Read Samburu Luka 2 Bible Online

Luka 2 - Samburu bible

Luka 2

¹Kore tee nenia perot, neipung'u nkitanapata naing'uaa Kaisari[2] oji Agosito, ejo meigeri nkarn ee ltung'ana pooki le nkop pooki naitore Rroman.

²Naa ana apa nkigerore ekue, era Kirinio lkitok le nkop e Siria.

³Nelo ltung'ani pooki lkerenket lenye meigeri nkarn.

⁴Kore Yosep, neinyuototo te lkerenket le Nasaret otii Galilaya ailiep alo Yudea, nelo Beteleem lkerenket le Daudi. Amu kera apa ninye lo ltim, nera aitoki le ntalipa e Daudi.

⁵Nelo meigeri nkarna tenebo o Maria, inia apa natasayia, neirochio apa ninye inia kata.

⁶Kore etii ninche inie, nebau nkata najing Maria aji.

⁷Neiu nkayieni lkikau lenye neimulumulakini nkilani e keraicho, nepik atua nkarao nati boo ee nkichu, amu ketala apa ninche neperie taatua nkaji ee lomon.

⁸Kore apa te inia kop, naa ketii lchekuti oowueni aarrip mbooitie enche kuarie taa ang'ata.

⁹Neipung'oki ꞉lmalaika la Laitoriani, newong'aki ꞉wong'an e nkitoo e Laitoriani taa mbat pooki, neiputukuny oleng.

¹⁰Nejoki ꞉lmalaika, <<Emimputukuny! Amu eng'ura, ayaka ntae lomon supati le ng'ida sapuk, naaku too ltung'ana pooki.

¹¹Amu kore ana parri te lkerenket le Daudi, etiikaki ntae laitejeunoni, naa ninye Kristo[3] Laitoriani.

¹²Naa ana nkitodolunoto taa ntae: Itumtum nkerai kini naimulumulakino nkilani e keraicho, eperito taatua nkarao nati boo ee nkichu.>>

¹³Kore ake inia kata, nejo pang njore kitok ee lmalaikani le chumata. Neisis Nkai tenebo o ilo malaika aajo,

¹⁴<<Meisisi Nkai te idie te keper, neaku sotua to nkop, too ltung'ana oichoo ꞉Nkai omom enye.>>

¹⁵Kore payie errinyo lmalaikani aapuo chumata, nejokino lchekuti, <<Enyuoto ja maapetin aabaya Beteleem, aadol ana bae nataase natilika iyioo Laitoriani.>>

¹⁶Neinyuototo aapuo aasiooyo, neiniapu Maria o Yosep o nkerai, eperito nkerai ta nkarao.

¹⁷Kore payie edol, nelikoo lomon ootiakaki apa ooipirita inia kerai.

¹⁸Neing'asia pooki ng'ae otining'o lomon ootilimutua ꞉lchekuti.

¹⁹Kake kore Maria nenap kuna baa pooki eparraa ta ltau lenye.

²⁰Nerrinyo lolo chekuti, eisisita, nerrepita Nkai taa mbaa pooki naatining'o o naatoduaa. Naa nejia apake etiu ana natiakaki ninche.

²¹Kore payie ebaki mparri e isiet namuratieki inia kerai, neichori nkarna naji Yeso, nkarna naichoo apa ꞉lmalaika ewuon eitu enutai ng'otonye ninye.

²²Kore payie ebau nkata e nkitorropiloto enche ana netiu tee nkitanapat e Musa[4], neya ntoiwuo enyena Yeso Yerusalem aayaki Laitoriani,

²³ana naigero tee nkitanapat e Laitoriani nchere, <<Kore lkikau pooki, neipoti aajo sinyati ta Laitoriani.>> [5]

²⁴Neitai sii lasar ana inia apa natejoki tee nkitanapat e Laitoriani, payie eitaini <<nkutukurruki are anaa nkuoo are e ndapdap.>>

²⁵Eti apa Yerusalem ltung'ani oji nkarna enye Simion, nera ltung'ani loosipat neurie Nkai. Neanyuta payie eitogoli ltauja loo ltung'ana le Isirael, netii Ltau Sinyati tenebo o ninye.

²⁶Neibalakinyie ninye ꞉Ltau Sinyati nchere, meye ewuon eitu edol Kristo la Laitoriani.

²⁷Nelotu ninye nkaji e Nkai erikoo ꞉Ltau Sinyati. Kore payie eyau ꞉ntoiwuo inia kerai enche naji Yeso atua nkaji e Nkai aaimie lkerreti ana nayieu lkerreti loo nkitanapat e Musa,

²⁸neng'amaa ninye taa nkaik enyena neisis Nkai ejo,

²⁹<<Laitoriani, keidim taata laisiaayiani lino atepero te seriani ana nitejo apa.

³⁰Amu kore nkonyek ainien, naa ketodua ilo literewua meitejeu iyioo,

³¹lintibira tekue nkonyek ee ltung'ana pooki,

³²inia wong'an nimbalunyie too loreren pooki, o nkisisa too ltung'ana linono le Isirael.>>

³³Kore menye o ng'otonye, neing'asia tee nenia baa naatiakaki ninche naaipirita ninye.

³⁴Nemayian ꞉Simion ninche, nejoki Maria ng'otonye inia kerai, <<Ng'ura, kegeluno ana kerai paa kore ninye, neaku lorriare anaa loiliepunyie lkumo te Isirael, neaku nkitodolunoto natanyaki naing'uaa Nkai.

³⁵Paa kore mparrunot ee ltauja kumo, neibalunyieki, nikirem lalem opi ltau lino.>>

³⁶Keatae sii apa nkaidetidetani naji Ana, ntito e Panuel e lmarei le Acha. Kore apa ninye, naa keata larin kumo. Keyemaki apa ewuon eitu apake eboitiere lee, neboita o lpayian lenye larin sapa.

³⁷Neye lpayian[6] newuon era nkoiliai larin 84 meipung'u taatua nkaji e Nkai, esai Nkai kuarie o parkiji een nkutuk aomon.

³⁸Nenyikaki ninche inia kata nerrinyoki Nkai nache, neiro mbaa naipirita inia kerai too pooki oaanyuta lakunoto e Yerusalem.

³⁹Kaa hae, kore payie eidip ninche aataas ana nayieu nkitanapat e Laitoriani, nechuko aapuo mbata e Galilaya lkerenket lenche oji Nasaret.

⁴⁰Kore inia kerai, nebulaa, neiput ngolon, neboreii ng'eno, netii munyani e Nkai tenebo o ninye.

⁴¹Kore apa ntoiwuo e Yeso, naa kepuo ng'amata nabo ta lari Yerusalem aanya ntasim e Pasaka.

⁴²Kore eata Yeso larin 12, neiliep aapuo inia tasim ana netiu te lkerreti.

⁴³Kore errinyo ninche aapuo nkang'ite eidipe ntasim, neisiadu layieni Yeso te Yerusalem, neitu eyielou ntoiwuo enyena aajo ketowuana.

⁴⁴Naa kore amu ketejo ninche kebaki naa ketii atua lturrur oloito, nepuo memuto neng'asu aayiaya taatua ltung'ana lenche o too sotuatin lenche.

⁴⁵Kore payie elau ninye, nerrinyo aapuo Yerusalem aayiaya.

⁴⁶Netumi eima mperot uni ta nkaji e Nkai, ewuon taatua laiteng'enak loo nkitanapat einining ꞉ninye ninche, neiparichiere.

⁴⁷Kore lolo pooki oinining'o ninye, neing'asia te ng'eno o woleta enyena.

⁴⁸Kore payie edol ꞉ntoiwuo enyena neing'asia. Nejoki ꞉ng'otonye ninye, <<Nkerai ai, aanyo payie inkonyi iyioo? Ng'ura, kore papa lino o nanu naa ikiteyiaitie iyie kiata ldukuman.>>

⁴⁹Nejoki ꞉Yeso ninche, <<Aanyo payie kiyiayaya? Miyielolo ntae aajo meata ajo payie mati nkaji e Papa lai?>>

⁵⁰Kake eitu eyielou ninche inia natiaka.

⁵¹Nerrinyo Yeso tenebo o ninche adoyio alo ana metabaki Nasaret. Neicho ninche nkanyit, nepik ng'otonye lolo omon pooki ltau lenye.

⁵²Neponari Yeso te ng'eno, nebulu te sesen, netum omom ta Nkai o too ltung'ana.