Read Samburu Luka 23 Bible Online

Luka 23 - Samburu bible

Luka 23

¹Neitache ilo turrur pooki, neya Yeso neti Pilato.

²Neng'asu aaiteeniki ninye aajo, <<Kore ele tung'ani, naa ikitumo eitopong'oo locho lang. Nejoki ltung'ana payie melaaki Kaisari kodi, nejo sii kera ninye koon Kristo, nera lkinkii.>>

³Neipar ꞉Pilato ninye ajoki, <<Iyie dei lkinkii loo Lyiaudi?>> Newoliki ajoki, <<Iyie ojoito.>>

⁴Nejoki ꞉Pilato lkutuaa laa laitainok la lasar o lolo turrurri, <<Madol nanu mbae torno te ele tung'ani.>>

⁵Kake neitirrichaki ꞉ninche aajoki, <<Kore to nkop pooki e Yudea, ang'asunyie Galilaya metabaki ene, naa keing'olng'ola ꞉ninye locho te nkiteng'ena enye.>>

⁶Kore payie ening ꞉Pilato ana, neiparu tanaa le Galilaya ilo tung'ani.

⁷Neyielou ajo ketii Yeso taabori nkitoria e Erode, nereu meiliepa alo neti Erode, tankaraki ketii ninye Yerusalem nana perot.

⁸Kore payie edol ꞉Erode Yeso, neng'ida oleng tankaraki keteyiewua ta nkata naado apake payie edol ninye, amu ketining'o lomon lenyena, neata siligi ajo kedol nkitodolunoto naje e nking'asia naas ninye.

⁹Neipar lomon kumo, kake eitu hoo ewoliki ꞉Yeso ninye toki.

¹⁰Neitachoo ꞉lkutuaa laa laitainok la lasar o laiteng'enak loo nkitanapat, eiteeniki ninye oleng nelimu mbaa naatoduaa eas o naatining'o ejo.

¹¹Nemen, neikordodoo ꞉Erode o sikarini lenyena Yeso. Neichopoki ꞉ninye nankan supati naitintil, nerriny meiliepa alo neti Pilato.

¹²Kore inia parri netumo Erode o Pilato neaku lchoreta, amu kore apa tekue, keata ninche lamang'ate.

¹³Neipotu ꞉Pilato lkutuaa laa laitainok la lasar o larikok o ltung'ana

¹⁴nejoki, <<Iyeutua ele tung'ani nati ana ꞉ilo oyeu ng'olng'ol locho. Kake kore naa, atetema ninye tekue ntae, kore ele tung'ani, eitu hooyia adol ntorno too lomon linteenikita.

¹⁵Netala sii Erode mbae te ninye, amu ketirrinyua nikitii, nemeatae hoo mbae torno nataasa naichiaakino payie eri metua.

¹⁶Naaku naa, kaidong te liche[56] nalaku.[57]>>

¹⁷

¹⁸Kake nebuak ninche pooki to ltoilo obo aajo, <<Ewata ele tung'ani, nilaakiki iyioo Barabas!>>

¹⁹Kore Barabas naa ltung'ani oteenaki te jila, tankaraki ng'olng'ol nabo naipung'ua te lkerenket o arichoi natara ltung'ani metua.

²⁰Neitoki Pilato airorie ninche, tankaraki keyieu apa nelaku Yeso.

²¹Kake nebuak aajo, <<Techo, techo ninye to lmusalaba!>>

²²Neitoki naa aipar ninche, nkata e uni, <<Aanyo, kaa torno dei etaasa ninye? Eitu adol nanu ntoki naarie ninye metua. Kore naa, kaichooyo meeidong'i, nalaaya.>>

²³Nereki ninche aabuak too ltoilochi kutuaa, eyieu payie echei ninye to lmusalaba. Nepuo kue aabuaaya.

²⁴Nedung Pilato aimie metaasai nayieu ninche.

²⁵Nelaku ilo oteenaki te jila, tankaraki ng'olng'ol o arichoi natara ltung'ani metua, ilo taa otoomonutua ꞉ninche. Neichooyo Yeso, meitaasi ana nayieu ninche.

²⁶Kore erikito Yeso, neibung ꞉sikarini ltung'ani obo oji Simon le Kirene oing'uaa nkang'ite e oriong e Yerusalem, neiteleki lmusalaba metanapa eirukurukore Yeso.

²⁷Neirukurukore ꞉lturrur kitok loo ltung'ana etii ntomonok naisinanio, neichirita tankaraki ninye.

²⁸Neiwuatuwuatakino ꞉Yeso ninche nejoki, <<Natomonok kuna e Yerusalem, emikinchiraki nanu kake enchira ate o nkera inchi!

²⁹Amu kore naa, kepuonu mperot naa keji, <Kemayiana nkolipiono o nkochuaa nemeicho o lki leitu eitanakicho!>

³⁰Naa kore inia kata, keng'asu ltung'ana aajoki lowuan, <Entuurokinoto iyioo!> nejoki ndonyuo, <Esiapai iyioo!>

³¹Amu tanaa keitaas ꞉ninche kuna baa lcheni ochal, nyo eitaas lotoyio?>>

³²Neriki lkulie aitarruok oare, aapuo aar metuata o Yeso.

³³Kore payie ebaki ng'oji neji Mborbor e Nkue, nechei Yeso to lmusalaba teinie o lolo aitarruok. Naa kore lobo, ketii mbata e tetene, netii likae mbata e kidienye.

³⁴Nejo Yeso, <<Papa, tapaliki ninche amu meyielo neasita.>> Nenuk ninche nkuko, aaor nankan enyena.

³⁵Neitachoo ltung'ana aaing'or. Kore abaki laiguanak ootii inie, neikordodoo ninye aajo, <<Keitejewua lkulie, nchoo naa meitejeu koon tanaa ninye Kristo le Nkai, ogeluno!>>

³⁶Neikordodoo sii ꞉sikarini ninye, epuonu aayaki naichuo naisiicho,

³⁷nejo, <<Kore tanaa iyie Lkinkii loo Lyiaudi, ntejeu koon!>>

³⁸Naa kore te keper ninye netii lkigerot oojo <<LELE LKINKII LOO LYIAUDI.>>

³⁹Kore lobo loo laaduo aitarruok ootechoki, nedek Yeso ajoki, <<Mira dei iyie Mesia? Ntejeu naa koon o iyioo!>>

⁴⁰Kake kore ilo likae aitarruoni, newoliki ekusakan ajoki, <<Miurie iyie Nkai, nikitudung'okaki sii iyie lkiye otudung'okaki iyioo?

⁴¹Kore iyioo, naa keichiaakino ana, amu ikitumuto laata nairirikino asat ang. Kake kore ele tung'ani, meatae ntoki torno nataasa.>>

⁴²Nejo ninye, <<Yeso! Taparruaaki, tinijing atua nkitoria ino!>>

⁴³Nejoki ninye, <<Kedede kaajoki iyie, kore anapar ikiboitiere nanu to nkop e ng'ida.>>

⁴⁴Kore inia kata, naa matejo saai ile e mparkiji, nejing naimin nkop pooki ana metabaki saai saal etua ndama. Kore nochi anka naor Ng'oji sinyati naaisul pooki o Ng'oji Sinyati ta nkaji e Nkai, nekija te nkiji.

⁴⁵

⁴⁶Nebuak Yeso to ltoilo sapuk ajo, <<Papa, nkaik inono apik nkichui ai!>> Kore payie eidip atejo nejia, nedung'o tau.

⁴⁷Kore payie edol lkitok loo sikarini oobaya ip nabo inia bae nataase, nerrep Nkai ejo, <<Kedede ltung'ani loosipat ele tung'ani.>>

⁴⁸Kore lturrurri pooki loo ltung'ana ootutumote aaing'or inia bae e nking'asia nataase, kore payie edol, nechuko aapuo nkang'ite enche, eochito lgoitie lenche eisinanio.

⁴⁹Neitachoo lolo pooki ooyielo ninye, o nana tomonok naairukurukore ninye ta Galilaya te nalakua, eing'orita kuna baa.

⁵⁰Keatae apa ltung'ani obo oji nkarna Yosep, oing'uaa lkerenket loo Lyiaudi oji Arimataya. Kera lobo loo lkiama, naa supat nera loosipat. Neitu echamaa inia apa nayieu ꞉ninche o asata enche. Naa keanyuta nkitoria e Nkai.

⁵¹

⁵²Nelo neti Pilato, neomonu sesen le Yeso.

⁵³Neitodou to lmusalaba, neirinaki nanka supat napuyiapui, neiteper to nkurarei nateguetuaki to soit, neitu aikata eiteperieki ltung'ani.

⁵⁴Kore inia parri, naa mparri e napa[58] etaa kebau Sabato.

⁵⁵Neijipaa ꞉ntomonok naaotuo tenebo o Yeso eing'uaa Galilaya, nedol inia kurarei o neikunaki payie eiteperi sesen lenye.

⁵⁶Nechuko aaitibir ntokitin naarropil o lata naelieki. Kore mparri e Sabato, neyeng'iyeng'a ninche ana nejo nkitanapat.