Read Samburu Luka 14 Bible Online

Luka 14 - Samburu bible

Luka 14

¹Kore apa Sabato nabo payie elotu Yeso nkaji anya ndaa o lkitok obo loo Lparisayo, newueni Lparisayo aaleen ninye.

²Naa ketii apa tekue ninye ltung'ani oata moyian naitejia sesen.

³Neipar ꞉Yeso laing'eni loo nkitanapat o Lparisayo ajoki, <<Keichiaakino tee nkitanapat teneichiunyieki ltung'ana ta mparri e Sabato ana meichiaakino?>>

⁴Kake negira ninche. Kaa hae, neibung ninye, neichiunyie, neicho mechomo.

⁵Nejoki ninche, <<Ng'ae taa ntae aa kore payie edoki layieni lenye anaa nkiteng enye lare, nemeitai nabokata aipung'unyie ta mparri e Sabato?>>

⁶Kake nelau ninche wolet.

⁷Kore payie edol neiko lolo omon tenegelaki ate ng'ojitin e nkanyit, neliki nkitanyanyukoto ajoki,

⁸<<Kore tinikintoomon ꞉ltung'ani ta latim le nkiyema, miwuon to ng'oji e nkanyit metaa teneitoomonoki likae ltung'ani oyanyiti alang iyie,

⁹nemelotu ilo oitoomono ntae pukura nikijoki iyie, <Nchoo ele tung'ani mpaach>, nintoki alo to nkurna awuon tesiedi.

¹⁰Kake tinikintoomon ꞉ltung'ani chomo towuana tesiedi, metaa tenelotu ilo likintoomono nikijoki, <Lchore lai! Liepa chomo towuana te idie tekue.> Naa inia kata kianyiti iyie tekue lolo pooki likiboitiere te misa.

¹¹Amu kore pooki ng'ae oiliepie koon naa keitodouni, naa kore loitodoyio koon naa keiliepieki.>>

¹²Nejoki ꞉Yeso ilo oitoomono ninye, <<Tinincho ltung'ana ndaa e siran tanaa neteipa, mimpotu sotuatin linono o lalachera linono o le ntipat ino o le latia ino oaara parakuo, payie meaku ikintoomon aitoki ninche iyie aalaaki inia nintaasa.

¹³Kake tininya iyie sukukuu, ntoomono loomena o lng'ojinia o lootigiligilete o lmodook,

¹⁴naaku ikimayiani iyie tankaraki mikindim ninche aatalak. Amu ikilaakini iyie ta nkata naitipiuni loosipat.>>

¹⁵Kore payie ening lobo loo lolo oowueni tenebo o ninye inia nejoki, <<Emayiana lolo oaanya kenya ndaa te nkitoria e Nkai.>>

¹⁶Nejoki ꞉Yeso ninye, <<Kore apa, neitai ltung'ani obo sukukuu kitok, neitoomon ltung'ana kumo.

¹⁷Kore payie eaku ng'amata e ndaa, nereu laisiaayiani lenye metiliki lolo ooitoomonoki ajoki, <Wootu, amu eidipe naa ntoki pooki.>

¹⁸Neng'asu ninche pooki alimu nkolati enche. Nejoki ninye ꞉lekue, <Kainyieng'ua lchampa taata, naa keyiere payie alo adol. Kaamon naa payie kipalaa machomo.>

¹⁹Nejo likae, <Kainyieng'ua lmong'i tomon laturuchere eena ma are are, naa kalo asaanaa ninche. Wou naa tapalayieeki machomo!>

²⁰Neitoki sii likae ajoki, <Ng'ole ake ayemiche, naaku matumoki hooyia ayeu!>

²¹Nelotu ilo aisiaayiani neti lkitok lenye neliki lkilikuai. Negoro inia kata lopeny nkaji nejoki laisiaayiani lenye, <Mpung'o tesioi, chomo ntacho taa lbarbarani o nkoito e lkerenket, niriku laisinak o lng'ojinia o lmodook o lootigiligilete!>

²²Nejo laisiaayiani, <Lkitok lai, kore naduo nikintanapa mataasa naa ketaase, newuon siake eatae mpaach.>

²³Nejoki ꞉lkitok ilo laisiaayiani lenye, <Chomo nkoito naalala o mbat e lkerenket, ninyok ateku ltung'ana metijing'u nkaji ai ana meiputa.

²⁴Amu kajoki ntae, meatae hooyia lobo too lolo duo ooitoomonoki oichamcham inia daa ai> >>.

²⁵Kore eiriamari lturrurri kumo o Yeso, neiwuatuwuatakino ninche nejoki,

²⁶<<Kore tenelotu ltung'ani natii, namaacham[36] nanu aitalang papa lenye o ng'otonye o nkitok enye o nkera enyena o lalachera o nkanachera enyena anaa nkichon enye, naa meaku loiteng'eni lai.

²⁷Kore ilo pooki lemenap lmusalaba lenye, naairukurukore nanu, naa meidim ataa loiteng'eni lai.

²⁸Amu ng'ae naa taa ntae, aa teneyieu nechet ltalet, lemewuon ang'as aikenicho, aing'uraa ntoki pooki naaidipie?

²⁹Payie meaku naa, kore etuuno nkitamanyunoto, nelakino aidipa, nedol ltung'ana pooki neng'asu aarojare

³⁰aajo, <Etang'asua ele tung'ani acheticho kake ketalakine aidipa.>

³¹Tanaa amaa, keatae lkinkii olo arare likae kinkii ta larrabal lemewuon ang'as tekue aiguana makoon, adol tanaa kore eata nkalupuni tomon, keidim sa nerasaki ilo oata nkalupuni tikitam tenelotu arare ninye?

³²Kore payie edol ajo meidim atarare ninye, kore ake ewuon elakua nerewaki lkilikuai aipar mbaa naidim aayau melet.

³³Naaku kore pooki ng'ae taa ntae lemeing'uaa pooki naata, naa meaku loiteng'eni lai.

³⁴<<Keisupat makaat, kake teneichunyie mpijan, nyo epiki payie epiju?

³⁵Meisupat hoo abaki to nkop tanaa to ltulugumi. Kenang'ari aulo. <<Kore loata nkiyiaa naaning'ichere, nchoo metining'o!>>