Read Samburu Yoana 12 Bible Online

Yoana 12 - Samburu bible

Yoana 12

¹Kore eng'or mperot ile payie ebaki ntasim e Pasaka, nebaki Yeso Betania, inie nemanya Lasaro, ilo tung'ani apa oitipiwua ꞉Yeso too lootuata.

²Neitibiraki ꞉ninche Yeso ndaa e teipa teinie. Kore Marta, neichooyo ndaa netii sii Lasaro aa lobo loo lolo oowueni te misa tenebo o Yeso.

³Nerrapu Maria lkidong obore lata narok narropili naji nardo, nagol nkinyiang'a oleng, neelie nkejek e Yeso, nejut taa lpapit lenyena le nkue. Neiput ꞉rropili e inia lata nkaji pooki.

⁴Kake kore Yudas Isikariot, lara lobo loo looiteng'eni le Yeso, ilo laa ninye kenya olo alikoo Yeso nejo,

⁵<<Aanyo payie eitu emiri ana lata, aitam ropiyiani naawuana laata e lari obo, neichori nenia ropiyiani laisinak?>>

⁶Ketejo ninye ana mara tankaraki nayieuwuoki laisinak, kake tankaraki nara lapuroni. Ninye echi onap lbene loo ropiyiani, nepurroo ake chiaake ntoki napiki ilo bene.

⁷Kake newoliki ꞉Yeso ajoki, <<Tung'ai ninye, payie eisudoo inia natelekunye metaa ne mparri e nukaroto ai.

⁸Icheche ake aata laisinak tenebo o ntae kake mikicheche aata nanu.>>

⁹Neyielou ltung'ana kumo loo Lyiaudi aajo ketii Yeso Betania, nepuo inie namara ake tankaraki Yeso, kake payie edol Lasaro, ilo tung'ani oitipiwua ꞉Yeso too lootuata.

¹⁰Nechamaa laitainok kutuaa la lasar aar Lasaro metua,

¹¹amu tankaraki ninye payie epuoito ꞉ltung'ana kumo loo Lyiaudi neti Yeso, neiruk ninye.

¹²Kore ta mparri naijipu inia payie ening ilo turrur kitok oyewuo inia tasim, aajo kelotuta Yeso Yerusalem,

¹³negilu ninche mbene e ltunkai, neipung aanang'are ninye, ebuakita aajo, <<Hosana! Emayiana ilo olotu ta nkarna e Laitoriani, Lkinkii le Isirael!>>

¹⁴Kore payie etum ꞉Yeso lkurrarru le sikiria nedir awuenie nkeper, ana naigeroki aajo,

¹⁵<<Miurechio, ntito e Sion![12] Ng'ura, lele Lkinkii lino olotu, ewuenie nkeper e lkuraru le sikiria.>>

¹⁶Eitu apa ening'u Looiteng'eni lenyena inia bae tekue, kake kore kenya payie eichopokini Yeso nkitoo sapuk, neparru aajo keigero kuna baa naipirita ninye neparru sii inia naitaasaki.

¹⁷Kore apa lturrur otii tenebo o Yeso payie eipot Lasaro to nkurarei neitipiu too lootuata, nepuo kue elikoo sipata e inia nataase.

¹⁸Inia payie eotuo ltung'ana kumo aanang'are Yeso, amu ketining'o inia bae e nking'asia naitodolu nkitoo enye.

¹⁹Nejokino Lparisayo, <<Meitoki taa katukul itumutoto! Eng'ura ja, etodotunyie ake nkop pooki airukurukore!>>

²⁰Kore apa lbata loo lolo tung'ana oochomo Yerusalem aasai Nkai ta nkata e ntasim, naa Lgirriki.

²¹Nepuo ninche netii Pilipo, ilo oing'uaa lkerenket le Betesaida otii Galilaya, nejoki, <<Lokitok, ikiyieu payie kidol Yeso.>>

²²Nelo Pilipo aliki Andirea, nepuo pukura oare aaliki Yeso.

²³Newoliki Yeso ninche ajoki, <<Etabawua taata nkata nailiepieki Nkerai e Ltung'ani.

²⁴Kajoki ntae sipata nadede, kore teneitu edoki lantararai le nkano nkop neye, nebik ake era lantararai obo, kake kore tanaa keye neiu lantarara kumo.

²⁵Kore ilo oacham nkichon enye tana kop neiminie nkichui enye, kake kore ilo lemeiken nkichon enye aitaa toki tana kop, neisudoyie nkichui enye ntarasi.

²⁶Kore ꞉pooki ng'ae laaisiaai nanu, nchoo sii elo kue airukurukore nanu, payie eaku kore natii nanu netii sii laisiaayiani lai. Kore ꞉pooki ng'ae laaisiaai nanu, naa keicho ꞉Nkai nkanyit.

²⁷<<Kenyamal taata ltau lai, naa kajua sa? Kajo sa, <Papa, ntejewuaki tana kata?> Majo amu, kore apa payie ayewuo, naa payie atum aimai ele sina.

²⁸Papa, intodolu nkitoo e nkarna ino!>> Nelotu ltoilo oing'uaa chumata ejo, <<Kaidipa aitodolu, naa kaigil ake aitoki.>>

²⁹Kore lturrur oitache teinie, nening ilo toilo, nejo lbata lenche, <<Keikurrukurro>>, kore lkulie nejo, <<Lmalaika oirorie ninye!>>

³⁰Nejoki ꞉Yeso ninche, <<Mara tankaraki nanu payie etining'ie ilo toilo, kake tankaraki ntae.

³¹Kore taata, keiguanareki ana kop, naa taata emirari ilo oitore ana kop aaipung'ie aulo.

³²Kake kore payie aailiepieki nanu tana kop[13], nayiataki koon ltung'ana pooki.>>

³³Ketejo ninye ana aitodolu mpukunoto e lkiye oye.

³⁴Nejoki ꞉ilo turrur, <<Ikitining'o eisomakini iyioo tee Nkitanapat e Nkai aajo, kebik ilo Aitejeunoni oanyutae ntarasi. Naaku, aji eiko payie ijo iyie keiliepieki Nkerai e Ltung'ani tana kop? Ng'ae dei inia Kerai e Ltung'ani?>>

³⁵Newoliki ꞉Yeso ajoki, <<Ewuon etii wong'an tenebo o ntae te nkini kata. Naaku enchom iatata inia wong'an, payie meirachu ake ntae naimin. Amu kore ilo olo taatua naimin nemeyielo neloito.

³⁶Kore ewuon iatata wong'an, eruko wong'an, payie iakuku nkera e wong'an.>> Kore payie eidip Yeso airoro neing'uaa inie, nelo aisudorie ninche.

³⁷Kore abaki etaasa Yeso mbaa kumo e nking'asia naaitodolu nkitoo enye edolita ꞉ninche, neany ake eyia eiruk ninye.

³⁸Ketaase ana payie ebaya lapa rerei lo loiboni le Nkai oji Isaya peejo, <<Laitoriani, ng'ae oiruko lkilikuai lang, naa ng'ae eibalakinyie ꞉Laitoriani nkaina enye nagol?>>

³⁹Naaku tankaraki ana payie meidim aairuko, amu ketejo Isaya aitoki ta nkae ng'oji,

⁴⁰<<Keitomodoo ꞉Nkai nkonyek enche neitogolo ltauja lenche, payie meaku, kedol too nkonyek enche, nening'u taa ltauja lenche, neibelekenya, naitejeu nanu ninche.>>

⁴¹Ketejo apa Isaya kuna baa tankaraki ketodua nowua nkitoo e Yeso, nelimu mbaa naipirita ninye.

⁴²Kore siake etiu nejia, keiruko abaki ꞉larikok kumo loo Lyiaudi Yeso, kake eitu elimu aaibalie nkurukoto enche tankaraki naurie aajo kemiraa ninche ꞉Lparisayo aaipung'ie te Sinagogi.

⁴³Amu kore apa ninche, kecham rrepeta ee ltung'ana aaitalang ne Nkai.

⁴⁴Nebuak Yeso ajo, <<Kore pooki ng'ae laairuk nanu, naa mara ake nanu eiruko, kake keiruko abaki ilo laairriwua.

⁴⁵Kore ilo laadol nanu, naa etoduaa ilo laairriwua.

⁴⁶Kayewuo nanu aaku wong'an e nkop, paa kore pooki ng'ae laairuk nanu nemeitoki awuon taatua naimin.

⁴⁷Naa kore tenening ltung'ani rereii lainien nemeibung, naa madung'oki nanu ninye nkiguana, amu eitu alotu adung'oki nkop nkiguana, kake kayewuo payie aitejeu.

⁴⁸Kore ilo laany nanu namaang'amaa, naa keata lodung'oki ninye nkiguana, ilo rerei lairoro odung'oki ninye nkiguana ta mparri e nkiting'oto!

⁴⁹Amu eitu airo rereii lainien makoon, kake Papa laairriwua naa ninye laaitanapa inia najo o nairo.

⁵⁰Naa kayielo ajo kore naaitanapa Papa naa payie ayeu nkichon nemeiting. Naaku kore pooki najo, najo ake ana naatiaka Papa tejo.>>