Read Samburu Yoana 14 Bible Online

Yoana 14 - Samburu bible

Yoana 14

¹<<Emincho ltauja linchi enyamalu, eruko Nkai nikirukuruk sii nanu.

²Kore nkaji e Papa, ketii lgilat kumo. Naa amaa tenemetiu duaake nejia, kaliki sa duaake ntae ajoki kalo inie aitibiraki ntae ng'oji?

³Naa kore paalo naidip aitibiraki ntae ng'oji, nachukunyie aitoki aya ntae natii, paa kore ng'oji natii nanu, naaku inie sii itii ntae.

⁴Kore inie naloito, naa iyielolo nkoitiei nalo.>>

⁵Nejoki ꞉Tomas ninye, <<Laitoriani, mikiyielo iyioo niloito iyie, naaku kaji kinko tinikiyielo nkoitiei?>>

⁶Nejoki ꞉Yeso, <<Kara nanu nkoitiei o ndedei o nkichui. Meatae hoo lobo olotu netii Papa mara nanu eimayie.

⁷Kore tanaa ikiteyieloto nanu, iyielou sii Papa lai. Kore ang'asu taata iyielolo ninye, nitoduaa sii ninye.>>

⁸Nejoki ꞉Pilipo, <<Laitoriani, ntoduaa iyioo Papa, naa keitiemu iyioo inia.>>

⁹Nejoki ꞉Yeso, <<Pilipo, kataa nanu tenebo o ntae nkata nabanyi, newuon ake mikiyielo? Kore pooki ng'ae laatodua nanu, naa Papa etodua. Aji naa inko payie ijo iyie, <Ntoduaa iyioo Papa>?

¹⁰Miiruk dei iyie ajo katii nanu atua Papa, netii Papa atua nanu? Kore rereii lajokita ntae, mairo makoon, kake Papa laatii atua oasita asat enyena.

¹¹Erukooki nchere katii atua Papa, netii Papa atua nanu. Naa tinimikurukuruk te inia, erukooki naa tankaraki nenia asat.

¹²Kajoki ntae sipata nadede, kore ilo laairuk nanu naa keas sii ninye nenia asat naas nanu, neas abaki mbaa kutuaa naalang kuna, amu kaloito netii Papa.

¹³Naa kore pooki niomonunu ta nkarna ai naa kaitaas ntae, payie etum Papa nkisisa te Nkerai enye.

¹⁴Kore ntoki pooki nikiomonmon ta nkarna ai, naa kaas nanu.

¹⁵<<Kore tanaa ikichamcham, nimbung'bung nkitanapat ainien,

¹⁶naa kaomon Papa meichoo ntae likae Aretoni, neicho metaa tenebo o ntae ntarasi.

¹⁷Kore ilo Aretoni naa Ltau oitodolu ndedei. Meidim nkop atang'amai ninye, amu medol nemeyielo. Kake iyielolo ntae ninye amu kewuon tenebo o ntae, nemany atua ntae.

¹⁸Maing'ua nanu ntae irara okichono, kake kalotu nitii.

¹⁹Kore te nkini kata, maaitoki ꞉nkop adol, kake kore ntae naa ikidoldol. Kore amu kaichu nanu, inchuchu sii ntae.

²⁰Kore payie ebau inia parri, niyielouu aajo kati nanu atua Papa lai, nitii ntae atua nanu, natii sii nanu atua ntae.

²¹Kore loata nkitanapat ainien neibung, ninye laacham. Naa kore laacham, nechamu ꞉Papa lai, nachamu sii nanu ninye naibalakinyie koon.>>

²²Nejoki ꞉Yudas, namara taa Yudas Isikariot, <<Laitoriani kaji eiko payie imbalakinyie iyioo koon, nimimbalakinyie nkop?>>

²³Newoliki ꞉Yeso ajoki, <<Kore pooki ng'ae laacham nanu, naa keibung rerei lai, nechamu ꞉Papa lai ninye, nikipuonu neti, nikiwueni tenebo.

²⁴Kore pooki ng'ae lamaacham nanu naa meibung rereii lainien. Amu kore ele rerei lining'itoto naa mara lai koon, kake keing'uaa Papa lai laairriwua.

²⁵<<Katilika ntae kuna baa ewuon atii tenebo o ntae.

²⁶Kore ilo Aretoni aa Ltau Sinyati, oreu ꞉Papa ta nkarna ai, naa keiteng'en ntae ntokitin pooki, neitoki sii aitaparru ntae mbaa pooki natilika apa ntae.

²⁷<<Kaing'uaki naa ntae seriani, kaicho ntae seriani ai. Namaicho nanu ntae seriani ana neiko nkop teneicharu. Emincho ltauja linchi enyamalu, naa emiurieicho sii.

²⁸Itining'o apa paajoki ntae, <Kaloito, naa kaitoki achukunyie alotu nitii.> Kore tanaa ikichamcham anata aa ing'idada tankaraki naloito neti Papa, amu keikitok ninye alang nanu.

²⁹Katilika taata ntae ana ewuon eitu easai, payie teneasai nirukuruk.

³⁰Merekure airorie ntae mbaa kumo, amu kelotuta ilo oitore ana kop. Meata ninye ngolon ta nanu,

³¹kake inia ake naaitanapa Papa aas, payie eyielou nkop ajo kacham nanu Papa. Enyuoto, matung'ai ene ng'oji.