Read Samburu Luka 8 Bible Online

Luka 8 - Samburu bible

Luka 8

¹Kore tesiedi inia, nemanaa Yeso too lkerenketi o nkang'ite, alikoo Lomon Supati le nkitoria e Nkai. Netii loochi ooiteng'eni tomon o oare tenebo o ninye,

²netii sii ntomonok /naataarayieki lairiruani taatua ninche o neichiunyieki moyianitin: aa taa Maria naji Magadalena naataarayieki lairiruani sapa taatua,

³o Njoana, nkitok e Kusa oara laisiaayiani kitok le Erode o Susana o nkulie kumo, naaitaitua ntokitin enche aaisiaayie Yeso o Lkipaareta.

⁴Naa kore eiturrurrunyie lturrur kitok, nepuonuta ltung'ana eing'uaa lkerenket o lkerenket neti Yeso, nejo ꞉ninye te nkitanyanyukoto,

⁵<<Kore apa, nelo launoni aisuaaya lantarara lenyena. Naa kore eisuaaya lantarara aun, nedoki lkulie nkoitiei, neidachi, nenya ꞉nkueeny e nkeper e nkai aamut.

⁶Nedoki lkulie lkarkar, kore payie ebulu, netoi amu meata nkare.

⁷Nedoki lkulie atua lkeek loo lkuku, nebulu tenebo, neiding'aki ꞉lkuku, negor.

⁸Nedoki lkulie nkuluponi supat, nebulu, kore lobo neiu ip.>> Kore ejoito ana, neitoki abuak ajo, <<Kore loata nkiyiaa naaning'ichere, nchoo ening.>>

⁹Kore ꞉looiteng'eni lenyena neipar kipirte ena kitanyanyukoto.

¹⁰Nejoki ꞉Yeso ninche, <<Ntae eichooki enteyielo nkisudorot e nkitoria e Nkai, kake kore lkulie keyielou tee nkitanyanyukot, paa, <kore abaki eing'or nemedol nening abaki nemeyielou.>

¹¹<<Naa ana eipirita ana kitanyanyukoto: Kore lantarara naa rerei le Nkai.

¹²Kore lolo ootodokita nkoitiei naa lootining'o, nelotu Chitani aitai ilo rerei taatua ltauja lenche, payie meiruk nejeu.

¹³Kore lootii lkarkar naa lolo ooning, laa kore tenening ilo rerei neng'amaa te ng'ida. Kake meata ninche ntana, keiruk nkiti kata, kore payie etum ntemat nerriaa.

¹⁴Kore lolo ootodokita atua lkuku naa looning, negor nyamali ee ltauja o parakuoicho o rraa e nkichon. Nemeiu ꞉ninche lng'anayio ooku.

¹⁵Kore lantarara ootodokita nkuluponi supat, naa lolo ooning rerei neibung taa ltauja supati oodede, neiu lng'anayio te ng'iriata.

¹⁶<<Meatae ltung'ani ooinok lkilang'ilang'et, nepukuroki loket tanaa eitulutoo lkorror, kake keik te nkeper e ng'oji netala, payie edol ltung'ana oojing'u wong'an.

¹⁷Amu meatae naisudoro nemeibalunyieki, anaa naing'opa nemeipung'unyieki atua wong'an.

¹⁸Neaku naa, errita ate ninkoko tinining'ning, amu kore loata neponikini, kore lemeata neoruni abaki inia najo ninye keata.>>

¹⁹Nepuonu lalachera Yeso o ng'otonye netii Yeso, kake eitu eidim aatinyikaki ninye tankaraki lturrur.

²⁰Nejokini Yeso, <<Eitache ng'utunyi o lalachera linono to boo, naa ikiyieu ꞉ninche nikidol.>>

²¹Newoliki ajoki, <<Kore yieyio lai o lalachera lainien, naa lolo ooning rerei le Nkai neas ana nejo.>>

²²Kore apa mparri nabo nejing ꞉Yeso meli o looiteng'eni lenyena, nejoki ninche, <<Matalang aapuo ildo kokun le mpaso!>> Neinyuototo aapuo.

²³Kore elang'ita ꞉ninche neya ninye njuo. Neinyuototo lkutati nelotu nedoki mpaso, neng'asu nkare aiput meli, nenyamalu ninche oleng.

²⁴Nepuo aainyoyie nejoki, <<Lkitok, Lkitok, kindaaitie!>> Neinyuototo, nebuaaki aing'ode ilo kutati o laing'ok le nkare. Neperoo ilo kutati o laing'ok le nkare, neitirring'a nkare.

²⁵Nejoki, <<Amaa, kore nkurukoto inchi?>> Kake neiputukuny ninche, neing'asia, neipara maate aajo, <<Aa ng'ae dei ele, aa kore payie ejoki lkutati o nkare nchi, nening ninye?>>

²⁶Nelang nkare aapuo ildo kokun le nkop ee Lgerasin, naitalang'akinere nkop e Galilaya.

²⁷Kore payie edou Yeso te meli, nenang'are ꞉ltung'ani oing'uaa lkerenket oata ꞉ninye lairiruani. Neitu eichop nankan tee mperot kumo, nemewuon ta nkang, kake too nkuraren ewuon.

²⁸Kore payie edol Yeso, nebuak, nerriaakino tekue ninye. Nejo to ltoilo kitok, <<Nyo kiyieunyie nanu iyie, Yeso, Nkerai e Nkai naisul pooki? Kaalej mikintam sina.>>

²⁹Ketejo nejia amu ketiaka ꞉Yeso inia kata ilo airirua metung'ai ilo tung'ani. Naa kore amu keibung'a ninye nkatitin kumo, neeni nkaik o nkejek tee senke payie etumi aatirrip, kake ketudung'o ninye nenia senke nkatitin pooki. Nemiraki ꞉lairiruai neliyio.

³⁰Neipar ꞉Yeso ninye ajoki, <<Ikijuae iyie nkarna?>> Nejo, <<Njore kitok,>>[22] amu lairiruani kumo ootijing'a ninye.

³¹Nelej ꞉lairiruani Yeso nkatitin kumo, payie mearaa ninche amiraki lodo le nkop.

³²Netii inie mboo kitok ee mbitiro naadaa to lowua. Nelej ꞉lolo airiruani ninye meichoo mpaach najing'ie atua ninche, neicho.

³³Neipung'u te ilo tung'ani, nejing atua mbitiro. Nejo dii ꞉inia boo aaitutori te ilo owua, nedoki atua mpaso, neya nkare.

³⁴Kore payie edol lchekuti nataase, neisig nepuo aalikoo inia bae te lkerenket o taa nkang'ite.

³⁵Neipung'u ltung'ana aapuo aadol nataase. Nepuonu netii Yeso, nedol ilo tung'ani otung'aitie lairiruani ewuon tankalo nkejek e Yeso, eichopito nankan, nemeng'or mparrunot enyena. Neguretu pooki.

³⁶Kore lolo ootoduaa inia, neliki ninche, neikunaki payie eichiunyieki ilo oata lairiruani.

³⁷Kore ltung'ana kumo ootii nkalo inia kop ee Lgerasin, nejoki ꞉pooki Yeso mechomo aing'uaa ninche, amu ketumo ngureticho kitok. Nejing ninye meli alo achuko.

³⁸Neomon Yeso ꞉ilo tung'ani oipung'unyie lairiruani mpaach payie ewuon eboitiere ninye, kake nechuk ninye mechomo, nejoki,

³⁹<<Tuchukoi chomo nkang ino, nilikoo nana nikintaasa Nkai.>> Nechuko ninye alo alikoo taatua lkerenket nana pooki naaitaasa Yeso.

⁴⁰Kore payie echuko Yeso to nkop ee Lgerasin, neitoomon ꞉ninye lturrur kitok tankaraki keanyuta ꞉pooki ninye.

⁴¹Kore ake inia kata, nelotu ltung'ani oji nkarna Yairo, oara lkitok le Sinagogi. Nerriakino tekue nkejek e Yeso, nelej meeu nkang enye,

⁴²amu ketaa keye ntito enye nabo ake natiiwua, naata larin oobaya 12. Kore eloito Yeso, neiding'aki ꞉lturrur taa mbat pooki ana metala mpaach nayeng'ie.

⁴³Naa ketii inie nkitok nabo, naturukie lodo larin 12, netaapare koon to ntoki pooki naata too labaak neitu etum ltung'ani oichiunyie ninye.

⁴⁴Neimu tooriong Yeso ninyikaki, neiseyie sakurdai le nanka enye, nedung'o rukoi e lodo nabokata.

⁴⁵Nejo Yeso, <<Ng'ae laaiseyie?>> Nemiki ltung'ana pooki. Nejo Petero, <<Lkitok, ikingerutua ltung'ana nikinding'akita!>>

⁴⁶Kake nejoki ꞉Yeso, <<Ketii ltung'ani laaiseyie, amu kayielo ajo kaaipung'o ngolon aing'uaa.>>

⁴⁷Kore payie edol ꞉ana kitok ajo etukurruaki, nelotu eikirikira, nerriaa tekue Yeso. Nelimu tekue ltung'ana pooki ajo aanyo payie eiseyie o neikuna payie eichiunyieki nabokata.

⁴⁸Nejoki ꞉Yeso ninye, <<Ntitai, /kinchiunyie nkurukoto ino. Chomie seriani.>>

⁴⁹Kore ake ewuon eirorita ꞉Yeso, nelotu ltung'ani ta nkang e ilo kitok le Sinagogi, nejoki Yairo, <<Etaa etua ntito ino, mintoki taata aitanyamal Laiteng'enani.>>

⁵⁰Kore payie ening ꞉Yeso inia nejoki ninye, <<Mimputukuny, iruko ake apeny iyie, naa keichiu ninye.>>

⁵¹Kore payie ebaki ꞉Yeso inia aji, nemitiki ltung'ana ejing atua tenebo o ninye, mara ake Petero o Yoana o Yakobo o menye o ng'otonye nkerai.

⁵²Kore lolo tung'ana pooki naa keichirita neisinanio oleng tankaraki ninye. Nejoki ꞉Yeso ninche, <<Emiinchir, amu eitu eye nkerai kake keilura ake.>>

⁵³Nekueniyie ꞉ninche ninye amu keyielo aajo keidipa atua.

⁵⁴Kake neibung ninye nkaina e inia tito, neipot ajoki, <<Nakerai inyuo!>>

⁵⁵Nechukokino ꞉nkichui enye, neitache nabokata. Nejoki ꞉Yeso ninche meichoo ndaa.

⁵⁶Kore ntoiwuo enyena, neing'asia oleng, kake nejoki ꞉ninye ninche payie meliki hoo ltung'ani nataase.