Read Samburu Luka 6 Bible Online

Luka 6 - Samburu bible

Luka 6

¹Kore apa mparri nabo e Sabato eimita Yeso nkiji ee lchampai le nkano, negilu ꞉looiteng'eni lenyena lperes le nkano nepupu taa nkaik, nenya.

²Neiparichiere lkulie Parisayo aajoki, <<Aanyo payie iasias nemeichiaakino ta mparri e Sabato?>>

³Newoliki ꞉Yeso ajoki, <<Eitu apake isomsom inia nataasa apa Daudi o lboitieii lenyena payie ear ꞉sumach?

⁴Ketijing'a apa nkaji e Nkai, nerrapu mukateni naaitakaki Nkai nenya, neitoki aicho lolo boitieii lenyena. Kore apa tee nkitanapat naa meichiaakino tenenya likae tung'ani mara ake laitainok la lasar aapeny.>>

⁵Neitoki ajoki, <<Nkerai e ltung'ani nara Laitoriani le Sabato.>>

⁶Kore ta nkae parri e Sabato nejing Sinagogi aiteng'enicho. Naa ketii apa inie ltung'ani oikaolo nkaina e tetene.

⁷Kore laiteng'enak loo nkitanapat o Lparisayo, neing'or ntoki nalo ninye aas tanaa keichiunyie ilo tung'ani ta mparri e Sabato payie etum ntoki nadung'okinyie ninye nkiguana.

⁸Kake keyielo Yeso mparrunot enche, nejoki ilo oikaolo nkaina, <<Inyuo wou ntacho tene!>> Neinyuototo nelotu aitache.

⁹Nejoki ꞉Yeso ninche, <<Kaipar ntae ana, amaa kaa naichiaakino tinias ta mparri e Sabato, tinias supat anaa tinias ntorno, tinintejeu nkichui anaa tiniar metua?>>

¹⁰Neitamanaa nkonyek aing'or ninche pooki, nejoki ilo tung'ani, <<Intorioi nkaina ino!>> Neitorioo ꞉ninye nkaina neichiu asupatu aitoki.

¹¹Kake kore laiteng'enak loo nkitanapat o Lparisayo negoro oleng, neiguana maate aayiaya mbae naitaas Yeso.

¹²Kore apa nenia perot, neipung Yeso alo ldonyuo aomon. Newuon kuarie pooki eomonito Nkai.

¹³Kore payie eikienyu, neipotu looiteng'eni lenyena, negelu tomon oare taatua ninche neicho nkarna naji Lkipaareta:

¹⁴Aa Simon oinyiaka ajo nkarna Petero o Andirea lalache lenye o Yakobo o Yoana o Pilipo o Batolomayo,

¹⁵o Matayo o Tomas o Yakobo le Alpayo o Simon oji Silote[16]

¹⁶o Yuda le Yakobo o Yudas Isikariot otilikoyie Yeso taa lmang'ati lenyena.

¹⁷Nedoyio Yeso tenebo o ninche neitache to ng'oji neiperere. Netii inie lturrur kitok loo looiteng'eni lenyena o siamu kitok ee ltung'ana ooing'uaa Yudea pooki o Yerusalem o nkop e lkerenket le Tiro o Sidon nanyikita nkalo mpaso kitok.

¹⁸Naa keotuo ninche aainining Yeso, neichiunyieki moyianitin enche. Kore lolo ootiirrana ꞉lairiruani naa keichiunyieki.

¹⁹Nenyok ꞉lturrur pooki ayiaya neiko teneiseyie ninye tankaraki keing'uaa ninye ꞉ngolon, neichiunyie ltung'ana pooki.

²⁰Neapu Yeso nkonyek, neing'or looiteng'eni lenyena nejoki, <<Imayianana ntae loomena, amu ninchi nkitoria e Nkai.

²¹Imayianana ntae oaata sumach taata amu keitiemuni ntae. Imayianana ntae ooichir taata, amu ikuenini kenya.

²²Imayianana teneibai ntae ltung'ana, negelaa ntae, nedek ntae, neitarruorri nkarn inchi tankaraki Nkerai e ltung'ani.

²³<<Enting'idata inia parri nintiamtiam te ng'ida, amu kore laare inchi, naa keikitok te chumata. Amu nejia eitaasita ꞉loomenye loibonok le Nkai.

²⁴<<Kake oi ntae oaara parakuo, amu indipa ntae aatum nenia pooki niyieuu.

²⁵Oi ntae oimoto taata, amu itumtum sumach. Oi ntae ookueni taata, amu isinanionio ninchirchir.

²⁶Oi ntae tenerrep ntae ltung'ana pooki, amu nejia apa eikuna ꞉loominyi loibonok le sapare.

²⁷<<Kake kajoki naa ntae laaning'ito: Entacham lmang'ati linchi, nintaasas supati lolo ooiba ntae.

²⁸Entamayian lolo oodek ntae, niomonokiki lolo ooitam ntae sina.

²⁹Kore tinikioch ltung'ani seder, wuatuwuataki nkae. Naa kore likiworu lkila lino le oriong mimitiki abaki nkila ino e atua.

³⁰Nchoo pooki likiomon, naa kore pooki likiworu ntokitin inono, mimpar ninye mikitirrinyoki.

³¹Entaasa ltung'ana ana niyieuu neitaas ntae!

³²<<Amaa tinichamcham lolo oaacham ntae, kaa tipat itumtum ntae te inia? Amu kore abaki laasak loo ng'ok, naa kecham ꞉lolo oaacham ninche.

³³Amaa tinintaasas supati lolo oitaas ntae supati, kaa tipat itumtum ntae? Amu keas abaki laasak loo ng'ok nejia.

³⁴Naa amaa sii tininchocho silen ltung'ana lisiliglig aajo kelak, kaa tipat itumtum ntae te inia? Amu kore abaki loata ng'ok naa keicho silen loaata ng'ok, eiken sii ꞉ninche aajo kelaakini pooki.

³⁵Kake entacham lmang'ati linchi, nintaasas ninche supati, ninchocho silen miatata siligi aajo kerrinyokini ntae toki. Naa kore laata inchi keaku kitok, niakuku nkera e Ilo ooisul pooki. Amu kore ninye, naa kera supat too lolo lemeata nache o too lolo torrok.

³⁶Entaa loaata lng'er, ana payie eata Papa linchi lng'er.

³⁷<<Eminguanare, naa meiguanareki ntae. Emidung'oki lkulie nkiguana torno, naa medung'okini ntae. Entapaliki, naa kepalikini ntae.

³⁸Enchooi, naa keichori ntae te risioroto supat, naruja, neitunyo, nedoodoyo, nebukokino nankan inchi. Amu kore risioroto nintirisiokinyienyie lkulikae naa ninye sii eitirisiokinyieki ntae.>>

³⁹Neitoki aliki ninche ana kitanyanyukoto, <<Amaa, keidim lmodooni atiriko likae modooni? Mara kedoki pukura aare atua udoto?

⁴⁰Kore loiteng'eni, naa melang laiteng'enani lenye, kake kore pooki ng'ae oidipa laiteng'enani lenye aaichoo nkiteng'ena pooki, nerisierei laiteng'enani lenye.

⁴¹Aanyo payie idol somua nati nkong'u e lalache lino, nimidol leng'oti nati nkong'u ino?

⁴²Tanaa, aji inko tinijoki lalache lino, <Lalache lai, ntacho maaitai somua nikiti nkong'u,> nimidol iyie leng'oti nati nkong'u ino? Iyie loitaakino, ntai ang'as inia leng'oti to nkong'u ino, naa te inia kata itumoki atoduaa aitai inia somua nati nkong'u e lalache lino.

⁴³<<Meatae lcheni supat ojing lng'anayio torrok, anaa lcheni torno ojing lng'anayio supati,

⁴⁴amu keyielouni lcheni pooki taa lng'anayio lenyena, amu meatae lkuku oobosunyieki lng'abolo, nemedeuni lng'anayio lo lmusabibu ta saar loo lkuku.

⁴⁵Kore ltung'ani supat naa keiu supati taatua nchumat supati e ltau lenye, neiu ltung'ani torno ntorrok taatua nchumat torrok enyena. Amu kore nairo nkutuk, ninche naabore ltau lenye.

⁴⁶<<Aanyo payie kimpotpot aajo, <Laitoriani! Laitoriani!>, nimiasias nana najoki ntae?

⁴⁷Kaitodol ntae netiu pooki ng'ae olotu natii, nening rereii lainien neas.

⁴⁸Kore ninye, naa ketiu anaa ltung'ani ochet nkaji, netur nkop metuguto, nepik lkitamanyunoto lenye nkeper e ndadapoi[17]. Kore payie enang'unye nkare nenang inia aji, kake meigusugusie amu ketechetaki aaitogol.

⁴⁹Kake kore ilo oning nemeas, naa ketuwuana ltung'ani otecheta nkaji te nkeper ee nkulupo meitamanyuno, nenang'unye sere, nenang inia aji neurori ta nkata nabo, nerroyo katukul.>>