate tanaa too lomon lijoijo,

¹²Amu kore Ltau Sinyati, naa keiteng'en ntae inia kata, inia nayiere nijoijo.>>

¹³Kore taatua inia siamu, nejoki ꞉ltung'ani obo Yeso, <<Laiteng'enani tiaaki lalache lai maatooriki njung'ore ang.>>

¹⁴Kake newoliki ajoki, <<Lolee, ng'ae /laaitaa nanu ladung'oni tanaa ilo ooriki ntae njung'ore inchi?>>

¹⁵Neitoki ajoki ninche, <<Entodol ate! Errita ate to luboi pooki, amu kore ltung'ani naa mara nkumoin ee ntokitin naata eichiwue.>>

¹⁶Neliki ninche nkitanyanyukoto ajoki, <<Ketiiwua apa lchampa lo ltung'ani garsis ndaa kitok.

¹⁷Kore ilo tung'ani garsis, neng'asu ajo ta ltau lenye, <Kaa aas? Nemeatae napik ndaa e lchampa lai.>

¹⁸Nejo, <Nchi aas, kaar lkompeii lainien nachet lkulie kutuaa oaalang kulo, napik nkano pooki e lchampa lai o nkulie masaa ainien inie.

¹⁹Najoki nanu nkurruk ai, <<Naa kurruk ai, iyata ntokitin kumo supati nikituchumakaki taa larin kumo. Iyeng'iyeng'ai taa, ninya, nimat, ning'ida.>>>

²⁰Kake nejoki ꞉Nkai ninye, <Lo madai! Kore ana kuarie keyieuni ltau lino. Naa amaa, ntokitin ninteng'elika koon, na ng'ae eaku?>

²¹Naa nejia etiu ltung'ani oiteng'elaki koon ntokitin kake mara ninye parakuoni ta mbata e Nkai.>>

²²Nejoki ꞉Yeso looiteng'eni lenyena, <<Kajoki naa ntae, emiirrana tee nkichoni inchi, aajo nyo inyanya, tanaa sii tee seseni linchi, aajo nyo inchopchop.

²³Amu kore nkichui naa keata tipat alang ndaa, naa kore sii sesen keata tipat alang nkichopo.

²⁴Eng'ura lkurruki: meunicho ninche, nemedung'ucho, nemeata sutooni anaa lkompeii, kake keitoti ake ꞉Nkai ninche. Kebaa sa irara ntae le tipat aalang nkueeny!

²⁵Naa amaa taa ntae, ng'ae eirrana oidim neponiki nkichui enye saa nabo?

²⁶Amaa tanaa mindimdim aatoponiki nkini toki nemeiput abaki ndap, aanyo payie iirranana too nkulie pooki?

²⁷Eng'ura neiko ntapuka tenebulu, nemenyok aasicho nemepiyaicho, kake kajoki ntae, eitu abaki eichopo Solomon te nkitoo enye pooki ainyunyukore nabo ee nana tapuka.

²⁸Oi siake ntae oaata nkurukoto kini! Amaa, tanaa keichop ꞉Nkai nkujit naabulu anapar ta ang'ata neikenyu teisiere nenang'akini atua nkima, kebaa sa eitulusoo aichop ntae!

²⁹Emiyiaya naa ntae ntoki ninyanya anaa nimatmat, nimiirranana taa mparrunot inchi.

³⁰Amu kore kuna tokitin pooki, naa ninche eyiaya loreren le ana nkop lemeyielo Nkai, kake keyielo Papa linchi ajo iyieuu sii ntae.

³¹Kake entang'as naa enteyiai nkitoria e Nkai, naa keitokini aaponiki ntae nenia pooki.

³²<<Emiurieicho ntae mboo kini, amu ketachamayie Papa linchi aicho ntae nkitoria.

³³Entimir ntokitin niatata ninchocho laisinak ntoki nintamita. Entibiraki naa ate lbenia lememusanu o lchumati le chumata lemeng'oru, amu mebaki naa lapurroni inie, nemebaki lkurui atama aitarruoo.

³⁴Amu kore netii parakuoicho inchi, naa inie sii etii ltauja linchi.

³⁵<<Enchoo naa metaa keena nkiji inchi, ninchocho lkilang'ilang'eta linchi metaa keilu!

³⁶Naa entaa ana ltung'ana oaanyuta lkitok lenche meeu eing'uaa latim le nkiyema, paa kore tenelotu aikodkod ltim netum aatoboloki ninye nabokata.

³⁷Emayiana lolo aisiaayiak laa tenelotu lkitok lenche neirrachu erripicho. Kedede kajoki ntae, kerretena ninye, neitoomon aicho ndaa, neisiaai ninche.

³⁸Naa teneyewuo te nkiji e nkuarie tanaa etaa keikenyu, neirrachu ake ninche erripicho, emayiana siake lolo aisiaayiak!

³⁹Kake enteyielo ana, tanaa keyielo lopeny nkaji ng'amata nalotu lapurroni, anata meicho nkaji enye metigili.

⁴⁰Naaku enterretenata naa, tankaraki ng'amata nimintiekiki kenya elotunyie Nkerai e ltung'ani.>>

⁴¹Nejo Petero, <<Laitoriani iyioo dei ijokita ana kitanyanyukoto, ana ltung'ana pooki?>>

⁴²Nejoki ꞉Laitoriani, <<Ng'ae naa laramatani oisiligai nera ng'en, oichoo ꞉lkitok lenye meitoria laisiaayiak lenyena, neichoo metaa ninye ooriki laisiaayiak ndaa ta nkata nairirikino?

⁴³Emayiana ilo aisiaayiani, laa kore payie errinyunyie lkitok lenye, neirrachu easita nejia.

⁴⁴Kesipa naa kajoki ntae, keicho ninye meitoria ntokitin enyena pooki.

⁴⁵Kake kore payie ejo ilo aisiaayiani ta ltau lenye <Keimalmal lkitok lai>, neng'asu aidong laisiaayiak o nkaisiaayiak, nenya ndaa, nematicho, nemerai,

⁴⁶naa kelotu lkitok le ilo aisiaayiani nkata nemeiteki ajo kelotu o nkata nemeyielo, naa kedung ninye katare, neituchulaki lolo leitu eiruk.

⁴⁷Naa kore ilo aisiaayiani oyielo yieunot e lkitok lenye, neitu erretena anaa eas ana nayieu lkitok, naa keidong'i oleng.

⁴⁸Kake kore ilo lemeyielo, netaasa ntoki naichiaakino payie eidong'i, neidong'i peneu. Kore pooki oichooki nkumo, neyieunyieki nkumo, kore lotipikakaki ntokitin kumo, neiparrunyieki nkumo oleng te ilo.

⁴⁹<<Kayewuo aisuroki nkop nkima, naa oi siake aa ketarrapa!

⁵⁰Naa kaata naa nkipatisare nairirikino payie aaipatisieki, naa kaaitanyamalita ana meitabari kenya!

⁵¹Ijoijo sa ntae kayewuo ayau sotua nkop? Kajoki naa ntae, mara nejia kake oro ayewua!

⁵²Kore ang'asu taata, kore taatua nkaji, netii ltung'ana imiet ooro, aa keorore ꞉okuni oare, neorore ꞉oare okuni,

⁵³<neoro menye o layieni lenye, neorore ꞉layieni menye, neorore ꞉ng'otonye ntito enye, neorore ꞉ntito ng'otonye, neorore ꞉nkautani ntomononi e layieni lenye, neorore ꞉ntomononi e layieni lenye nkautani enye.> >>

⁵⁴Nejoki ꞉Yeso siamu, <<Tinidoldol nkidis edooyo to ndoyioroto e ndama, nijoijo nabokata, <Eyewuo girrarri>, neasai naa ake nejia.

⁵⁵Kake kore payie idoldol lkutati le kopikop ekutunye, nijoijo, <Kelotu ldama oirewua>, neasai naa ake inia.

⁵⁶Koree ntae looitaakino, iyielolo ake aatilimu seerri e nkop o loing'ang'e, kake aanyo payie miyielolo aatilimu ana ng'amata e taata?

⁵⁷<<Naa aanyo payie migelulu ntae maate inia nadede?

⁵⁸Kore tanaa iriamari o litarare alo nedung'ieki nkiguana, tonyuaa temeletie to nkoitiei, eitu kirikoki aitabaki netii ladung'oni le nkiguana. Amu kore ladung'oni naa ikintarasaki sikarii, nikipik sikarii atua jila aen.

⁵⁹Kaajoki, mimpung'u iyie te inie mara italaa sintii le siedi.>>