Read Samburu Yoana 1 Bible Online

Yoana 1 - Samburu bible

Yoana 1

¹Kore apa ta ng'asunoto naa ketii apake Rerei, netii ilo Rerei tenebo o Nkai naa Nkai ilo Rerei.

²Ketii apa ninye tenebo o Nkai ta ng'asunoto.

³Naa te ninye eitibiraki ntokitin pooki, nemeatae ntoki naitibiraki taatua ntokitin naaitibiraki metii ninye.

⁴Naa ketii atua ninye nkichui, naa kore inia kichui naa ninye wong'an ee ltung'ana.

⁵Neong'u wong'an taatua naimin, neitu emir ꞉naimin inia wong'an.

⁶Keatae apa ltung'ani oirruayie Nkai oji Yoana.

⁷Keyewuo apa ninye payie eaku limunoto, aliki ltung'ana sipata naipirita naduo wong'an, payie etum ninche pooki aairuko te ninye.[1]

⁸Kore apa ninye naa mara inia wong'an, kake keyewuo alikoo sipata naipirita wong'an,

⁹inia wong'an nadede nalotuta apa nkop, naa ninye naicho pooki ng'ae wong'an.

¹⁰Kore apa ilo Rerei naa ketii apake nkop, neitibiraki nkop aaimunyie ninye, kake eitu eyielou nkop ninye.

¹¹Naa keyewuo apa ninye nkop ee ltung'ana lenche, kake eitu eng'amaa ꞉ninche ninye.

¹²Kake kore pooki oang'amaa neiruk ninye, neicho metaa nkera e Nkai.

¹³Ketiiwuaki ninche metaa nkera e Nkai, kake mara te ichoi e ltung'ani. Namara sii te yieunoto ee ltung'ana etiiwuaki ninche tanaa sii ne lee, kake Nkai makoon natiiwua ninche.

¹⁴Neaku ilo Rerei ltung'ani nemany atua iyioo. Nikidol nkitoo enye, inia kitoo natum ake ꞉nkerai nabo inoti ta Papa lenye. Naa kebore ninye munyani o ndedei.

¹⁵Naa ketilika ꞉Yoana ltung'ana sipata naipirita ninye ebuak ejo, <<Ele taa apa alimuta payie ajo, <Ketii kenya lolotu tesiedi nanu laaisul, amu ketii apake ewuon maatae nanu.> >>

¹⁶Naa kore amu kebore ninye munyani o ndedei, ikitang'amaitie sii munyani ejing mpaach e nkae munyani te inia kuputakinoto enye.

¹⁷Amu kore Nkitanapat naa keichorua Nkai aimunyie Musa, kake kore munyani o ndedei neimunyie Yeso Kristo.

¹⁸Nemeatae hoo obo otodua Nkai aikata, mara ake inia kerai enye nabo inoti.[2] Netii tenebo o Papa lenye, naa ꞉ninye apa /oibalunyie.

¹⁹Ana taa limunoto e Yoana, payie erewaki apa ꞉larikok loo Lyiaudi ootii Yerusalem laitainok la lasar o laretok lenche ta nkaji e Nkai, meipara ninye aajoki, <<Ng'ae ira iyie?>>

²⁰Neliki ꞉Yoana ninche sipata eitu emiki ajoki kore sipata naa ana, <<Mara nanu ilo Aitejeunoni oanyutae.>>

²¹Neipar ninye aajoki, <<Naaku ng'ae ira iyie? Ira Elija?>> Nejoki, <<Mara.>> <<Ira ilo oiboni le Nkai oaanyutae?>> Newoliki ajo, <<Mara.>>

²²Neitoki aajoki, <<Naaku ng'ae ira iyie? Towoliki iyioo nikijoki lolo ooirriutua iyioo. Ng'ae dei ijo iyie ira?>>

²³Newoliki ajoki, <<Kara <ltoilo le ilo obuakita to lkees, Entibira aaipidaki nkoitiei naimu Laitoriani tenelotu!> ana natejo apa loiboni le Nkai Isaya.>>

²⁴Kore lolo ooterewuaki, naa Lparisayo eing'uaa.

²⁵Neipar Yoana aajoki, <<Amaa tanaa mira iyie Mesia, nimira Elija anaa ilo Oiboni le Nkai oaanyutae, aanyo payie impatisicho?>>

²⁶Nejoki ꞉Yoana, <<Kaipatis nanu ta nkare, kake ketii atua ntae lobo limiyielolo aajo ng'ae.

²⁷Naa ninye olotu tesiedi nanu, naa maaichiaakino payie alaku nkeenita ee namuka enyena.>>

²⁸Naa ketaasate apa kuna baa pooki te Betania natii mbata e nkiliepunoto e ndama, e lkokun le sere e Yordan, inie neipatisichere Yoana.

²⁹Kore mparri naijipita inia, nedol ꞉Yoana Yeso elotuta aipidakino ninye nejo, <<Leilo Lkuo leker le Nkai, oworu nkop ng'ok pooki!

³⁰Naa ninye taa apa aimakita payie ajo, <Ketii kenya lolotu tesiedi nanu laaisul amu ketii apake ewuon maatae nanu.>

³¹Neitu apa ayielou ajo ng'ae ninye, kake kayewuo aipatisicho ta nkare payie eibalunyieki ninye too ltung'ana le Isirael.>>

³²Nelimu Yoana sipata enye ajo, <<Katoduaa Ltau Sinyati edou eing'uaa chumata te nkitanyanyukoto e nkutukurruk, newuenie ninye.

³³Naa eitu ayielou nanu ninye, kake kore ilo laaterewua maipatisicho ta nkare, naajoki, <Kore ilo lidol edoki Ltau Sinyati awuenie, naa ninye olotu aipatisicho ta Ltau Sinyati.>

³⁴Kore ana, naa Katoduaa, nalikoo sipata nchere kera ninye Nkerai e Nkai.>>

³⁵Kore ta mparri naijipu inia, neitache aitoki Yoana teinie o looiteng'eni lenyena oare.

³⁶Kore eimita Yeso inie neing'or ꞉Yoana nejo, <<Looldo Lkuo leker le Nkai!>>

³⁷Kore payie ening ꞉lolo ooiteng'eni lenyena oare inia, nepuo aairukurukore Yeso.

³⁸Nenang Yeso silig, neing'or eirukurukore nejoki, <<Nyo iyieitata?>> Nejoki, <<Rrabi, kaji ewuenie?>> Kore apa <<Rrabi>> to kutuk enche naa Laiteng'enani.

³⁹Newoliki ajoki, <<Wootu entodol.>> Nepuo ninche aadol inie newuenie ꞉ninye. Kore inia kata naa kenyikaa aaku saai oong'uan e siran, naa ketowuana tenebo o ninye inia parri.

⁴⁰Kore lobo loo lolo ootining'o apa lomon le Yoana, neirukurukore Yeso, naa Andirea lalache Simon Petero.

⁴¹Kore ntoki ekue nataasa Andirea naa keing'orua lalache lenye Simon, nejoki, <<Kitumo ilo Aitejeunoni oanyutae.>> Kore to nkutuk ee Lgirriki naa keji ilo Aitejeunoni Kristo.

⁴²Nerikoki ilo alache lenye Yeso. Neing'or ꞉Yeso ninye nejoki, <<Iyie Simon, layieni le Yoana. Ikiji kenya Kepa.>> Kore Kepa ta nkae kutuk naa Petero.

⁴³Kore ta mparri naijipu inia, keyieu apa Yeso neing'uaa inie, alo Galilaya. Netum Pilipo, nejoki, <<Wou rukurukoreeki!>>

⁴⁴Naa kemanya apa Pilipo lkerenket oji Betesaida, omanya sii Andirea o Petero.

⁴⁵Netum ꞉Pilipo Nataniel, nejoki, <<Kitumo ilo oigero apa ꞉Musa too Nkitanapat, neigero sii Loibonok le Nkai aajo kelotu. Naa ninye taa Yeso le Nasaret, layieni le Yosep.>>

⁴⁶Neipar ꞉Nataniel ajoki, <<Nasaret! Keatae sa ntoki supat napuku te inie?>> Nejoki ꞉Pilipo, <<Wou toduaa!>>

⁴⁷Nedol ꞉Yeso Nataniel elotuta, nejo kulo omon oipirita ninye, <<Lele ltung'ani odede le Isirael, lemetii sapare atua ninye!>>

⁴⁸Nejoki ꞉Nataniel Yeso, <<Aji inko tinikiyielo?>> Newoliki ꞉Yeso ajoki, <<Kaatoduaa ewuon iwuenita taabori lng'aboli, eitu kimpot ꞉Pilipo.>>

⁴⁹Nejoki ꞉Nataniel, <<Laiteng'enani, Ira iyie Nkerai e Nkai, nira Lkinkii lo locho le Isirael!>>

⁵⁰Nejoki ꞉Yeso, <<Amaa, iruk dei iyie tankaraki inia naatiaka kaatoduaa iwuon taabori lng'aboli? Ewuon idol kenya mbaa kutuaa e nking'asia, naalang kuna!>>

⁵¹Neitoki Yeso ajoki, <<Kedede, kedede kajoki ntae, idoldol kenya chumata ebolo o lmalaikani le Nkai eiliep, nedoki Nkerai e Ltung'ani.>>