Read Samburu Luka 20 Bible Online

Luka 20 - Samburu bible

Luka 20

¹Kore mparri nabo eiteng'enita ltung'ana nelikoo Lomon Supati ta nkaji e Nkai, nepuonu lkutuaa laa laitainok la lasar o laiteng'enak loo nkitanapat tenebo o lpayiani,

²neiparichiere aajoki, <<Tiliki naa iyioo ajo taa kitoria iasita kuna baa, tanaa ng'ae likinchoo ana kitoria?>>

³Newoliki ajoki, <<Kaipar sii nanu ntae nkipara nabo. Entilikaaki ja,

⁴amaa nkipatisare e Yoana, chumata apa eing'uaa ana ltung'ana?>>

⁵Neipara maate ejokino, <<Kore tinikijo, <Chumata eing'uaa>, naa kejoki iyioo, <Oo payie eitu irukuruk ninye?>

⁶Naa tinikijo, <Ltung'ana eing'uaa>, nenang iyioo kulo tung'ana pooki aar too soito[47], amu keata sipata aajo, kore Yoana naa loiboni le Nkai.>>

⁷Newoliki aajoki, mikiyielo neing'uaa.

⁸Nejoki naa ꞉Yeso ninche, <<Namaliki abaki nanu ntae ajo, taa kitoria aas kuna baa.>>

⁹Neng'asu Yeso aliki ltung'ana ana kitanyanyukoto: <<Etuuno apa ltung'ani obo lchampa lo lmusabibu[48], neing'uaki laturok metaasa siaai, nechamaa lolo aturok aajo keicho ninye orati ee lng'anayio, nelo aing'uaa inia kop ta ng'amata naado.

¹⁰Kore payie ebau nkata nadung'ieki lmusabibu, nereu laisiaayiani lenye netii laturok payie eicho orati ee lng'anayio la lchampa lo lmusabibu. Kake neidong lolo aturok ninye, nemiraa taa nkaik naarok.

¹¹Neitoki areu likae aisiaayiani, kake kore sii aitoki ilo, neidong ꞉ninche, neitam anyit, nemiraa taa nkaik naarok.

¹²Neitoki areu le okuni, nepik ninye lbae, nenang'aki aulo.

¹³Nejo naa lopeny lchampa lo lmusabibu, <Kaa aas? Kareu naa nkerai ai nacham, kebaki neanyit ninye.>

¹⁴Kake kore payie edol laturok ninye, nejokino maate, <Ele taa lajung'oni. Matar ninye payie eaku njung'ore naang!>

¹⁵Nenang'aki ninye aulo e lchampa, near metua. <<Amaa sa, kaa eitaas ꞉lopeny lchampa ninche?

¹⁶Kelotu, naa kemut lolo aturok, kore ilo champa loo lmusabibu neicho lkulie.>> Kore payie ening ltung'ana inia nejo, <<Taba! Ooi measai ana!>>

¹⁷Neing'or ninche nejoki, <<Nyo naa kipirte ele rerei oigero ojo, <Kore soit oatanya lachetak, ninye oataa soit le tipat oirichiu nkaji?[49]>

¹⁸<<Kore pooki ng'ae orriaakino nkeper e ilo soit, negiligila aorooro, naa kore ilo tung'ani osulakino neikaskas.>>

¹⁹Kore laiteng'enak loo nkitanapat o lkutuaa laa laitainok la lasar, neyiaya aibung ninye inia kata tankaraki keyielo aajo, kore ana kitanyanyukoto naa ninche eipirita. Kake neuriei ltung'ana.

²⁰Neleen ꞉ninche Yeso, nereu laikitalak ooitaakinete keisupati, payie etum aaibung'ie ninye lomon oojo, nepiki nkaik e lkitok o nkitoria enye.

²¹Neipar ninye ꞉laikitalak aajoki, <<Laiteng'enani ikiyielo aajo kore iyie naa iro ninteng'enicho sipat, nemeata ltung'ani ligelaa kake inteng'enicho nkoitiei e Nkai taa naadede.

²²Amaa, keichiaakino tinikintaki Kaisari kodi ana meichiaakino?>>

²³Kake kore amu keteyielo loseg lenche nejoki,

²⁴<<Entoduaaki dinari. Nkomom o lkigerot le ng'ae ootii?>> Nejoki ꞉ninche, <<Ne Kaisari.>>

²⁵Nejoki, <<Enchoo naa Kaisari ne Kaisari, ninchocho Nkai ne Nkai.>>

²⁶Nelau ꞉ninche naaibung'ie tele rerei otejo tekue ltung'ana, neing'asia to olet enye nejo tau aagira.

²⁷Nepuonu lkulie Sadukayo oojo meatae mpiunoto, neipar Yeso

²⁸aajoki, <<Laiteng'enani, keigeroka apa iyioo Musa ajoki, <Kore teneye ltung'ani oata mparratut meata nkera, neichori inia oiliai meyema lalache lpayian lenye, payie eiiki ilo alache lenye oitienye nkera.>

²⁹Naa keatae apa lalachera sapa. Kore naa lekue, neyemicho, neye meata nkera.

³⁰Neyem le oare inia oiliai. Neitoki le okuni ayem ana metabaki le sapa. Neye pukura sapa aiko nejia, meata nkera.

³¹

³²Kore tesiedi, neye sii inia parratut.

³³Naa amaa kenya te mpiunoto, keaku inia parratut ne ng'ae? Amu keyema ninye lolo payiani pukura sapa!>>

³⁴Nejoki Yeso ninche, <<Kore ltung'ana le ana ng'amata, keyemicho neyemi.

³⁵Kake kore lolo ooikenakaki aajo keichiaakino netum ta ng'amata nalotu mpiunoto ee lootuata, naa meyemi, nemeyemicho.

³⁶Nemeye aitoki, amu ketuwuanai kenya ana lmalaikani. Kore ninche, naa nkera e Nkai amu ketipiutua too lootuata.

³⁷Kake keitodolua abaki Musa too Lkigerot Sinyat ooipirita suur napejori ajo keitipiuni lootuata, teinie payie eiger Laitoriani ajo, <Nkai e Abraam, o Nkai e Isaka o Nkai e Yakobo.>

³⁸Naa mera ninye Nkai ee lootuata, kake Nkai ee looichu, amu te ninye eichu pooki.>>

³⁹Newoliki ninye ꞉lbata laa laiteng'enak loo nkitanapat aajoki, <<Laiteng'enani, itowolo aitibiraki!>>

⁴⁰Neurieii aitoki Eiparichiere.

⁴¹Nejoki ꞉Yeso ninche, <<Aanyo peejo ltung'ana, kore Kristo[50] naa Layieni le Daudi?

⁴²Amu ketejo Daudi koon to mbuku ee Sinkoliotin le Nkai, <Kore Laitoriani naa ketiaka Laitoriani lai, <<Towuana ta mbata ai e tetene,

⁴³ana maichoo lmang'ati linono ndacha murto.>> >

⁴⁴<<Naa keipot ninye ꞉Daudi ajo <Laitoriani.> Aji naa eiko ninye teneaku layieni lenye?>>

⁴⁵Kore ening'ito ltung'ana pooki, nejoki ꞉Yeso looiteng'eni lenyena,

⁴⁶<<Errita ate taa laiteng'enak loo nkitanapat. Kore ninche naa kecham aaisaba eichopito nankan naadoo, necham teneirorokini tee neemirichiereki. Necham sii aatewuenie kue too lorikan supati le Sinagogi o too lorikan lekue laa latimi,

⁴⁷nemut ntokitin taa nkajijik ee nkoilia. Neitoodor nkomono eitaakino, naa kore ninche kedung'okini nkiguana torno oleng.>>