Read Samburu Yoana 10 Bible Online

Yoana 10 - Samburu bible

Yoana 10

¹<<Kajoki ntae sipata nadede, kore ꞉ltung'ani lemejing'u sum ee nkerra aimu nkutuk, kake kediraki adoki ta nkae ng'oji, naa kera ꞉ninye lapurroni, nera laisimani.

²Kore ltung'ani laa nkutuk e sum ake eeim tenejing sum, naa lchekut loo nkerra.

³Neboloki ninye ꞉larriponi nkutuk e sum, nening ꞉nkerra ltoilo lenye. Naa keipotu ꞉ninye nenia kerra enyena taa nkarn enche, nerikoo aipungie.

⁴Kore payie eipung'ie nenia kerra enyena pooki, nelo tekue ninche, neirukurukore ꞉nenia kerra ninye, amu keyielo ltoilo lenye.

⁵Meirukurukore ltung'ani leiching'a, kake keisig aaing'uaa ninye, amu meyielo ltoilo leiching'a.>>

⁶Ketilika ꞉Yeso ninche ana kitanyanyukoto, kake eitu ening'u ninche mbaa naalikita.

⁷Neitoki Yeso ajoki ninche, <<Kajoki ntae sipata nadede, kara nanu nkutuk e sum najing'akinyieki nkerra.

⁸Kore lkulie pooki ootuo tekue nanu naa lapurrok o laisimak, kake eitu ening ꞉nkerra ninche.

⁹Kara nanu ltim. Kore pooki ng'ae ojing'u aimu nanu naa keitajeuni, newuon ta lakunoto, netum ng'oji nedaare.[10]

¹⁰Kore lapuroni naa kelotu ake ninye, apurroo, near, neitarruoo. Kake kayewuo nanu payie etum ninche nkichon, netum ebore.

¹¹<<Kara nanu lchekut supat. Kore lchekut supat naa keitai nkichui enye tankaraki nkerra.

¹²Kore ltung'ani oigero naa kedol suyian elotu naa kore tankaraki namara ninye lchekut openy nkerra, neing'uaa nkerra aisig, nelotu suyian aibung nkerra nesachaa.

¹³Keisig ltung'ani oigero aing'uaa nkerra amu mara nkerra toki te ninye.

¹⁴Kara nanu lchekut supat naa kayielo nkerra ainien, naayielo sii nanu ꞉ninche,

¹⁵ana naayielo nanu Papa, nayielo sii nanu ninye. Naa kaitai nanu nkichui ai tankaraki nkerra.

¹⁶Kaata sii nkulie kerra namara nana boo, naa kariku ninche, nening ltoilo lai, neaku mboo nabo naata lchekut obo.

¹⁷Kaacham nanu ꞉Papa tankaraki naitai nkichui ai, paatum aitoki atang'amai.

¹⁸Meatae ltung'ani laar nanu matua, mara ake kaichooyie koon maatari matua. Kaata sipata naichoorie nkichui ai, naata sii aitoki sipata nang'amarie. Inia aaitanapa Papa.>>

¹⁹Nepuku aitoki nchankar taatua larikok loo Lyiaudi tankaraki e lolo rerei ootejo Yeso.

²⁰Kore lkumo lenche nejo, <<Keata lairirua, nemada! Nyo iwuenini ainining ninye?>>

²¹Kake nejo lkulikae, <<Meatae ltung'ani oata lairirua oiro aikonyi! Amaa, keatae sa lairirua oidim atobolo nkonyek ee lmodook?>>

²²Kore ta ng'amata apa nairobi nkop te inia kop, naaku inia kata enyaitae ntasim e nkitisinyata e nkaji e Nkai[11] te Yerusalem. Kore mparri nabo, nemanaa Yeso taatua nkaji e Nkai to ng'oji neji ne Solomon natii suntai mbata nabo, netii lng'opeta nkae.

²⁴Nepuonu larikok loo Lyiaudi aaigeru Yeso nejoki, <<Anu kenya ipik iyioo lng'ach, milimu sipata? Kore tanaa ira iyie ilo Aitejeunoni oaanyutae oji Kristo, Tiliki iyioo aibalunyie.>>

²⁵Newoliki ajoki, <<Aidipa apa atiliki ntae, nimirukuruk. Kore asat naasita ta nkarna e Papa lai naa kelimu sipat naipirita nanu,

²⁶kake mirukuruk amu mirara nkerra ainien.

²⁷Kore nkerra ainien naa kening ltoilo lai, nayielo ninche, naa kaairukurukore nanu.

²⁸Kaicho nanu ninche nkichon nemeiting, nemeidaari aikata, nemeatae loidim atowuapai ninche ta nkaina ai.

²⁹Kore Papa lai laaichoo nanu ninche, naa keisul pooki, nemeatae loidim atowuapai ninche ta nkaina e Papa.

³⁰Kore nanu o Papa, naa nabo kira.>>

³¹Nerrapu aitoki larikok loo Lyiaudi soito aanang ninye.

³²Nejoki ninche, <<Kaitodua ntae asat kumo supati naaing'uaa Papa, kaa nabo te nenia asat kinang'ieng'ie soito?>>

³³Newoliki aajoki, <<Mara tankaraki e asata supat kinang iyie too soito, kake tankaraki nitedia Nkai! Amu kore ira ake ltung'ani, nintaa koon Nkai!>>

³⁴Newoliki Yeso ajoki, <<Amaa, meigero tee Lkigerot Sinyat lirukurukorere nchere, <Katejo irara ntae nkaitok>?

³⁵Amaa lolo ooyewuo ꞉rerei le Nkai netii, tanaa keipoto ꞉Nkai ninche ajo nkaitok, nemeitaa lkigerot meitoki,

³⁶aji sa inkoko tinijiejo ilo oitisinya Papa, neirriu meyeu nkop ketedia Nkai tankaraki natejo, <Kara Nkerai e Nkai>?

³⁷Kore tanaa maasita asat e Papa lai, emikurukuruk!

³⁸Naa tanaa kaasita, abaki tanaa mikirukuruk nanu, eruko nenia asat payie eyielouu, nining'ung'u aajo ketii Papa atua nanu, natii nanu atua Papa.>>

³⁹Nenyok aitoki aaibung ninye, kake neing'uaa ninche.

⁴⁰Nerrinyo aitoki Yeso alang'aki ildo kokun le sere e Yordan, inie apa neibatisie ꞉Yoana ltung'ana, nebik teinie.

⁴¹Nepuonu ltung'ana kumo neti ninye. Nejo ninche, <<Kore abaki eitu eas ꞉Yoana Laipatisani mbae nabo naitodolu nkitoo enye, kake kore pooki natejo naipirita ele tung'ani naa kedede.>>

⁴²Neiruk ꞉ltung'ana kumo Yeso te inie.