Read Samburu Yoana 11 Bible Online

Yoana 11 - Samburu bible

Yoana 11

¹Ketii apa ltung'ani oji nkarna enye Lasaro otomoyia, oamanya lkerenket obo kini oji Betania, inie nemanya sii Maria o nkanache enye Marta.

²Kore apa Maria naa nkanache e ilo tung'ani oji Lasaro omuai. Naa ninye napa naelie Laitoriani lata narropili, nejut nkejek enyena taa lpapit lenyena.

³Neirruaaki ꞉nenia anachera Yeso lkilikuai aajoki, <<Laitoriani, kemuai sotua lino.>>

⁴Kore payie ening ꞉Yeso nejo, <<Kore ana moyian naa mara naya ninye, kake ketaase ana paa kore te inia moyian neisisi Nkai, nelioi nkitoo e Nkerai e Nkai.>>

⁵Kore apa Yeso naa kecham Marta o nkanache enye o Lasaro,

⁶naa kore payie ening ajo kemuai Lasaro, nebik teinie apa netii nkulie perot are.

⁷Kore payie eim nenia perot, nejoki looiteng'eni lenyena, <<Matirrinyoto aapuo Yudea.>>

⁸Nejoki ꞉looiteng'eni lenyena, <<Laiteng'enani, eji det dei ake kitejo Lyiaudi entar tua kinang too soito te inie, naaku inie intoki alo?>>

⁹Newoliki ꞉Yeso ajoki, <<Amaa, mara saai tomon oare natii mparkiji? Kore ltung'ani olo te mparkiji nemerrorro, tankaraki nadolita wong'an e ana kop.

¹⁰Kake kore pooki ng'ae olo te nkuarie naa kerrorro amu metii wong'an atua ninye.>>

¹¹Kore payie eidip atejo inia, neitoki ajoki, <<Eilure sotua lang Lasaro, kake kalo ainyoyie ninye.>>

¹²Nejoki ꞉looiteng'eni lenyena, <<Laitoriani, tanaa keilura naa kesupatu.>>

¹³Kore ntoki naimakita Yeso naa lkiye le Lasaro, kake nejo looiteng'eni lenyena keimakita ajo keilure ake too njuo.

¹⁴Neipidaki ꞉Yeso aliki ajo, <<Ketua Lasaro.

¹⁵Naa kore tankaraki ntae, kang'ida amu matii apa inie tenebo o ninye payie itumtum aairuko. Kake maapetin inie netii.>>

¹⁶Nejoki ꞉Tomas, ilo oji Lmaoi, lboitieii loo looiteng'eni lenyena, <<Maapetin payie kiye tenebo o ninye!>>

¹⁷Kore payie ebaki Yeso inie, neirrachu eata Lasaro mperot ong'uan taatua nkurarei.

¹⁸Kore apa Betania naa matejo kilomitani okuni ake etaaniki Yerusalem.

¹⁹Neotuo Lyiaudi kumo ooing'uaa inia bata aadol Marta o Maria, payie etum aaturumaki kop tankaraki lalache lenche.

²⁰Kore payie ening Marta ajo kelotuta Yeso neipung alo anang'are, kake newuon Maria ta nkaji.

²¹Nejoki ꞉Marta Yeso, <<Laitoriani, tanaa iti apake ene, anata eitu eye lalache lai!

²²Kake kore abaki taata kayielo ajo ikincho Nkai pooki niomonu.>>

²³Nejoki ꞉Yeso ninye, <<Kepiu aitoki lalache lino.>>

²⁴Newoliki ajoki, <<Kayielo dei ajo kepiu ta nkata naitipiuni ltung'ana ta mparri e nkiting'oto.>>

²⁵Neitoki Yeso ajoki, <<Kara nanu mpiunoto o nkichui. Kore lolo lairuk nanu, abaki teneye, naa keichu,

²⁶naa kore pooki ng'ae oichu, naairuk nanu nemeye aikata. Iruk iyie ana?>>

²⁷Newoliki ajoki, <<Ee Laitoriani, kairuk ajo ira iyie ilo Aitejeunoni oji Kristo, Nkerai e Nkai, ilo olotu apa nkop.>>

²⁸Kore payie eidip Marta atejo ana, nelo aipot nkanache enye Maria, nerojaki ajoki, <<Ketii Laiteng'enani ene naa ikimpotito iyie!>>

²⁹Kore payie ening Maria inia, neinyuototo asioki, nelo netii Yeso.

³⁰Kore inia kata, ewuon eitu elotu Yeso ajing'u laduo kerenket le Betania, kake etii ake naduo ng'oji netanang'are Marta.

³¹Kore payie edol laaduo tung'ana ooboitiere Maria ta nkaji aaitogol, aajo keipung'uto Maria asiooyo, neirukurukore ninye. Amu kejo apa ninche nkurarei eloito, aichir teinie.

³²Kore payie ebaki Maria netii Yeso nedol ninye nerriakino nkejek enyena, nejoki, <<Laitoriani, tanaa itii apake ene anata eitu eye lalache lai!>>

³³Kore payie edol ꞉Yeso Maria eichirita, nedol sii aitoki ajo keichirita ltung'ana le Yudea ooboitiere, neiseyie inia bae ltau lenye oleng, nenyamalu.

³⁴Neipar Yeso ninche ajoki, <<Aji inteperie ninye?>> Newoliki aajoki, <<Laitoriani, wou todua!>>

³⁵Neichir Yeso.

³⁶Nejo laaduo Yiaudi ootuo aaitogol ninche, <<Eng'ura netiu nchaman nacham ninye!>>

³⁷Kore lbata lenche nejo, <<Amaa ilo otobolo nkonyek e ilo tung'ani modooni, mara keidim aibooi Lasaro apa payie meye?>>

³⁸Neiseyie aitoki inia bae ltau le Yeso oleng, nelo abaki nkurarei. Naa kore inia kurarei naa nkapune neikenoki nkutuk to soit.

³⁹Nejo Yeso, <<Ewuang'ie soit!>> Kore Marta, nkanache ilo tung'ani otua, nejoki, <<Laitoriani, keisamisa taata amu mparri e ong'uan ana eper teinie!>>

⁴⁰Nejoki ꞉Yeso, <<Mara kaatilika ajoki tanaa iruk naa idol nkitoo e Nkai?>>

⁴¹Neiwuang'ie ninche ilo soit. Neapu ꞉Yeso nkonyek aimariri chumata, nejo, <<Papa, kaicho nache tankaraki nikitining'o.

⁴²Kayielo ajo ikining chiaake nkatitin pooki, kake atejo ana tankaraki kulo tung'ana ooitachoo tene, payie etum aairuko aajo ikirriwua iyie nanu.>>

⁴³Kore payie eidip atejo inia, nebuak to ltoilo sapuk ejo, <<Lasaro, mpung'u!>>

⁴⁴Kore ilo tung'ani otua nepuku eirina nkaik o nkejek too lkiiyat laa nankan, neirina sii aitoki nkomom enye ta nkae anka. Nejoki ꞉Yeso ninche, <<Entalaku, ninchocho mechomo.>>

⁴⁵Kore lkumo laa laaduo tung'ana le Yudea ootuo aaisabaki Maria nedol nenia naataasa Yeso, neiruk ninye.

⁴⁶Kake kore lbata lenche nepuo aaliki Lparisayo naataasa Yeso.

⁴⁷Neicho laitainok kutuaa la lasar o Lparisayo, neipotu nkiguana e lkiama loo lpayiani nejo, <<Kaa taa kias? Keasita ele tung'ani mbaa kumo e nking'asia naaitodolu nkitoo enye!

⁴⁸Kore tanaa ikincho ninye mechomo kue aiko nchi, neiruk ninye ꞉ltung'ana pooki, naa kepuonu ltung'ana le nkop ee Rroman near Ng'oji sinyati o ltung'ana lang!>>

⁴⁹Kore lobo lenche oji nkarna Kayapas, laa ninye laitainoni kitok la lasar te ilo ari, nejo, <<Meitoki hooyia ining'ung'u ntae!

⁵⁰Aa minkenken ntae aajo naikach teneye ltung'ani obo anang locho alang tenemuta locho pooki?>>

⁵¹Eitu ejo ninye ana bae makoon, kake kore nara ninye laitainoni kitok la lasar te ilo ari, neibonu ajo keye Yeso anang locho pooki.

⁵²Namara ilo ocho apeny, kake payie eitoki ayau aitaa nabo nkera e Nkai naatasachari.

⁵³Kore ang'asu inia parri, nechamaa larikok loo Lyiaudi aayiaya nkoitiei naarie Yeso metua.

⁵⁴Naaku merekure eidim Yeso achomo taatua larikok loo Lyiaudi edolitae. Kake neing'uaa inie, nelo nkop nanyikita lkees nebaki lkerenket oji Epiraim, nebik teinie tenebo o looiteng'eni lenyena.

⁵⁵Netinyikua inia kata ntasim e Pasaka, naaku kore ewuon eng'or nkata, nepuo ltung'ana kumo Yerusalem aaitorropil ate payie eaku keichiaakino inia tasim.

⁵⁶Neyiaya Yeso, naa kore etii ninche nkaji e Nkai, neipara maate ejo, <<Kaa pasa ijoijo ntae? Melotu ꞉ninye ntasim?>>

⁵⁷Kore laitainok la lasar o Lparisayo neitanapicho nchere teneatae ltung'ani oyielo netii Yeso, neliki ninche payie etum aaibung'a.