Read Samburu Luka 16 Bible Online

Luka 16 - Samburu bible

Luka 16

¹Neitoki Yeso ajoki looiteng'eni lenyena, <<Keti apa ltung'ani parakuoni oata laramatani, neitari ilo aramatani kusaka tankaraki keichirkalie ntokitin e lkitok lenye.

²Neipot ninye nejoki, <Kaa bae ana naning'ito nikimpirita iyie? Nchooki siana ee ntokitin niramatita amu mintoki ara laramatani loo ntokitin ainien.>

³Nejo ilo aramatani ta ltau lenye, <Nyo aas nanu taata? Amu, kaaworu nanu lkitok lai ramat ee ntokitin enyena namaata ngolon naturuchere, naa kore sii tanasaicho, naanya anyit.

⁴Kayielo nalo aas payie aaitoomon ꞉ltung'ana taa nkajijik enche nkata naaitaini tana ramat.>

⁵Neipotu lolo oaata silen e lkitok lenye ma obo obo nejoki lekue, <Amaa, kewuaa sile niata e lkitok lai?>

⁶Nejo, <Ltoii ip nabo[39] le lata.> Nejoki, <Nko mpalai naigerore sile ino, towuana, tesioki, ngero onom.>

⁷Neitoki ajoki likae, <Oo iyie, kewuaa sile niata?> Nejoki, <Lbenia ip nabo sapuki oobore le nkano[40].> Nejoki ninye, <Nko mpalai naigerore sile ino, ngero ntomoni isiet.>

⁸Kore ilo kitok, nerrep ilo aramatani oitamaaicho tankaraki njartano enye. Amu kore ltung'ana le nkop, naa keijartani too ltung'ana le mpukunoto enche aalang nkera e wong'an.

⁹Naa kajoki naa ntae, entaki ate sotuatin ta parakuoicho e nkop, paa tenelai, neitoomoni ntae taa manyichon naabik ntarasi.

¹⁰<<Kore loisiligai te nkini naa keisiligai abaki te nkitok. Kore lemeisiligai te nkini naa meisiligai abaki te nkitok.

¹¹Neaku naa, teneitu iakuku ntae looisiligai ta parakuoicho e nkop, ng'ae oisiligie ntae parakuoicho nadede?

¹²Naa teneitu iakuku looisiligai too ntokitin ee lkulie, ng'ae naa oicho ntae nenia naara nkuninchi?

¹³Meatae laisiaayiani oidim aisiaayia lkutuaa oare. Amu keibai likae nechamu likae, tanaa eibung'are likae nemenu likae. Mindimdim naa aaisiaayia Nkai o parakuoicho e nkop!>>

¹⁴Kore einining'ito ꞉Lparisayo pooki oaacham ropiyiani kuna, neikordod Yeso.

¹⁵Nejoki ꞉Yeso, <<Ntae naa ake ooitoduaaya ate aaitaakino loosipat tekue ltung'ana, kake keyielo Nkai ltauja linchi, amu kore nailiepie ltung'ana naa ntaboi tekue nkonyek e Nkai.

¹⁶<<Kore nkitanapat o loibonok le Nkai naa ketii apake metabaki Yoana Laipatisani. Naa kore ang'asu inia ng'amata, nelikori Lomon Supati le nkitoria e Nkai. Kore inia kitoria e Nkai, naa kenyok pooki ng'ae ajing to ngolon.

¹⁷Kelelek payie eich loing'ang'e o nkop alang ltipoti obo loo nkitanapat.

¹⁸<<Kore pooki ng'ae oar nkauti e mparratut enye neyem nkae, naa keas loloito, naa kore ilo oyem mparratut natara ꞉likae nkauti, naa ketaasa loloito.

¹⁹<<Keatae apa ltung'ani obo parakuoni oichop nankan naagol nkinyang'a, mugie o naibor, neng'ida mperot pooki enya rraa e nkop.

²⁰Neiteperoki to nkutuk e nkaji enye laisinani obo oji nkarna Lasaro, oata ng'oldonyot kumo te sesen.

²¹Neng'uar ninye eyieu nenya lpisia oodoyio te nkeper e misa e ilo parakuoni. Naa kepuonu abaki ldein aamej ng'oldonyot enyena.

²²Kore tesiedi neye ilo aisinani, neya ꞉lmalaikani aailiepie metowuana to lgoo le Abraam. Neitoki sii ele parakuoni aye, nenukari.

²³Kore etii nemeneng'a eata mion e lkiye, neapaa nkonyek enyena, nedol Abraam elakua ewuon Lasaro to lgoo lenye.

²⁴Nebuak ajo, <Ooi! Papa lai Abraam, ng'erruaaki, tereu Lasaro meitodoki nkue e lkumojino lenye nkare naaitong'oki maairopijie lng'ejep lai! Amu kore taatua ele ng'ejep le nkima naa kaanyeita ꞉mion oleng.>

²⁵Kake nejoki ꞉Abraam ninye, <Nkerai ai, taparru tejo itumo apa iyie ntokitin supati te nkichon ino. Kake ketumo Lasaro sinaitin, naa keitigiritae ninye taata tene, niata iyie mion.

²⁶Kore aitoki, ketipikaki terichet iyioo o ntae ng'erem naado, metaa kore lolo ooyieu nelang'u nitii ntae, nemetumoki. Nemelang'u sii lolo ootii nitii, nikitii iyioo.>

²⁷Nejoki ilo parakuoni ninye, <Papa lai, kore tankaraki kaata lalachera imiet, kaasai terewa Lasaro nkang e papa lai,

²⁸metiliki ninche meibelekenyata, payie mepuonu aadoki ene ng'oji e mion.>

²⁹Nejoki ꞉Abraam, <Keata ꞉ninche Musa o loibonok le Nkai, nchoo metining'o ninche.>

³⁰Nejo, <Papa lai Abraam, mara nejia, kake kore tenelo ltung'ani oing'uaa nemeneng'a neti ninche, naa keirriidu.>

³¹Nejoki, <Tenemening Musa o loibonok le Nkai, meiruk abaki tenepiu ltung'ani eing'uaa nemeneng'a.> >>