Read Samburu Luka 13 Bible Online

Luka 13 - Samburu bible

Luka 13

¹Naa kore apa te inia kata keatae ltung'ana ootilikita Yeso mbaa ee lkulie ltung'ana le nkop e Galilaya oaatara ꞉Pilato eitaita lasar, neituchulaki lodo lenche ilo asar oitaita.

²Newoliki ninche ajoki, <<Amaa, idoldol ntae aajo ltung'ana loo ng'ok oleng kulo tung'ana le Galilaya aalang lkulie pooki le inie tankaraki natumo sina oba nejia?

³Kajoki naa ntae, metiu nejia. Kake tinimirriidudu, naa indaayaya sii ntae aiko nejia.

⁴Tana sii laapa 18, ootuurokine nkaji naado te Silaom near metuata. Amaa, ijoijo ntae kera ninche laasak loo ng'ok oleng aalang lkulie pooki oaamanya Yerusalem?

⁵Kajoki naa ntae metiu nejia, kake tinimirriidudu sii ntae naa indaayaya pooki aiko nejia.>>

⁶Nelimu ana kitanyanyukoto: <<Etii apa ltung'ani obo oata lcheni la lng'aboli ouno ta lchampa lo lmusabibu nelo ayiaya lng'anayio te ilo cheni, kake nelau.

⁷Nejoki laitibirani la lchampa lo lmusabibu, <Ng'ura, kayewuo kulo arin okuni ayiaya lng'anayio tele lng'aboli nalau. Tudung'o! Aanyo payie ewuon aya mpaach pecheu?>

⁸Newoliki ꞉laitibirani la lchampa ajoki, <Lokitok, tapala ele ari apeny matukurroki nkulupo, napik ltulugumi!

⁹Naa tenejing lng'anayio elde ari olotu naaku keisupat, kake teneitu ejing nidung.> >>

¹⁰Kore ta mparri nabo e Sabato, neiteng'enicho Yeso te Sinagogi nabo.

¹¹Naa kore apa teinie, netii nkitok nabo naata lairirua le moyian. Naa ketigila ꞉ilo airirua nkoriong taa larin 18, neirrig paa meidim aitorioi koon aitacho aitibiraki.

¹²Kore payie edol Yeso ninye, neipot meeu nejoki, <<Natomononi, ikitalakuaki te nchalan ino!>>

¹³Neiteleki nkaina enye inia kitok, necheii nkoriong nabokata, neisis Nkai.

¹⁴Kore tankaraki naichiunyie ꞉Yeso ltung'ani ta mparri e Sabato, negoro lkitok le Sinagogi neitarrap ltung'ana ajoki, <<Mperot ile ake eyiere neasi siaai, ootu taa nenia perot meichiunyeki ntae, kake mara ta mparri e Sabato!>>

¹⁵Newoliki ꞉Laitoriani ajoki, <<Ntae looitaakino! Amaa, keata lobo taa ntae lemelaku lmong'o anaa sikiria enye to boo, nereu aitamat nkare ta mparri e Sabato?

¹⁶Amaa ana kitok, nara ntito e akuyia lang Abraam nateena apa Chitani larin 18, mara keichiaakino nelakuni ta mparri e Sabato?>>

¹⁷Kore payie eidip atejo kuna baa, neitam anyit lolo pooki ooiserunore ninye, neng'ida ltung'ana taa mbaa pooki kutuaa e nking'asia naataasa ninye.

¹⁸Neipar ꞉Yeso ajoki, <<Nyo einyunyukore nkitoria e Nkai? Naa nyo aitunyunyukore?

¹⁹Nchi etiu ana lantararai kini owa ltung'ani aun ta lchampa lenye, nebulu neaku lcheni, neitibir nkueeny e nkeper e ai nkajijik enche too sura enyena.>>

²⁰Neitoki ajo, <<Nyo aitunyunyukie nkitoria e Nkai?

²¹Nchi etiu ana mukate kini naisiicho[35], naituchulaka nkitok ncharaan uni e nkuruma e nkano, nepal ana meisiichoi pooki.>>

²²Nelo Yeso aibung nkoitiei, aidachaa nkang'ite o lkerenketi eiteng'enicho eloito Yerusalem.

²³Neipar ltung'ani obo ajoki, <<Laitoriani, amaa, keikuni sa ltung'ana kenya oojeu?>> Nejoki ninche,

²⁴<<Entonyok oleng entijing nkutuk napirik e nkitoria e Nkai! Amu, kajoki ntae, keikumo loonyok aajing, nemetumoki.

²⁵Kore ake payie einyuototo lopeny nkaji, neiken nkutuk e nkaji, nintachoo ntae ta aulo ijoijo, <Laitoriani, tobolu iyioo.> Kake newoliki ajoki, <Mayielo nanu ntae, ajo aji ing'uaa!>

²⁶Ning'asusu aajo, <Ikitama ndaa, nikimaticho iboitiere iyioo, ninteng'enichie too nkoito ang.>

²⁷Nejoki ntae, <Mayielo ning'uaa! Enchom, entung'ayieeki nanu ntae pooki, laasak loo ntorrok!>

²⁸Kore kenya tinidoldol Abraam o Isaka o Yakobo o loibonok pooki te nkitoria e Nkai, etanang'akaki ntae aulo, naa inchirchir kenya, niwonywony lala te mion.

²⁹Naa kepuonu ltung'ana ooing'uaa neiliepunyie o nedoyierie ndama o kopikop o maikope, newueni aanya ndaa taatua nkitoria e Nkai.

³⁰Naa keaku kenya lolo le siedi lekue, neaku lekue le siedi.>>

³¹Kore te inia kata ake, nepuonu lkulie Parisayo nejoki ninye, <<Inyuo siga tene, amu keyieu Erode nikiar.>>

³²Newoliki ninche ajoki, <<Enchom, entiaaki inia barie, <Ng'ura, kore anapar o teisiere kamiraa lairiruani naichiunyie ltamoyia, kore mparri e uni naidip siaai lai.

³³Kake meata ajo maaibung nkoitiei anapar o teisiere o mparri e uni, amu meiririkino payie enang loiboni nkae ng'oji namara Yerusalem.>

³⁴Oi sii ake Yerusalem! Yerusalem! Iyie naar loibonok nenang too soito metuata lolo likiterewakaki. Nkatitin aja ateyiewua naiturrur nkera inono ana neiko nkoko teneiturrurru nkuoo taa nkaipupo enyena, niany.

³⁵Eng'ura etung'akaki ntae nkaji inchi era mijoni. Naa kajoki ntae, mikidoldol nanu ana nijoijo, <Emayiana ilo olotu ta nkarna e Laitoriani!> >>