Read Samburu Luka 21 Bible Online

Luka 21 - Samburu bible

Luka 21

¹Kore payie eapu Yeso nkonyek, nedol lgarsisi epik nkichoorot enche atua sanduku loo nkichoorot.

²Nedol ꞉Yeso nkoiliai nabo aitarani, epikita sintii oare

³nejo, <<Kesipa kajoki ntae, kore ana oiliai aitarani, naa keitayia ntoki kitok alang pooki.

⁴Amu, kore kulo pooki naa keitaitua nkichoorot taatua parakuoicho enche. Kake kore ana oiliai aitarani, naa keitayia taatua menai enye ntoki pooki naichiwue ninye.>>

⁵Kore eimakita lkulikae neikunaki nkikodoto e nkaji e Nkai too soito supati, o too nkichorunot naitakaki Nkai nejoki ꞉Yeso,

⁶<<Kore kuna tokitin pooki nidolitata, kepuonu kenya mperot nemeitokini aata soit oitelekino likae lemedotori.>>

⁷Neipar aajoki, <<Laiteng'enani naaku anu easai kuna baa? Naa nyo sa nkitodolunoto naitodolu ajo ketinyikua ng'amata naasai?>>

⁸Nejoki ninche, <<Entodol payie meitopong'ori ntae. Amu kepuonu lkumo ta nkarna ai aajo, <Nanu ilo>, naa, <Ketinyikua nkata.> Emirukurukore ninche!

⁹<<Naa kore tinining'ning mbaa naipirita larrabali o long'olng'oli emiurieicho. Amu meatae aajo measai kuna baa tekue, kake mesieku nkiting'oto e nkop.>>

¹⁰Nejoki aitoki ninche inia kata, <<Keinyuototo locho arare likae ocho, nera nkitoria o nkae nkitoria.

¹¹Naa kepuonu nkikirikirot sapuki nkop, naa kore too lubot pooki e nkop nelotu lameii o nkeyaitin torrok. Nepuonu sii mbaa naaituriaicho o nkitodolunot kutuaa naing'uaa chumata.

¹²<<Kake kore eitu easai kuna baa pooki, naa keibung'i ntae neitami ntae sina. Neibung'i sii ntae aaya Sinagogini o jilai, neyae ntae tekue lkinkii o laitoriak tankaraki nkarna ai.

¹³Neaku inia ng'amata nimbalielie limunot inchi.

¹⁴Kake emidung taa ltauja linchi, aajo aji inkoko tinimititu ate.

¹⁵Amu kaicho nanu ntae rerei liwolielie o ng'eno, paa meata abaki lobo loo lolo oarare ntae oidim aibooi ntae, tanaa oitooliki ntae.

¹⁶Naa kore ntoiwuo inchi o lalachera linchi o lmarei linchi o sotuatin linchi, neichooyo ntae, neri lkulikae taatua ntae.

¹⁷Naa keibai ntae ltung'ana pooki tankaraki nkarna ai,

¹⁸kake meimin hoo ntae lpapita obo le nkue.

¹⁹Kore te ng'iriata inchi naa itumtum nkichon nemeiting.

²⁰<<Kake kore naa tinidoldol Yerusalem emanita ꞉njorin, niyielouu inia kata aajo etinyikua nkata e mutata enye.

²¹Kore inia kata, lootii atua nkop e Yudea, enchoo meisigaki lowuan, kore lootii atua ilo kerenket, neipung aing'uaa, naa kore lootii soro nemejing'u.

²²Amu kore kenya nenia perot, naa keiteme ꞉Nkai ltung'ana tankaraki ng'ok enche, payie ebaya mbaa pooki naaigeroki.

²³Oi siake nenia naatunutete o naaitanakicho tee nenia perot! Amu keatae kenya sina kitok to nkop, naa ketum ngoro e Nkai kitok ltung'ana oaamanya inia kop.

²⁴Kore lolo tung'ana naa kemuti ta lalem, neibung'i, neyae atua lochon. Naa kore Yerusalem near ꞉loreren aaidach, ana meichunye ng'amat ee loreren.

²⁵<<Kore kenya, naa keatae nkitodolunot ta ndama o ta lapa o taa lakir. Kore sii lochon le nkop, naa ketum sinaitin neiputukuny tankaraki nkukurrukurroto o ng'olng'ol e mpaso.

²⁶Neiterriaa ltung'ana to lputukuny o ngureticho ee mbaa naapukoki nkop, amu keikirikiro ngolon ee ntokitin naatii loing'ang'e.

²⁷Naa kore inia kata, nedoluni Nkerai e ltung'ani elotu taatua nkidis to ngolon o nkitoo kitok.

²⁸Kore teneng'asu nenia baa aapuku, enting'idata, nintachoo, niapupu nkuechi inchi, amu ketinyikua lakunoto inchi.>>

²⁹Neliki ꞉Yeso ninche nkitanyanyukoto ajoki, <<Eng'ura lng'aboli o lkeek pooki.

³⁰Laa kore ake payie eyuk, niyielouu nidoldol maate aajo, etinyikua ng'amata e lari.

³¹Naaku naa, kore tinidoldol sii ntae kuna baa easai, enteyielo aajo nkitoria e Nkai.

³²Kedede kajoki ntae, meichunye naa ltung'ana le ana pukunoto eitu easai kuna baa.

³³Kore keper o nkop naa keichunye, kake meichunye rereii lainien.

³⁴Errita ate payie meirraaya ntae luboi o merai o irran e nkichon, metaa kore inia parri nalotu, nemeirrachu ntae aluam mintekiki.

³⁵Amu kelotu too ltung'ana pooki oaamanya nkop pooki.

³⁶Entirripicho nkata pooki, iomonmon, payie indimdim aatapachere nana pooki naapuku, nidimdim aaitacho tekue Nkerai e ltung'ani.>>

³⁷Kore parkiji, neiteng'enicho Yeso ta nkaji e Nkai, nelo kuarie awuon to lowua oji Lowua loo Lng'erriyio.

³⁸Kore ta siran, nerrekunye ltung'ana pooki, aapuonu neti ninye aainining ta nkaji e Nkai.