Read Samburu Luka 17 Bible Online

Luka 17 - Samburu bible

Luka 17

¹Neitoki Yeso ajoki looiteng'eni lenyena, <<Meata hoo nchere ajo mepuonu mbaa naaitopong'oricho. Kake ooi siake ilo oaku ninye eing'uaa.

²Keikach teneenikini murt enye soit sapuk dapach oidong'ieki nkano, nenang'akini mpaso alang teneitopong'oo nabo ee kuna kunini[41] metaasa ng'oki.

³Naaku naa errita ate. <<Kore teneas lalache lino ng'oki, tukusakana aing'ode, naa teneirriidu tapaliki.

⁴Naa Tinikintarruoki ninye nkatitin sapa ta mparri, nechukunyie nitii nkatitin sapa kijoki, <Airriidua tapalikaaki!> Tapaliki ninye.>>

⁵Nejoki ꞉Lkipaareta Laitoriani, <<Toponiki iyioo nkurukoto!>>

⁶Nejoki ꞉Laitoriani, <<Tiniatata nkurukoto nawuana lantararai kini[42], indimdim nijokiki ele reteti, <Mikitodotuni, nikiuni ta mpaso>, nening ntae.

⁷<<Amaa, ng'ae taa ntae oata laisiaayiani otur lchampa, tanaa loirrita nkerra, aa kore tenebau eing'uaa lchampa nejoki, <Wou tesieku towuana tama ndaa!>?

⁸Mara kejoki ninye, <Ntibirakaaki ndaa, nirretena, nikisiaai ana maidipa ndaa o ntoki namat. Naa kore tanaidip, ninya sii iyie, nimat ntoki?>

⁹Mara merrinyoki ꞉ninye ilo aisiaayiani nache, amu ketaasa natiakaki?

¹⁰Nejia sii itiuu ntae, kore payie indipdip aataas pooki natiakaki ntae nijoijo, <Ikira iyioo laisiaayiak lemeata tipat. Ikitaasa ake nayieuni payie ikias.> >>

¹¹Kore eimita Yeso nkoitiei alo Yerusalem, neimaa Samaria o Galilaya.

¹²Kore payie ejing nkang nabo, nenang'are ꞉lewa tomon oaata nkeeya ee lbolot, neitachoo tanalakua.

¹³Nebuak ninche oleng aajo, <<Ooi! Yeso, Lkitok, ng'urrie iyioo!>>

¹⁴Kore payie edol ninche nejoki, <<Enchom entoduaai ate taa laitainok la lasar!>> Kore epuoito, neidoso.

¹⁵Kore naa lobo lenche, kore payie edol ajo keichiwua, nechukunyie eisis Nkai to ltoilo sapuk.

¹⁶Neirrabalakino nkop tekue nkejek e Yeso, arrinyoki nache. Kore ninye, naa loo Samaria.

¹⁷Newoliki ꞉Yeso ajoki, <<Amaa, eitu duo eichiunyieki lolo pukura tomon meidosoto? Koree naa lkulie saal?

¹⁸Aaku meatae hooyia lobo lenche ochukunyie duaake aisis Nkai, mara ake ele tung'ani apeny le likae orere?>>

¹⁹Nejoki ninye, <<Inyuo chomo, /ikinchiunyie naa nkurukoto ino.>>

²⁰Kore mparri nabo neipar ninye ꞉Lparisayo nkata nalotu nkitoria e Nkai. Nejoki, <<Melotu nkitoria e Nkai te nkitodolunoto nalio,

²¹namara naji, <Ng'ura, ketii ene>, tanaa <Idie>, amu kore nkitoria e Nkai naa atua ntae etii.>>

²²Nejoki looiteng'eni lenyena, <<Kore naa kenya kelotu ng'amata ning'uarrng'uar payie idoldol mparri nabo e Nkerai e ltung'ani, nimidoldol.

²³Naa kejokini kenya ntae, <Ketii idie!> anaa <Ketii ene!> Eminyuototo aapuo, nimirukurukorere ninche.

²⁴Amu kore ana netiu nkiwuang'ata naitoong mbat pooki e loing'ang'e, naa nejia kenya etiu lotunoto e Nkerai e ltung'ani ta mparri enye.

²⁵Kake meata aajo metum mion kitok tekue, neany ꞉ltung'ana le ana kuarie ninye.

²⁶Naa kore ana netiu apake tee mperot e Noa, naa nejia sii etiu tee mperot e Nkerai e ltung'ani.

²⁷Kenyaita apake ltung'ana ndaa, nematicho, neyemicho, neyemi, ana metabau inia parri natijing'a Noa atua sapina. Nelotu nkare sapuk, nemut ltung'ana pooki.

²⁸Nejia sii apa etiu too mperot e Lot, kenyaita apake ltung'ana ndaa nematicho, neinyiang'icho, nemiricho, neunicho, necheticho.

²⁹Kake kore mparri naipung Lot aing'uaa Sodom, nebukunyie nkima ee soito ooilu te chumata, nemut ltung'ana pooki.

³⁰Naa nejia etiu kenya ta mparri naibalunyieki Nkerai e ltung'ani.

³¹Kore kenya te inia parri lotii nkeper e nkaji, medou aya masaa enyena naatii atua! Nejia sii etiu lotii lchampa, merrinyo siedi aya ntoki!

³²Entaparru nkitok e Lot!

³³Kore loyieu neirrita nkichui enye, naa keiminie, naa kore loiminie, neirrita.

³⁴Kajoki ntae, kore te inia kuarie kenya, kore ltung'ana oare ooperi to rruat nabo, naa keyae[43] lobo neing'uari likae.

³⁵Netii ntomonok are naaidong'ito nkano tenebo, naa keyae nabo neing'uari nkae.>>[44]

³⁷Neipar ꞉looiteng'eni lenyena aajoki, <<Laitoriani, taaji?>> Nejoki, <<Kore neti lpopok, naa inie eiturrurrokino sakerin.>>