Read Samburu Luka 9 Bible Online

Luka 9 - Samburu bible

Luka 9

¹Neipot ꞉Yeso loochi 12 aitutum tenebo, neicho ngolon o nkitoria naamirarie lairiruani pooki, neichiunyie moyianitin,

²neipaaya metilikoi nkitoria e Nkai, neichiunyie ltamoyia.

³Nejoki ninche, <<Eminap hoo pito to nkoitiei, peera sobua, anaa mbene, anaa ndaa, anaa sii ropiyiani, niminapnap nankan maare.

⁴Naa kore nkaji nijing'jing, entewueni teinie ana empung'o.

⁵Naa kore too lolo lemeitoomon ntae, tinimpung'pung aing'uaa ilo kerenket, empiripiroi nterit ee nkejek inchi, payie eaku limunoto torno tee ninche.>>

⁶Nemanaa aapuo taatua nkang'ite, elikoo lomon supati neichiunyie ltung'ana too ng'ojitin pooki.

⁷Kore payie ening Erode larikoni le Galilaya nenia baa pooki naataasate, nenyamalu oleng tankaraki ketii lkulie ootejo, <<Yoana eitipiwuaki taatua lootuata>>,

⁸nejo lkulikae, <<Elija oipung'ua>>, nejo lkulie, <<Kebaki naa lobo loo loibonok le apa eitipiwuaki.>>

⁹Kake nejo Erode, <<Katara apa Yoana adung'oo nkue. Ng'ae dei ilo laning'ito mbaa naijo kuna?>> Nenyok ayiaya adol ninye.

¹⁰Kore payie echukunyie ꞉lkipaareta, neliki Yeso mbaa naataasa. Neiwuang'ie ninche, neiriamari tenebo aapuo aapeny lkerenket oji Betesaida.

¹¹Kore payie eyielou ꞉lturrurri aajo echomo, neirukurukore. Neitoomon ninche, neliki mbaa naaipirita nkitoria e Nkai, neichiunyie lolo oomoyiaa.

¹²Kore payie emutu, nepuonu loochi 12 netii nejoki ninye, <<Nchoo lturrur mechomo nkang'ite o lchampai oataana payie etum ng'oji neperie o ndaa nanya, amu kore ene nikitii naa loliyio.>>

¹³Nejoki, <<Enchoo ntae ntoki nanya.>> Nejo, <<Mikiata iyioo ae toki mara ake mukateni imiet o sinkirri oare. Meatae hae, mara tinikipuo aainyiang'aki kulo tung'ana pooki ndaa.>>

¹⁴Amu kore lewa ootii inie naa kebaki 5,000. Nejoki ꞉Yeso looiteng'eni lenyena, <<Entowuana ltung'ana too lturrurri maa onom, meturruticho.>>

¹⁵Neiko ninche nejia, neitowuon ltung'ana pooki.

¹⁶Nerrapu Yeso nenia mukateni imiet o lolo sinkirri oare, neing'or chumata, nemayian, negil, neicho looiteng'eni lenyena meichoo ltung'ana.

¹⁷Nenya pooki, neimu, nerrapu ꞉lkipaareta nkikapuni 12 ee ng'urrot naatelekunye.

¹⁸Kore mparri nabo eomonito Yeso apeny, eboitiere looiteng'eni lenyena, neipar ninche ajoki, <<Ng'ae dei ejo ꞉lturrurri kara nanu?>>

¹⁹Newoliki aajoki, <<Yoana Laipatisani, nejo lkulie Elija, nejo lkulie lobo loo lolo oibonok le apa le Nkai otipiwua.>>

²⁰Nejoki ꞉Yeso ninche, <<Oo ntae, ijoijo ng'ae ara nanu?>> Newoliki ꞉Petero ajoki, <<Ira iyie Kristo[23] ilo le lekutuk[24] le Nkai.>>

²¹Neing'ode Yeso, ninche ajoki payie meliki hoo ltung'ani obo ilo rerei.

²²Nejoki, <<Kore Nkerai e ltung'ani, meata ajo metum sina kitok, neany ꞉lpayiani kutuaa o laitainok kutuaa la lasar o laiteng'enak loo nkitanapat, neri metua, kake kore ta mparri e uni naa keitipiuni.>>

²³Nejoki ninche pooki, <<Tenetii ltung'ani oyieu naairukurukore, nchoo emiki koon, nenap lmusalaba lenye mparri pooki, naairukurukore.

²⁴Amu kore loyieu neitejeu nkichui enye, neiminie, naa kore loiminie nkichui enye tankaraki nanu, naa keitejeu.

²⁵Nyo dupoto natum ltung'ani tenetum nkop pooki, neiminie anaa eidakie koon?

²⁶Amu kore ilo odol anyit tankaraki nanu o rereii lainien, naa kedol abaki ꞉Nkerai e ltung'ani anyit te ninye, tenelotu to wong'an e nkitoo enye o ne Papa o nee lmalaikani sinyat.

²⁷Kake kajoki ntae sipata nadede, kore atua kulo tung'ana ooitachoo tene, ketii ltung'ana ooitachoo lemedol lkiye, eitu edol nkitoria e Nkai.>>

²⁸Kore payie eichunye mperot naabaya isiet eidipa Yeso atejo kulo omon, neya Petero o Yoana o Yakobo, nedir ilo owua aaomon.

²⁹Kore ake eomonito ꞉ninye, neibelekenya nkomom enye, neiborru aaitintilu nankan enyena ana nkiwuang'ata.

³⁰Kore ake inia kata, netii ꞉ltung'ana oare ooirorie ninye, Musa taa o Elija,

³¹elioo ninche to wong'an e nkitoo e chumata, eimaki lkiye lenye[25] oitabari kenya te Yerusalem.

³²Kore Petero o lboitieii lenyena, neyiasai, neilura. Kore payie ening'u king'a, nedol wong'an e nkitoo enye o laaduo payiani oare ooitachoo o ninye.

³³Kore epuoito lolo payiani aaing'uaa Yeso, nejoki ꞉Petero, <<Lokitok, keisupat taa kitii iyioo ene! Maitibira nkorrimpani uni, nabo ino, o ne Musa o ne Elija!>> Kake meyielo Petero nejoito.

³⁴Kore ejoito ninye nejia, nedou nkidis neimulaa ninche, neiputukuny eimulaa inia kidis.

³⁵Neipung'u ltoilo taatua inia kidis ejo, <<Ana Nkerai ai gelunoti, entining ninye!>>

³⁶Kore payie egira ltoilo, nedol ꞉ninche Yeso aa ninye apeny. Negira ninche inia ng'amata pooki, eitu eliki ltung'ani nenia baa naatoduaa.

³⁷Kore ta mparri naijipita inia etodoutua ninche to lowua, nenang'are ꞉lturrur kitok ninye.

³⁸Nebuaaki ꞉ltung'ani taatua ilo turrur ajoki, <<Laiteng'enani, aateleja ng'urai ele ayieni lai obo amu ninye ake apeny nkerai ai natiiwua.

³⁹Naa kore chiaake keirrachu ninye ꞉lairiruai, kore meitekini nebuak neiterreyie, neirujurujie laburra to nkutuk nemesioki aing'uaa ninye, kake kear ana metachala.

⁴⁰Naa kateleja looiteng'eni linono metimirai, kake etalakinete.>>

⁴¹Newoliki ꞉Yeso ajoki, <<Oi ntae ltung'ana lemeata nkurukoto, netopong'ori! Anu kenya aboitiere ntae, nang'iri o ntae? Iyau nkerai ino ene.>>

⁴²Kore ewuon elotuta netii ninye, nenang'ie ꞉lairiruai nkop neiterreyie. Neing'ode ꞉Yeso abuaaki ilo airirua, neichiunyie ilo ayieni, nerrinyoki papa lenye.

⁴³Neing'asia pooki oleng payie edol nkitoo e Nkai. Kore ewuon eing'asia pooki taa mbaa naataasa, nejoki ꞉ninye looiteng'eni lenyena,

⁴⁴<<Entipik kulo rereii ltauja linchi. Amu kore Nkerai e ltung'ani, naa keichoori metipiki nkaik ee ltung'ana.>>

⁴⁵Kake eitu ening'u ninche ilo rerei, amu keisudoyieki payie mening'u ninche. Neurie eipar ninye inia.

⁴⁶Neng'asu ninche aaikarnyasa maate aajo, ng'ae sa tee ninche oidim ataa kitok?

⁴⁷Kake keteyielo ꞉Yeso mparrunot ee ltauja lenche, neibung nkerai kini ayau, neitacheyie tabata koon.

⁴⁸Nejoki ninche, <<Kore pooki ng'ae ong'amaa ana kerai tankaraki nkarna ai, naa nanu etang'amayie. Naa kore pooki laang'amaa nanu, naa etang'amayie ilo laaterewua nanu. Amu kore lkini taa ntae pooki naa ninye lkitok.>>

⁴⁹Newoliki ꞉Yoana ajoki, <<Lokitok! ikitoduaa ltung'ani omiraa lairiruani ta nkarna ino, naa ikitimitikita tankaraki mara ninye lobo lang.>>

⁵⁰Nejoki ꞉Yeso ninche, <<Emimitiki amu kore lemeany ntae naa linchi.>>

⁵¹Kore payie enyiku mperot naailiepieki ninye aaya chumata[26], nemut ajo kelo Yerusalem.

⁵²Nereu lkipaareta mechomo tekue ninye. Nepuo nejing nkang'ite ee Samaria[27] aaitibiraki ninye ng'oji,

⁵³kake eitu eitoomon Yeso ꞉ltung'ana, tankaraki ketumuta ajo kelo Yerusalem.

⁵⁴Kore payie edol ꞉looiteng'eni lenyena, aa Yakobo o Yoana ana nejo, <<Laitoriani, iyieu nikimpotu nkima metodou te chumata, metumuta ninche?>>

⁵⁵Neiwuatuwuatakino ninche, neing'ode nekusakan,

⁵⁶nepuo nkae ang.

⁵⁷Kore epuoito ninche to nkoitiei, nejoki ꞉ltung'ani obo Yeso, <<Kaairukurukore iyie ng'oji pooki nilo.>>

⁵⁸Nejoki ꞉Yeso, <<Keata mbariak udot, neata nkueeny e ai nkajijik enche, kake kore Nkerai e Ltung'ani meata neitepetaa nkue enye.>>

⁵⁹Nejoki likae, <<Rukurukoreeki nanu!>> Kake nejoki ꞉ilo, <<Laitoriani, nchooki ang'as machomo anukaa papa lai!>>

⁶⁰Nejoki ninye, <<Nchoo lmeneng'a enukaa lmeneng'a lenche. Kake kore iyie, chomo tilikoi lomon le nkitoria e Nkai!>>

⁶¹Nejoki sii ꞉likae tung'ani, <<Laitoriani, kaairukurukore iyie, kake nchooki ang'as maichoo lesere ltung'ana le nkang ai!>>

⁶²Nejoki ꞉Yeso ninye, <<Kore ltung'ani otang'asa apik nkaina enye nturet e lchampa[28], neitoki aiwuatuwuata anang silig, naa meichiaakino ninye nkitoria e Nkai.>>