Read Samburu Luka 24 Bible Online

Luka 24 - Samburu bible

Luka 24

¹Kore ta mparri ekue e sapa, payie eng'asu aisuruanu, nepuo nana tomonok nkurarei enapita ntokitin naarropil naaitibirita.

²Neiniapu ilo soit eibeleleng'oyieki aaitalam nkurarei.

³Kake kore pejing ninche, neitu etum sesen la Laitoriani Yeso.

⁴Kore ake ewuon eing'aing'ai ninche tankaraki inia bae, nedol ake inia kata ltung'ana oare ooitachoo tabata ninche ooichopito nankan naaitintil.

⁵Kore eiputukunyuto, eirrigoki nkomomi enche nkop nejoki ꞉lolo tung'ana, <<Aanyo payie iyiayaya loichu taatua lootuata?

⁶Metii ninye ene, kake etipiwua! Entaparru netiaka ntae ewuon etii Galilaya

⁷ejo, <Kore Nkerai e ltung'ani, naa meatae ajo pee mepiki nkaik ee lolo tung'ana oaata ng'ok, nechei to lmusalaba, nepiu ta mparri e uni.> >>

⁸Neparru ꞉ninche lolo omon apa ootejo.

⁹Kore payie echukunye ninche te nkurarei, neliki loochi ooiteng'eni tomon o obo o lolo kulikae, nana baa pooki.

¹⁰Kore kuna tomonok naa Maria Magadalena o Njoana o Maria ng'otonye Yakobo o nkulie tomonok naaboitiere ninche. Neliki ꞉ninche lkipaareta kuna baa, kake kore too lkipaareta, ketuwuana kulo omon ana meitoki, neitu eiruk ninche.

¹¹

¹²Neinyuototo Petero, nekuet abaki nkurarei. Neirrigo airumrum atua, nedol lolo kijat laa nankan naapuyiapui aapeny naairinieki sesen, nerrinyo ang eing'asie te inia nataase.

¹³Kore apa inia parri, epuoito looiteng'eni oare le Yeso lkerenket kini oji Emaus, oara matejo kilomitani 11 te Yerusalem,

¹⁴keirorita ninche maate, aaimaki mbaa pooki naataasate.

¹⁵Kore ewuon eirorita maate aaimaki kuna baa, nenyikaki ꞉Yeso, neiriamari tenebo o ninche.

¹⁶Kake keikenoki nkonyek enche payie meyielou ninye.

¹⁷Nejoki ꞉Yeso ninche, <<Akua omon kulo liroritata ipuoitoto?>> Neitachoo ninche, eisinanio.

¹⁸Kore lobo lenche oji nkarna Kileopas, newoliki ajoki, <<Amaa, iyie ake apeny lomoni taatua Yerusalem, eji paa miyielo mbaa naataasate teinie to kuna perot?>>

¹⁹Neipar ajoki, <<Akua baa?>> Nejoki ꞉ninche, <<Mbaa naaipirita Yeso le Nasaret, aa kore apa ninye naa kera loiboni le Nkai, naa laidimani taa asat o tee rerei tekue Nkai o ltung'ana pooki.

²⁰Kore lkutuaa laa laitainok la lasar o lkutuaa lang, neichooyo ninye meiguanareki, neri metua, nechei to lmusalaba.

²¹Kake ikiata apa iyioo siligi aajo ninye olaku Isirael. Ee, kake kore etiu nejia, anapar mparri e uni etaasate kuna baa.

²²Naa kore aitoki, keing'asia iyioo nkulie tomonok taatua iyioo naachomo nkurarei duo te siran,

²³neitu etum sesen lenye. Nechukunyie nejoki iyioo, eji keipung'okita ninche ꞉lmalaikani ootiakita keichu.

²⁴Naa kore sii lkulikae ootii tenebo o iyioo, kechomo nkurarei netum ana natilimutua nenia tomonok, kake eitu edol ninye.>>

²⁵Nejoki ninche, <<Lotung'ana kulo oaamada, iatata ltauja oogol nimirukuruk nenia pooki naatejo loibonok le Nkai!

²⁶Amaa, mara meatae ajo meitami Kristo[59] sina, nejing atua nkitoo enye?>>

²⁷Neng'asunyie Musa o loibonok pooki, eibalakinyie ninche lomon ooipirita ninye koon taatua Lkigerot Sinyat pooki.

²⁸Kore payie enyikaki inia ang duo napuoito, neitaakino ninye keikonyi atuwuana kelo aituruk.

²⁹Neitirrichaki aaibok ejoki, <<Toboitiere iyioo amu kemuto, netaa kuarie.>> Nejing nkaji aboitiere ninche.

³⁰Kore etowuana ninye te misa aanya ndaa tenebo o ninche, nerrapu mukate, nemayian, negil, neicho ninche.

³¹Neboli nkonyek enche neyielou ninye, neimis ninye taatua ninche metaa merokure edolita.

³²Nejokino, <<Amaa, mara keinuaate duo ltauja lang inia kata eirorie iyioo to nkoitiei, ebolokita iyioo Lkigerot Sinyat?>>

³³Neinyuototo ake ninche inia kata, nerrinyo Yerusalem, neiniapu lkipaareta tomon o obo le Yeso eiturrurro o lolo ooboitiere

³⁴ejo, <<Kedede ketipiwua Laitoriani. Naa keipung'oka Simon.>>

³⁵Kore laaduo ooiteng'eni oare, neliki ninche lomon ootupukutua to nkoitiei o neikuna payie eyielou ninye inia kata payie egil mukate.

³⁶Kore ewuon eirorita ninche, neitache Yeso te nkiji enche nejoki, <<Metaa seriani tenebo o ntae.>>

³⁷Neiputukuny ninche, neguretu ejo milika etoduaa.

³⁸Nejoki ninche, <<Aanyo payie inyamalulu, naa aanyo payie einyuo lng'ach taatua ltauja linchi?

³⁹Eng'ura nkaik o nkejek ainien, amu nanu dei koon ele! Eraprapaaki nanu niking'orng'or, amu kore milika naa meata sesen o loik ana nidolitata ajo kaata nanu.>>

⁴⁰Kore payie eidip atejo nejia, neitodol ninche nkaik o nkejek enyena.

⁴¹Kore tankaraki ewuon ake eitu eiruk ꞉ninche tankaraki ng'ida, neing'asiate nejoki ꞉Yeso, <<Iatata ndaa tene?>>

⁴²Neicho ninye orati e sinkir opejo,

⁴³nerrapu, nenya tekue ninche.

⁴⁴Nejoki ninche, <<Kulo naa lomon lainien latilika ntae ewuon apa ati tenebo o ntae, nchere kore mbaa pooki /naaigeroki naaipirita nanu taatua nkitanapat e Musa, o Lkigerot Sinyat loo loibonok le Nkai o mbuku ee Sinkolio le Nkai, naa meata ajo mebaya.>>

⁴⁵Kore ake inia kata, nebol ninche nkuechi meteyielou Lkigerot Sinyat.

⁴⁶Nejoki ninche, <<Nchi apa eigeroki aajo: Kore Kristo naa keitami sina, nepiu taatua lootuata ta mparri e uni.

⁴⁷Naa kelikori ta nkarna enye nkibelekenyata nayau mpalikinoto ee ng'ok too lochon pooki, ang'asu te Yerusalem.

⁴⁸Naa ntae lasipak o lalikorok loo kuna baa!

⁴⁹Kore naa, karewaki nanu ntae lekutuk oitayia ꞉Papa lai, kake entewueni te lkerenket ana meichori ntae nkidimata naaing'uaa keper.>>

⁵⁰Nerikoo ꞉Yeso ninche aitung'aa ilo kerenket ana metabaki ng'oji neji Betania. Neapaa nkaik enyena, nemayian ninche.

⁵¹Naa kore emayianita ninche, neorere, neiliepieki aaya chumata.

⁵²Nesai ꞉ninche ninye, nerrinyo Yerusalem te ng'ida kitok,

⁵³Newueni ta nkaji e Nkai nkata pooki errepita Nkai.