Read Samburu Luka 22 Bible Online

Luka 22 - Samburu bible

Luka 22

¹Nenyiku ntasim ee mukateni nemeisiichieki naa ninye eitokini aajo Pasaka[51].

²Neyiaya ꞉lkutuaa laa laitainok la lasar o laiteng'enak loo nkitanapat nkoitiei naarie Yeso metua, amu keurie aajo nyo eidim ltung'ana neas.

³Nejing ꞉Chitani Yudas oji Isikariot, oara lobo loo loochi tomon o oare.

⁴Neinyuototo alo neirorie lkutuaa laa laitainok la lasar o lkutuaa loo sikarini le nkaji e Nkai, neiko tenepik Yeso nkaik enche.

⁵Neng'ida ninche, nening'ore payie eicho ropiyiani.

⁶Nechamaa ꞉ninye, neyiaya mpaach naichoorie ninye, nkata nemetii atua lturrur.

⁷Nebau naa mparri ee mukateni nemeisiichieki nayiere neyieng'i lkuo leker le Pasaka.

⁸Neirruaaya ꞉Yeso Petero o Yoana ajoki, <<Enchom, entibiraki iyioo ndaa e Pasaka payie ikinya.>>

⁹Neipar aajoki, <<Taaji iyieu nikintibir?>>

¹⁰Nejoki ꞉Yeso, <<Kore ake nijing'ieng'ie lkerenket, naa kenang'are ntae lpayian onapita loket le nkare. Enjipai ninye o nkaji najing.

¹¹Nijokiki lopeny nkaji, <Ikimpar ꞉Laiteng'enani ajoki, aji etii nkaji ee lomon nanyayie ndaa e Pasaka o looiteng'eni lainien?>

¹²Naa keitodol ntae nkaji kitok e keper naitibira atua. Entibiraki naa iyioo ndaa te inie!>>

¹³Nepuo, netum mbaa pooki etiu ana natiaka ꞉Yeso. Neitibir ninche ndaa e Pasaka.

¹⁴Kore naa payie ebau nkata, newuon Yeso te misa anya ndaa o lkipaareta lenyena.

¹⁵Nejoki ninche, <<Katong'uarra oleng ayieu nanya ndaa e Pasaka tenebo o ntae ewuon eitu aaitami sina.

¹⁶Amu kajoki ntae, manya hoo aitoki ndaa e Pasaka ana meitabari inia nalotu te nkitoria e Nkai.>>

¹⁷Nerrapu lkikompe, nerrinyoki Nkai nache nejo, <<Entang'amai naa ele kikompe, ning'arng'ar maate.

¹⁸Amu kajoki ntae, kore ang'asu taata mamat aitoki naichuo naing'uaa lng'anayio lo lmusabibu ana metabau nkitoria e Nkai.>>

¹⁹Nerrapu mukate nerrinyoki Nkai nache, negil neicho ninche ejo, <<Sesen lai ele oitaini tankaraki ntae, entaas ana payie kiparrunyienyie nanu.>>

²⁰Kore eidipa aatam ndaa, neitoki aiko nejia lkikompe ejo, <<Kore ele kikompe naa lning'o ng'ejuk lo lodo lai oibukori tankaraki ntae.

²¹Kake kore naa nkaina e ilo laaichooyo nanu, naa ketii ana misa tenebo o nanai.

²²Amu kore Nkerai e ltung'ani naa kelo ana nategelakaki apake, kake oi siake ꞉ilo tung'ani ooichoyo ninye!>>

²³Neng'asu ninche aaipara maate aajo ng'ae sa taatua ninche oas inia bae.

²⁴Nepukoki naa ninche ꞉nchankar ejo ng'ae obaki nera lkitok tee ninche pooki.

²⁵Nejoki ꞉Yeso ninche, <<Kore lkinkii loo lochon naa keitore ltung'ana lenche, naa kore loaata nkitoria tee ninche nejo ate laretok.

²⁶Kake metiu nejia taa ntae, enchoo metaa kore lkitok neaku lkini, neaku ꞉larikoni laisiaayiani.

²⁷Ng'ae naa oara kitok? Ilo owuon te misa, anaa loisiaaicho? Mara ilo owuon te misa? Kake kore nanu, naa katii atua ntae ana loisiaaicho.

²⁸<<Ntae naa likitoboitiere nanu tee ntemat ainien.

²⁹Naa kaicho sii nanu ntae nkitoria, ana naaichoo ꞉Papa lai,

³⁰metaa kore te misa ai, taatua Nkitoria ai, nitumtum aatadaata nimatichocho. Niwuenini too lorikan le nkitoo, inguanarere lolo mareita tomon o oare le Isirael.

³¹<<Simon! Simon! Todua amu, ketoomonua Chitani ntae payie eipirpir ana nkano,

³²kake kaatoomonoka nanu iyie, payie meichunye nkurukoto ino. Naa kore payie iwuatuwuata kenya, ntogolo naa lalachera linono.>>

³³Nejoki, <<Laitoriani, katumuta paalo abaki tanaa jila maateeni, naari o iyie.>>

³⁴Nejoki ꞉Yeso ninye, <<Petero, kaajoki meiru hoo lkoko anapar, ewuon eitu kimiki iyie nkatitin uni ajo mikiyielo.>>

³⁵Nejoki ninche, <<Amaa apa payie areu ntae miatata mbene ee ropiyiani, anaa lbene, anaa namuka, keatae ntoki natong'orika ntae?>> Nejo, <<Meatae!>>

³⁶Nejoki ninche, <<Kake kore taata, kore loata mbene ee ropiyiani nchoo meawa, neas sii nejia loata lbene. Kore lemeata lalem, nemir lkila lenye ainyiang'unyie.

³⁷Amu kajoki ntae, kore kulo kigerot ooigeroki naa meatae ajo meitabari ta nanu. Lolo oojo, <Eikenakini ninye tenebo o ltorrok.> Amu kore naaipirita nanu, naa keitabari.>>

³⁸Nejo ninche, <<Laitoriani ng'ura, ketii ene lalema oare.>> Nejoki ninche, <<Keitiemu.>>[52]

³⁹Neipung Yeso alo Lowua loo Lng'erriyio ana neiko chiaake, neirukurukore ꞉looiteng'eni lenyena.

⁴⁰Kore payie ebaki ninye inie, nejoki ninche, <<Entoomon payie mijing'jing atua ntemat.>>

⁴¹Nelo nkiti rioto alam ninche,[53] negil kung aomon

⁴²nejo, <<Papa, tanaa yieuna ino, tooruaaki ele sina,[54] namara yieunoto ai, kake metaasai yieunoto ino!>>

⁴³Neipung'oki ꞉lmalaika eing'uaa chumata aitogol ninye.

⁴⁴Naa kore amu kewuon eata mion kitok, neomon oleng. Kore nkinyinyiret enye netuwuanai ana lodo eitong adoki nkop.

⁴⁵Kore payie elo netii looiteng'eni lenyena eing'uaa nkomono, neirrachu eilurate tankaraki keata ldukuman.

⁴⁶Nejoki, <<Aanyo payie ilurara? Enyuoto, entoomon payie mijing'jing atua ntemat.>>

⁴⁷Kore ewuon eirorita Yeso, nelotu lturrur loo ltung'ana. Nelotu lochi oiteng'eni oji Yudas, oara lobo loo loochi ooiteng'eni tomon o oare erikito ninche nenyikaki Yeso negus.

⁴⁸Nejoki ꞉Yeso ninye, <<Yudas, ilikoo dei Nkerai e ltung'ani to ngusoto?>>

⁴⁹Kore payie edol ꞉lolo ooboitiere ninye inia nalo aasai nejo, <<Laitoriani, Ikiar ꞉iyioo ninche ta lalem?>>

⁵⁰Neoch ꞉lobo lenche, laisiaayiani la laitainoni kitok la lasar, nedung'oo nkiok enye e tetene.

⁵¹Kake newoliki ꞉Yeso ajoki, <<Entung'ai ana!>> Neiseyie nkiok ilo aisiaayiani, neichiunyie ninye.

⁵²Nejoki ꞉Yeso lolo lkutuaa laa laitainok la lasar o lkutuaa ooitacheki nkaji e Nkai o lpayiani ootuo ayiaya ninye, <<Amaa, iotuo iatata lalema o runkun ana loopuonu aaibung laisimani?

⁵³Kore mperot pooki naa katii apa nkaji e Nkai tenebo o ntae, neitu kiseyieyie. Kake kore taata, naa nkata inchi o nkitoria e naimin.>>

⁵⁴Neibung Yeso, nerik neya nkaji e laitainoni kitok la lasar. Neirukurukore ꞉Petero elakuaniki.

⁵⁵Kore payie eidip ltung'ana aainuaa nkima te nkiji e boo, netowuana tenebo, newuon sii Petero tenebo o ninche.

⁵⁶Kore nkaisiaayiani nabo, nedol Petero ewuon tankalo nkima. Neing'or asipu nejo, <<Kore sii ele tung'ani naa keboitiere apa ninye.>>

⁵⁷Nemiki ajo, <<Natomononi! Mayielo ninye!>>

⁵⁸Kore te nkiti kata, neitoki likae tung'ani adol ninye nejoki, <<Kore sii iyie ira lobo lenche!>> Nejoki ꞉Petero, <<Ai! Lolee, mara!>>

⁵⁹Kore aitoki eicha nkata nabaki saa nabo, neitirrichaki ꞉likae tung'ani ajoki, <<Kedede, ketii sii apa ele tenebo o ninye, amu kera sii ninye loo Lgalilaya.>>

⁶⁰Nejoki ꞉Petero, <<Lolee, mayielo nanu nijoito!>> Kore ake inia kata ewuon eirorita, neiru lkoko.

⁶¹Neiwuatuwuata ꞉Laitoriani, neing'or Petero. Neparru Petero ilo rerei otiaka apa ꞉Laitoriani, <<Kore anapar ewuon eitu eiru lkoko, ikimiki nkatitin uni.>>

⁶²Neipung aulo, neichir te mion.

⁶³Kore ꞉lolo tung'ana oorripito Yeso, neikordod ninye eidong'ito.

⁶⁴Neisiap ninye nkonyek neipar aajoki, <<Mbonu ajo ng'ae likitoocho?>>

⁶⁵Nedek sii ninye too ldeketa kumo.

⁶⁶Kore payie eikienyu, netumo lkiama laa lpayiani o lkutuaa laa laitainok la lasar o laiteng'enak loo nkitanapat, neyau ninye atua nkiguana enche.

⁶⁷Nejoki, <<Tanaa ira iyie Kristo[55], tiliki iyioo!>> Nejoki ninche, <<Kore tanaliki ntae, naa mikirukuruk hoo nanu.

⁶⁸Naa kore sii tanaiparichiere ntae, nimikiwolikiki hoo nanu.

⁶⁹Kake kore ang'asu taata, keaku kewuon Nkerai e ltung'ani ta nkaina e tetene e ngolon e Nkai.>>

⁷⁰Nejo pooki, <<Neaku, iyie Nkerai e Nkai?>> Nejoki, <<Ijoitoto ntae, kara.>>

⁷¹Nejo ꞉ninche, <<Aa sipata nkae nikintoki ayiaya? Kitining'okita ate to nkutuk enye.>>