Read Samburu Yoana 15 Bible Online

Yoana 15 - Samburu bible

Yoana 15

¹<<Kara nanu lmusabibu odede, naa Papa oitacheki ilo champa lo lmusabibu.

²Kore lng'asula pooki lai lemejing ꞉lng'anayio, nedung'oo aiturraa. Naa kore lng'asula ojing lng'anayio, neng'ur aitibir payie etum lng'anayio kumo aatijing.

³Indipa apa aataa supati tankaraki rerei latiaka ntae.

⁴Entewueni taatua nanu, nawuon sii nanu taatua ntae. Kore ana nemeidim lng'asula atumo lng'anayio ewuon apeny, naa mindimdim sii ntae aatum lng'anayio tinimikitii atua nanu.

⁵<<Nanu lmusabibu nirara ntae lng'asul. Kore pooki ng'ae owuon taatua nanu, nawuon nanu taatua ninye, netum ninye lng'anayio kumo. Kore tanaa mitii tenebo o nanu, naa meitoki indimdim aataas.

⁶Kore pooki ng'ae lemewuon taatua nanu, netuwuana lng'asula onang'ari metoyio. Kore lng'asul ootuwuana lolo naa keiturruri nenang'akini nkima, nepejori.

⁷Kore tiniwuenini taatua nanu newuon rerei lai taatua ntae, naaku kore ntoki pooki niyieuu, entoomonu neichori ntae.

⁸Kore tinitumtum lng'anayio kumo niakuku looiteng'eni lainien, netum Papa lai nkisisa.

⁹Kore ana naatachama nanu Papa, nejia sii etiu nchaman ai taa ntae. Entewueni naa taatua nchaman ai.

¹⁰Tanaa imbung'bung nkitanapat ainien, niwuenini taatua nchaman ai, ana payie aaibung'a nanu nkitanapat e Papa, nawuenita taatua nchaman enye.

¹¹<<Katilika nanu ntae ana payie ewuon ng'ida ai taatua ntae, neboreii inia ng'ida niatata.

¹²Ana nkitanapata ai, nchere entachamata ana natachama nanu ntae.

¹³Meatae nchaman nalang no ltung'ani oitai nkichui enye, tankaraki sotuatin lenyena.

¹⁴Kore tiniasias naitanapa ntae, naaku irara sotuatin lainien.

¹⁵Merokure ajo ntae laisiaayiak, amu kore laisiaayiani naa meyielo neasita lkitok lenye. Kake katejo ntae sotuatin amu kore ntoki pooki natining'o ta Papa naa katilika apa ntae.

¹⁶Mara ntae likitegelutua nanu kake nanu otegelua ntae, naitoki aicho ntae nkitoo nipoyieyie aaiunyie lng'anayio. Kore lng'anayio liiu naa lng'anayio oobikoo, payie eicho ntae Papa ntoki pooki niomonunu ta nkarna ai.

¹⁷Kore nkitanapata ai taa ntae naa ana: entachamata.

¹⁸<<Kore tanaa keiba ntae nkop, entaparru aajo nanu apa eibayie tekue.

¹⁹Tanaa le nkop irara, anata echam ntae, eji atuwuana lenyena irara. Kake mirara lenyena amu kategelua ntae tana kop. Inia dei payie eiba ntae nkop.

²⁰Entaparru laduo rerei latiaka ntae nchere, <Meikitok laisiaayiani alang lkitok lenye.> Kore tanaa kaaitamaki nanu sina, keitami sii ntae. Naa tanaa keibung'a rerei lai, keibung sii rerei linchi.

²¹Kake keitaas ninche ntae nenia pooki tankaraki nirara lainien, amu meyielo ꞉ninche ilo laairriwua.

²²Kore teneitu alotu airorie ninche, anata meata naipari to ng'oki. Kake meata taata napaacharie ng'oki enche.

²³Kore laaiba nanu, keiba abaki Papa.

²⁴Kore tanaa eitu aas taatua ninche nenia asat neitu hoo aikata eas likae tung'ani, anata meata naipari ninche to ng'oki. Kake ketodua taata ninche kuna asat e nking'asia naaibai nanu, neibai sii Papa.

²⁵Kore eyia, ketaase inia payie ebaya inia naigero too Lkigerot sinyat lirukurukorere ajo, <Kaaibaitie nanu ninche pecheu.>

²⁶<<Kore payie elotu ilo Aretoni lairruu ꞉nanu eing'uaa netii Papa, aa taa Ltau le ndedei oing'uaa Papa, nelikoo sipata naaipirita nanu.

²⁷Kore sii ntae nintaii limunoto e sipata naaipirita nanu, amu itii apake tenebo o nanu ta ng'asunoto.