Read Samburu Luka 18 Bible Online

Luka 18 - Samburu bible

Luka 18

¹Kore mparri nabo, neliki ꞉Yeso ninche nkitanyanyukoto ajoki keiririkino payie eomon nkata pooki, nemeinauru.

²Nejoki, <<Kore apa te lkerenket obo, naa keatae ladung'oni le nkiguana, lemeurie Nkai, nemeiken abaki ltung'ana.

³Naa kore aitoki te ilo kerenket, neatae nkoiliai nalotu mparri pooki neti ninye aichiraki ajoki, <Timituaki siake tele mang'antita lai, nikincho inia naaichiaakino nanu.>

⁴Neany ta nkata naado. Kake neitoki ajo ta ltau lenye, <Kore abaki maurie Nkai, namaikenu sii ltung'ani, kake kore amu kaainaurie ana oiliai, kaicho inia naaichiaakino ninye, paa maaitoki aitipipi tana lotunoto enye.> >>

⁶Nejoki ꞉Laitoriani, <<Entining nejoito ilo adung'oni torno le nkiguana.

⁷Oo sa Nkai! Meicho sipat lgelunot lenyena, ooichiraki kuarie o parkiji? Mara meimalimalie reto tee ninche?

⁸Kajoki ntae, kesioki aicho ninche sipat. Kake, amaa tenelotu Nkerai e ltung'ani, keirrachu sa nkurukoto to nkop?>>

⁹Neliki aitoki Yeso ana kitanyanyukoto lkulie tung'ana oiken ate aajo kera loosipat, nemen lkulikae. Nejoki,

¹⁰<<Echomo apa ltung'ana oare, aailiepaki nkaji e Nkai aaomon. Kore lobo naa Lparisayoi, nera likae laitalakunoni le kodi.

¹¹Neitache Lparisayoi aomon Nkai makoon ajo nchi, <Nkai, kaarrinyoki nache amu matuwuana ana lkulikae tung'ana, ooisimicho, lemeata sipat, oaas loloito, anaa sii ootuwuana ele aitalakunoni le kodi.

¹²Kaen nkutuk nkatitin are to uki nabo, naitai motua e tomon ai to pooki natum.>

¹³Kake kore laitalakunoni le kodi, neitache elakua. Nemeapu abaki nkonyek enyena aing'or chumata, kake neoch koon lgoo ajo, <Nkai, ng'urrieeki nanu amu kara ltung'ani loo ng'ok!>

¹⁴Kajoki ntae, kore ele aitalakunoni le kodi naa ketodoyie alo nkaji enye eikenakaki sipat tekue Nkai, kake nemeikenakini laduo Lparisayoi. Amu kore pooki ng'ae oiliepie koon neitodouni, naa kore loitodou koon neiliepieki.>>

¹⁵Neyaki sii ꞉ltung'ana Yeso nkera kunini meiteleki nkaik. Naa kore payie edol ꞉looiteng'eni lenyena ana, nekusakan aaing'ode ninche.

¹⁶Kake neipotu ꞉Yeso ninche meotu netii nejoki, <<Enchoo nkera meotu natii! Emimbooyo, amu kore nkitoria e Nkai naa noo ltung'ana ootuwuana nkera.

¹⁷Kedede kajoki ntae, kore lemeng'amaa nkitoria e Nkai tana nkerai kini, naa mejing katukul.>>

¹⁸Neipar ltung'ani obo kitok Yeso ajoki, <<Laiteng'enani supat, kaa aas payie ajung nkichon ee ntarasi?>>

¹⁹Nejoki ꞉Yeso, <<Aanyo payie kimpot ajo supat? Meatae hoo supat mara Nkai apeny.

²⁰Iyielo nkitanapat, <Miloloito, miar metua, mipurrucho, minteeniki likae sapare, ianyita papa lino o ng'utunyi.> >>

²¹Nejo, <<Kore kuna pooki naa kaibung'a ang'asu te keraicho ai.>>

²²Kore payie ening Yeso ana nejoki, <<Ewuon king'oriki ntoki nabo! Timira ntoki pooki niata, nioriki laisinak, naa itum iyie parakuoicho te chumata. Nikilotu taa aairukurukore!>>

²³Kake kore payie ening ana, neiputukuny oleng, amu kera apa parakuoni oleng.

²⁴Kore payie edol Yeso ajo keiputukunyuo ilo parakuoni nejo, <<Kebaa sa egol njing'ata e nkitoria e Nkai ta lparakuoni!

²⁵Amu elelek ta ntames teneim udoto e ltudu alang tenejing lparakuoni nkitoria e Nkai.>>

²⁶Kore lootining'o nejo, <<Naa ng'ae sa oidim nejeu?>>

²⁷Nejoki ꞉Yeso, <<Kore nemeidimai too ltung'ana naa keidimai ta Nkai.>>

²⁸Nejoki ꞉Petero, <<Ng'ura ja, ikitung'aitie iyioo ntokitin ang pooki nikipuonu aairukurukore iyie.>>

²⁹Nejoki ninche, <<Kedede kajoki ntae, meatae ltung'ani otung'ayie nkang enye, tanaa mparratut enye, tanaa lalachera o nkanachera, tanaa ntoiwuo, tanaa nkera, tankaraki nkitoria e Nkai,

³⁰lemeng'amaa nkatitin kumo taatua ana ng'amata alang natung'ayie apa. Naa kore aitoki ta ng'amata nalotu, neng'amaa nkichon ee ntarasi.>>

³¹Neiwuang'ie ꞉Yeso loochi ooiteng'eni tomon o oare nejoki, <<Ikiliepita aapuo Yerusalem, naa kore naa mbaa pooki naaigero loibonok le Nkai, naaipirita Nkerai e ltung'ani naa keitabari.

³²Amu kepiki ninye nkaik ee loreren, nesuji, nedeki, nenatakini nkamlak.

³³Naa keidong ꞉ninche ninye te liche, near metua, kake kore ta mparri e uni, nepiu.>>

³⁴Naa eitu eyielou ninche hoo toki too kuna baa. Amu keisudoyieki kipirte ee kuna baa tee ninche, neitu ening'u inia najoito ninye.

³⁵Kore eloito Yeso anyikaki Yeriko, naa keatae apa ltung'ani modooni owuonita tabata nkoitiei asaicho.

³⁶Kore payie ening ltung'ana kumo ooimita inie, neiparu ajo, <<Nyo dei inia?>>

³⁷Nejokini, <<Yeso le Nasaret oimita ene.>>

³⁸Nebuak ajo, <<Yeso, Layieni le Daudi, ng'erruaaki nanu!>>

³⁹Naa kore lolo ooiturukuto tekue, nekusakan aaing'ode, nejoki metigirai, kake nebuak ninye oleng ajo, <<Yeso, Layieni le Daudi, ng'erruaaki.>>

⁴⁰Neitache Yeso, neitanap ninche metiriku netii. Kore payie enyiku neipar ajoki,

⁴¹<<Nyo iyieu naaitaas?>> Nejoki, <<Laitoriani, Kayieu nadolichoi.>>

⁴²Nejoki ꞉Yeso ninye, <<Todolichoi! /Ikinchiunyie nkurukoto ino.>>

⁴³Nedolichoi ninye nabokata, neirukurukore Yeso errep Nkai. Kore ltung'ana pooki ootoduaa inia, nerrep Nkai.