Read Samburu Luka 15 Bible Online

Luka 15 - Samburu bible

Luka 15

¹Kore laitalakunok pooki le kodi o ltung'ana loo ng'ok, nenyikaki aainining Yeso.

²Neing'unyung'uny Lparisayo o laiteng'enak loo nkitanapat aajo, <<Kore ele tung'ani naa keng'amaa ltung'ana loo ng'ok, nenya ndaa tenebo o ninche.>>

³Neliki ꞉Yeso ninche ana kitanyanyukoto,

⁴<<Amaa, ng'ae taa ntae, aa teneata nkerra ip, neimin nabo lemeing'uaa kunda ntomoni saal o saal to soro, nelo ayiaya inia naimina ana metumo?

⁵Naa kore payie etum, neng'ida nerrapu apik sip lenye.

⁶Kore payie ebau nkang enye, neipotu sotuatin lenyena o latia enye nejoki, <Enting'idata tenebo o nanu amu katumo naa inia ker ai naimina!>

⁷Naa kajoki naa ntae, nejia sii etiu te chumata, keaku ng'ida kitok tankaraki ltung'ani loo ng'ok obo oirriidua alang loosipat ntomoni saal o saal, lemeyieu neirriidu.

⁸<<Kaa ntomononi aa teneata ropiyiani tomon[37] neimin nabo, nemeinok lkilang'ilang'et, neor nkaji, nenyok ayiaya ana metumo?

⁹Naa kore payie etum, neipotu ncheriata enyena o latia nejoki, <Enting'idata tenebo o nanu, amu katumo inia ropiyia ai naimina.>

¹⁰Naa kajoki ntae, nejia sii etiu, kore teneirriidu ltung'ani obo loo ng'ok, neng'ida lmalaikani le Nkai.>>

¹¹Nejo Yeso, <<Keatae apa ltung'ani oata layiok oare.

¹²Nejoki ꞉layieni kini menye, <Papa, toorikaaki nanu ntoki ai pooki nayiere duo najung te iyie.> Neoriki menye ntoki enye pooki.

¹³Kore payie eich nkuti perot, neinyuototo ilo ayieni neiturrurru ntokitin enyena pooki, neorori alo nkop nalakua. Kore etii inie, neichirkalie parakuoicho enye pooki to nkoitiei e nchirkala.

¹⁴Kore payie emut ntoki pooki, netum ꞉nkolong kitok inia kop, neng'asu atum sina.

¹⁵Nelo aisiaai ltung'ani obo le inia kop, nerik ilo tung'ani ꞉ninye lchampai lenyena meirritaki mbitiro[38].

¹⁶Neng'uar eyieu nenya nkinyat naanya nenia bitiro, nemeatae hooyia ltung'ani oicho ntoki.

¹⁷Kore payie ejo ninye nkue de nejo, <Kewuaa sa ltung'ana ooigerito ꞉papa lai siaai oaanya ndaa aimu neleku, kake kaye nanu tene to sumach!

¹⁸Kainyuototo naa alo neti papa lai najoki, <<Papa, kataasa ng'oki, kaitarroka Nkai, naitarroka iyie.

¹⁹Merekure eiririkino payie aaji nanu nkerai ino. Ntaaki tana lobo loo lolo aisiaayiak lingero!>> >

²⁰Neinyuototo, nelo neti papa lenye. <<Kore ewuon elakua, nedol ꞉papa lenye neduaaki lng'er oleng, nekuet anang'are, neibung agus.

²¹Nejoki ꞉ilo ayieni lenye ninye, <Papa, kataasa ng'oki tekue Nkai o tekue iyie. Merekure eiririkino payie aaji nanu layieni lino.>

²²Nejoki ꞉papa lenye laisiaayiak lenyena, <Entesieku, eyautu nanka naaodo supat too pooki, enchopoki ninye! Nipikpik lpete lkumojino lenye, ninchopokiki namuka.

²³Niyauu larami le nkiteng oitipiroki, niyieng'yieng matam niking'ida.

²⁴Amu ketua apa ele ayieni lai neitoki apiu, keimina apa neitokini aatum.> Neng'asu aang'ida.

²⁵<<Kore layieni lenye botor, netii atua lchampa. Kore payie elotu anyikaki nkang, nening sinkoliotin o eranyitae nenyaitae.

²⁶Neipot laisiaayiani obo, aipar ntoki naasitae.

²⁷Nejoki ninye, <Lalache lino oyewuo, naa keteyiang'a papa lino larami le nkiteng oitipiroki, amu ketang'amayie ninye era bioto.>

²⁸Negoro ninye, neany ejing atua nkaji. Kake neipung'oki ꞉papa lenye to boo, nelej metijing'a nkaji.

²⁹Newoliki papa lenye ajoki, <Ng'ura kulo arin pooki laaisiaayia nanu iyie, neitu hoo aikata aany aas nikitiaka. Kake eitu aikata kincho lkuo lekine lanya, payie ang'ida o sotuatin lainien.

³⁰Kake kore payie elotu ele ayieni lino otumutaka ntokitin inono pooki loloito, niyiang'aki larami le nkiteng oitipiroki.>

³¹Nejoki ninye, <Layieni lai, ikiboitiere iyie nanu nkata pooki, naa kore ntokitin ainien pooki, naa ninono.

³²Kake keiririkino payie ikinya sukukuu niking'ida tankaraki kore ele alache lino naa ketua apa neitoki apiu, naa keimina apa neitokini aatum.> >>