Read Samburu Luka 3 Bible Online

Luka 3 - Samburu bible

Luka 3

¹Kore ta lari le 15 le nkitoria e Kaisari oji Tiberio era Pontio Pilato laiguanani le Yudea, neitore Erode Galilaya, neitore Pilipo lalache lenye Iturea o nkop e Tirakoniti, neitore Lisanias Abilene,

²ta ng'amata narayie Anas o Kayapas laitainok kutuaa la lasar, nelotu rerei le Nkai neti Yoana layieni le Sakaria etii lkees.

³Nelo Yoana nkopi pooki naamanita sere e Yordan elikoo nkipatisare e nkirriidunoto ee ng'ok nayau mpalikinoto ee ntorrok,

⁴tana naigero taatua mbuku ee lomon lo loiboni le Nkai Isaya aajo, <<Ening'o ltoilo le ilo obuakita te lkees, entibiraki Laitoriani nkoitiei, entorioi nkoitieii kunini enyena!

⁵Kenuki ng'eremi pooki, neitodouni ldonyuo o lowuan pooki. Kore nkoito naakordo neitoriori, naa kore neogum, neitibiri metusupata,

⁶nedol ltung'ana pooki njeunoto e Nkai.>>

⁷Nejoki ꞉Yoana lturrurri loo ltung'ana ootuo meipatisa, <<Naichoi ana ee lasuria! Ng'ae otiaka ntae ing'ataa ngoro nalotu e Nkai?

⁸Entiiu naa lng'anayio ooiririkino nkirriidunoto ee ng'ok. Emijokino maate, <Kore Abraam, ikiata iyioo era papa lang.> Amu kajoki ntae, keidim Nkai aitibiru nkera too kulo soito metaa nkera e Abraam.

⁹Naa kore abaki taata, eidipaki aatipik ntolu ntana ee lkeek metaa kore pooki cheni lemeiu lng'anayio supati, nedung'uni, nenang'akini nkima.>>

¹⁰Neiparichiere ꞉lturrurri ninye aajoki, <<Kaa naa kias?>>

¹¹Newoliki ajoki, <<Kore loata nankan are nchoo eoriki ilo lemeata, naa kore sii ilo oata ndaa, nchoo eng'arie ilo lemeata.>>

¹²Kore laitalakunok le kodi, nepuonu sii ninche meipatisi, neipar aajoki, <<Laiteng'enani, kaa kias iyioo?>>

¹³Nejoki, <<Emintalaku kodi aaitalang inia naitanapaki ntae.>>

¹⁴Neipar sii ninye ꞉sikarini aajoki, <<Oo iyioo kaa kias?>> Nejoki, <<Emingolgolaa ntokitin ee ltung'ana, nimisimaa sii ntokitin ee lkulie to nkoitiei e sapare. Enchoo eitiemu ntae laata inchi.>>

¹⁵Kore eanyicho ltung'ana, neimakita pooki taa ltauja lomon le Yoana, ejo <<Kebaki sa naa ninye Kristo?[7]>>

¹⁶Newoliki ꞉ninye ninche pooki ajoki, <<Kaipatis nanu ntae ta nkare, kake kelotu loata ngolon alang nanu, ilo lamaichiaakino hooyia nanu atalaa nkeenita ee namuka enyena, naa kore ninye, keipatis ntae ta Ltau Sinyati o te nkima.

¹⁷Neibung'uta ta nkaina enye masaaita naorieki nkano supat o siau. Neor to lkurroto eiturrurroki nkano supat ng'oji neiteng'elieki, nepejoo siau pooki te nkima nemerai.>>

¹⁸Neliki ꞉Yoana ltung'ana Lomon Supati areki eitaarriyian too lomon kumo.

¹⁹Kake kore payie eing'ode ꞉Yoana Erode ilo arikoni le Galilaya tankaraki nawa Erodias nkitok e lalache lenye oo too nkulie baa pooki torrok naataasa ninye,

²⁰neitoki Erode aponiki aas ana bae torno too kuna pooki naataasa, aen Yoana te jila.

²¹Kore payie eipatisi ltung'ana pooki, neipatisi sii Yeso. Naa kore eomonito nebolo chumata,

²²nedoki ꞉Ltau Sinyati te nkitanyanyukoto e nkutukurruk. Nelotu ltoilo oing'uaa chumata ejo, <<Ira iyie Nkerai ai nacham, naa kang'ida tankaraki iyie.>>

²³Kore payie eng'asu Yeso aiteng'enicho, keata larin oobaya 30. Nejo apa ltung'ana, kera layieni le Yosep, layieni le Eli,

²⁴layieni le Matat layieni le Lawi, layieni le Melki, layieni le Yanai, layieni le Yosep,

²⁵layieni le Matatias, layieni le Amos, layieni le Naum, layieni le Esili, layieni le Nagai,

²⁶layieni le Maat, layieni le Matatias, layieni le Semein, layieni le Yosek, layieni le Yoda,

²⁷layieni le Yoanan, layieni le Resa, layieni le Serubabel, layieni le Chealtiel, layieni le Neri,

²⁸layieni le Melki, layieni le Adi, layieni le Kosam, layieni le Elmadam, layieni le Er,

²⁹layieni le Yochua, layieni le Eliese, layieni le Yorim, layieni le Matat layieni le Lawi,

³⁰layieni le Simion, layieni le Yuda, layieni le Yosep, layieni le Yonam, layieni le Eliakim,

³¹layieni le Melea, layieni le Mena, layieni le Matata, layieni le Natan, layieni le Daudi,

³²layieni le Yese, layieni le Obed, layieni le Boas, layieni le Salmon, layieni le Naachon,

³³layieni le Aminadab, layieni le Adimin, layieni le Arini, layieni le Esiron, layieni le Peres, layieni le Yuda,

³⁴layieni le Yakobo, layieni le Isaka, layieni le Abraam, layieni le Tera, layieni le Naor,

³⁵layieni le Serug, layieni le Reu, layieni le Peleg, layieni le Eber, layieni le Chela,

³⁶layieni le Kainan, layieni le Arpakasadi, layieni le Chem, layieni le Noa, layieni le Lamek,

³⁷layieni le Metusela, layieni le Enok, layieni le Yared, layieni le Maalalel, layieni le Kainan,

³⁸layieni le Enos, layieni le Set, layieni le Adam, layieni le Nkai.