Read Samburu Luka 4 Bible Online

Luka 4 - Samburu bible

Luka 4

¹Nerrinyunyie Yeso eing'uaa sere e Yordan ebore Ltau Sinyati. Nerik ꞉Ltau Sinyati lkees,

²metetema ꞉Chitani tee mperot 40. Neitu enya toki tee nenia perot 40, naa kore payie eichunye nenia perot, near ꞉sumach.

³Nejoki Chitani, <<Tanaa ira iyie Nkerai e Nkai, tiaaki ele soit metaa mukate.>>

⁴Newoliki ꞉Yeso ajoki, <<Keigeroki aajo, kore ltung'ani naa mara mukate apeny eichiwue.>>

⁵Nerik ꞉Chitani nkeper e ng'oji neodo, neitodol nkitoria pooki e nkop te nkini kata.

⁶Nejoki ꞉Chitani, <<Kaaicho iyie ana kitoo o murdaicho enye pooki, amu nanu eichooki naa kaicho pooki ng'ae layieu.

⁷Tanaa naa ikigilaki kung asai nanu, neaku kuna pooki ninono.>>

⁸Newoliki ꞉Yeso ajoki, <<Keigeroki aajo, <Tasayia Laitoriani Nkai ino apeny, naa ninye apeny siaayia.> >>

⁹Nerik ꞉Chitani ninye Yerusalem, neitacheyie to ng'oji neodo aisul pooki ta nkaji e Nkai nejoki, <<Kore tanaa ira iyie Nkerai e Nkai, tusulai koon

¹⁰amu keigeroki aajo, <Ikirewaki ꞉Nkai lmalaikani lenyena, mikitirripo>

¹¹naa <Iking'amaa taa nkaik enche, payie mikinkub hooyia soit ndap ino.> >>

¹²Newoliki ꞉Yeso ajoki, <<Ketejoki, <Mitem Laitoriani Nkai ino.> >>

¹³Kore payie eidip Chitani atetema tee ntemat pooki, nelo aing'uaa ana metabau nkata nairirikino.

¹⁴Nerrinyo Yeso alo Galilaya to ngolon e Ltau Sinyati, neibulaa lomon lenyena lubot pooki naanyikita inie.

¹⁵Neiteng'enicho tee Sinagogini[8] enche, nerrep ninye ꞉ltung'ana pooki.

¹⁶Nelo Yeso lkerenket le Nasaret, inie netubulunyie. Kore mparri e Sabato[9] nejing atua Sinagogi ana chiaake neas. Kore payie einyuototo aisom Lkigerot Sinyat,

¹⁷neichori mbuku e loiboni le Nkai oji Isaya, nebol, netum ng'oji neigero ajo,

¹⁸<<Kore Ltau Sinyati la Laitoriani, naa ketii tenebo o nanu, amu kaategelua Laitoriani paaliki laisinak Lomon Supati. Kaaterewa matiliki looena lakunoto enche, naliki lmodook metodolicho, nalaku mechomo lolo ooironyitae,

¹⁹nalikoo lari oitodolu Laitoriani omom enye.>>

²⁰Neiken mbuku, nerrinyoki laisiaayiani newuon. Neing'or ninye ꞉ltung'ana pooki ootii inia Sinagogi,

²¹neng'asu airorie ninche ajoki, <<Kore anapar etabaitie kulo kigerot tee nkiyiaa inchi.>>

²²Kore lolo pooki, nerrep ninye. Neing'asia too lomon le munyani ooimunyie nkutuk enye neipara aajo, <<Mara dei layieni le Yosep ele?>>

²³Nejoki ꞉Yeso ninche, <<Meatae ajo mikijokiki ana dung'et e rache, <Labaani, tabaa koon. Kore pooki nikitining'o aajo itaasa te Kapernaum taasa abaki tene to nkop ino.> >>

²⁴Neitoki ajoki, <<Kedede kajoki ntae, meatae loiboni le Nkai oyanyiti taatua nkop enye.

²⁵Kake kesipa kajoki ntae, keatae apa nkoilia kumo to nkop e Isirael ng'amata e Elija payie eikeni chumata larin okuni o lapatin ile. Kore inia kata, neibulaa lameii kitok nkop pooki.

²⁶Kore apa Elija, eitu erewakini nabo taatua nana, mara ake netii nkoiliai nabo e Sarepata to nkop e Sidon[10].

²⁷Kore te Isirael ta ng'amata e loiboni le Nkai oji Elicha, neatae lkumo oaata nkeeya ee lbolot[11], nemeatae looichiunyieki mara Naaman, ltung'ani oing'uaa Siria.>>

²⁸Kore lolo pooki ootii atua Sinagogi, neiputakino ngoro ening'ito inia.

²⁹Neinyuototo ninche nemiraa te lkerenket, neya nkeper e lmaawue le ilo owua otechetieki lkerenket lenche, payie etum aatuumai.

³⁰Kake neim ninye terichet ninche, nelo aing'uaa ninche.

³¹Nedoyio Yeso alo Kapernaum lkerenket otii Galilaya, neiteng'en ninche tee mperot e Sabato.

³²Neing'asiae oleng te nkiteng'enare enye, amu keiro te rereii oata nkitoria.

³³Kore taatua Sinagogi netii ltung'ani oiputa lairirua, nebuak to ltoilo sapuk

³⁴ajo, <<Ooi! Nyo iyieunyie iyioo Yeso le Nasaret? Iyewuo aar iyioo? Kayielo ajo ng'ae ira, Sinyati le Nkai.>>

³⁵Nebuaaki ꞉Yeso aing'ode ajoki, <<Tigirai, mpung'u tung'ai ninye!>> Nerrek ninye ꞉ilo airirua taatua ltung'ana neipung aing'uaa meatae lbae otipika.

³⁶Neing'asia ninche pooki, neing'amng'am aajo, <<Kaa bae ana, eji kore te nkitoria o ngolon, kearaa lairiruani meeipung'o?>>

³⁷Kore lomon ooipirita ninye, nebulaa too lubot pooki e inia kop.

³⁸Neipung'u Yeso te Sinagogi, nelo nkaji e Simon.[12] Naa kore nkautani e Simon keibung'uta nkirewua oleng, neomoni ninye metereto.

³⁹Neitache Yeso airrigokino ninye, nebuaaki nkirewua metung'ai, neing'uaa ninye ꞉nkirewua. Neinyuototo nkautani e Simon inia kata aisiaai ninche.

⁴⁰Kore edooyo ndama, neyau ꞉lolo pooki oaata ltamoyia oaata moyianitin ee mpukunot naapaapaacha netii ninye, neichiunyie pooki ng'ae omuai eiteleki nkaik enyena.

⁴¹Neipung'u lairiruani aaing'uaa ltung'ana kumo eichir aajo, <<Ira iyie Nkerai e Nkai.>> Nebuaaki ꞉Yeso ninche aing'ode nemitiki eiro, amu kore lairiruani naa keyielo aajo kera ninye Kristo.[13]

⁴²Kore naikenyunyie, neipung alo ng'oji neliyio. Neing'oru ninye ꞉lturrur kitok, nebaya netii nesaan aaibooyo payie meing'uaa ninche.

⁴³Nejoki ninche, <<Keiririkino payie aliki aitoki Lomon Supati le nkitoria e Nkai lkulie kerenketi, amu tankaraki inia payie aaterewuaki.>>

⁴⁴Nelo kue eiteng'enicho tee Sinagogini e Yudea.[14]