Read Samburu Luka 19 Bible Online

Luka 19 - Samburu bible

Luka 19

²Netii apa ltung'ani oji nkarna Sakayo. Kore ninye naa lkitok laa laitalakunok le kodi, nera sii parakuoni.

³Naa keyieita apa ninye mpaach, nadolie Yeso payie eyielou ajo ng'ae ninye, kake kore tankaraki lturrur nera ninye dorrop, nelakino.

⁴Nekuet alo tekue, nedir lng'aboli payie etum atoduaa Yeso, amu kelotu aimu inie.

⁵Kore payie ebaki Yeso inie ng'oji, neimariri nejoki, <<Sakayo, tesieku todou amu kore anapar naa meata ajo malo awuon ta nkaji ino!>>

⁶Nesieku ninye adou, neitoomon Yeso te ng'ida.

⁷Kore payie edol pooki ana, neing'unyung'uny aajo, <<Echomo aaku lomoni lo ltung'ani loo ng'ok.>>

⁸Neinyuototo Sakayo, nejoki Laitoriani, <<Laitoriani, tining'o naa ana! Kaor ntokitin ainien aitiris, naicho laisinak. Naa kore tanaa katoorua ltung'ani ntoki enye to nkoitiei alani, karrinyoki nkatitin ong'uan.>>

⁹Nejo ꞉Yeso, <<Kore ana parri naa eyewuo njeunoto ana aji! Tankaraki kore sii ninye naa kera nkerai e Abraam.[45]

¹⁰Amu kore Nkerai e ltung'ani, naa keyewuo ayiaya neitejeu looimina.>>

¹¹Kore einining'ito ꞉ltung'ana nenia baa, neitoki Yeso aliki nkitanyanyukoto amu ketinyikaka ninye Yerusalem. Naa tankaraki kejo sii ninche ketinyikua payie elotu nkitoria e Nkai nabokata.

¹²Nejoki, <<Echomo apa ltung'ani oje le nkang natumieki lkinkii nkop nalakua, meitaae lkinkii pee echukunye.[46]

¹³Neipot laisiaayiak tomon lenyena, meata leitu eicho enata nabo ee ropiyiani. Nejoki, <Entimiricho, ninyang'icherere kuna ropiyiani ana matuchukunyie.>

¹⁴Kake kore apa ltung'ana le nkop enche naa keiba ninye. Nereu ꞉ninche lpayiani meewaita lkilikuai aaijiparie ejo, <Mikiyieu neitore iyioo ele tung'ani.>

¹⁵Kore payie echukunye etumo nkitoria, nejo meipoti lolo aisiaayiak ooichoo apa ropiyiani, meteyielo dikir natumie nenia ropiyiani.

¹⁶Kore laisiaayiani lekue nelotu nejoki, <Lkitok lai! Etoponunye enata ee ropiyiani nikinchoo nkatitin tomon.>

¹⁷Nejoki ilo kitok, <Intibira taa, laisiaayiani supat! Naa kore amu itaa loisiligai abaki te nkini nemeiput ndap, taa lkitok loo lkerenketi tomon.>

¹⁸Nelotu sii le oare nejoki, <Lkitok lai! Etoponunye enata ee ropiyiani nikinchoo nkatitin imiet.>

¹⁹Nejoki ilo, <Ntoria sii iyie lkerenketi imiet!>

²⁰Neitoki likae alotu nejoki, <Lkitok lai! Nana enata e ropiyiani nikinchoo, naiteng'ela apa ta nanka.

²¹Amu kore tankaraki ira ltung'ani ogol mpukunoto, kaaurie! Iya iyie ropiyiani neitu inteng'el, nidung sii lchampai leitu iun.>

²²Nejoki ninye, <Kore taa iyie, ele aisiaayiani torno! Kaaiguanare te rerei le nkutuk ino, amu kiteyielo apa ajo ltung'ani ogol mpukunoto ara, naya ropiyiani neitu aiteng'el, nadung lchampai leitu aun.

²³Naa aanyo payie eitu ipik ropiyiani ainien netumie dikir, metaa kore tanalotu natum tenebo o dikir enche?>

²⁴Nejoki ltung'ana oonyikita, <Entooru ninye inia enata ee ropiyiani, ninchocho elde oata enat tomon ee ropiyiani.>

²⁵Nejoki ꞉ninche, <Lkitok lang, keata dei ninye nkulie enat tomon ee ropiyiani.>

²⁶Nejoki, <Kajoki ntae kore pooki oata ntoki neichori, kake kore ilo lemeata, neoruni abaki naata.

²⁷Kake kore lolo mang'ati lainien lemeyieu naitore eyautu ene, niarrar tekue nanu metuata.> >>

²⁸Kore payie eidip Yeso atejo ana, neituruk ailiep alo Yerusalem.

²⁹Naa kore payie enyikaki Betepage o Betania nkalo lowua oji Lowua loo Lng'erriyio, neipaaya looiteng'eni lenyena oare,

³⁰ajoki <<Enchom nkang natii idia bata, naa kore piijing'jing atua nitumtum lkurrarru oena leitu hoo aikata eirot ꞉ltung'ani. Entalaku niyauu ene!

³¹Naa kore teneipar ntae ltung'ani ajoki, <Aanyo payie ilakuku?> entejo nchi, <Laitoriani oyieu.> >>

³²Nepuo lolo ooipaayieki, netum ake ana natiaka ninche.

³³Kore elaku ninche ilo kurrarru, neipar ꞉loopeny aajoki, <<Aanyo payie ilakuku lkurrarru?>>

³⁴Nejoki, <<Laitoriani oyieu.>>

³⁵Nerikoki ꞉ninche Yeso, neiteleki nankan enche nkeper e lkurrarru, neitidir Yeso.

³⁶Kore eloito, neisalaachaki ltung'ana nankan enche nkoitiei.

³⁷Kore payie enyikaki neituto to Lowua loo Lng'erriyio, neng'asu lturrur pooki loo looiteng'eni aarrep Nkai te ng'ida, to ltoilo kitok tankaraki mbaa kumo e ngolon naatoduaa

³⁸ejo, <<Emayiana lkinkii, ilo olotu ta nkarna e Laitoriani!>> <<Seriani te chumata o nkisisa te idie te keper!>>

³⁹Kore lbata loo Lparisayo, ootii atua ilo turrur nejoki, <<Laiteng'enani, ng'odia tukusakana looiteng'eni linono!>>

⁴⁰Newoliki ajoki, <<Kajoki ntae, kore tenegira ninche, nebuak soito aisis.>>

⁴¹Kore naa payie enyikaki ꞉Yeso Yerusalem, nedol neichiraki

⁴²ejo, <<Ooi siake, tanaa iteyielo abaki iyie anapar ntokitin nikiyaki seriani! Kake keisudoyieki taata too nkonyek inono.

⁴³Amu kepuonu kenya mperot, naapuonunyie lmang'ati linono, nechet wuata ee nkeek, naa ikimuatu, nikipunyaki taa mbat pooki.

⁴⁴Nikinang'ie nkop o nkera inono naatii atua, naa meing'uari hoo soit obo eitelikino likae, tankaraki eitu iyielou nkata niking'errunyie Nkai.>>

⁴⁵Kore payie ejing ꞉Yeso nkaji e Nkai, neng'asu amiraa ltung'ana oomiricho

⁴⁶nejo, <<Keigeroki aajo, <Kore nkaji ai naa nkaji e nkomono>, kake intaaita ntae nkapune ee lapurrok!>>

⁴⁷Neiteng'enicho mperot pooki ta nkaji e Nkai. Kake, kore lkutuaa laa laitainok la lasar o laiteng'enak loo nkitanapat, o lkulie tung'ana kutuaa, neyiaya nkoitiei naarie ninye metua.

⁴⁸Kake nelau ntoki naas, amu ketuuro ltung'ana nkiyiaa aainining ninye.