Read Samburu Yoana 16 Bible Online

Yoana 16 - Samburu bible

Yoana 16

¹<<Katilika nanu ntae ana payie mirriaa.

²Kemirari ntae aaipung'ie tee Sinagogini, naa kelotu nkata naa kore lolo oar ntae entuata, teneas nejia nejo Nkai eisiaita.

³Kore lolo tung'ana naa keas nejia amu meyielo Papa, namaayielo sii nanu.

⁴Kake katilika ntae kuna baa, paa tenebau inia kata niparrurru aajo katilika ntae. Neitu aliki ntae ta ng'asunoto, tankaraki ewuon apa atii tenebo o ntae.

⁵<<Kaloito taata netii ilo lairriwua, nemeatae lobo linchi laaipar ajoki, <Kaji iloito?>

⁶Kake kore naa taata amu katilika ntae, naaku keisinanio ltauja linchi oleng.

⁷Naa kaliki ntae ndedei nchere, keikach taa ntae tanalo nanu, amu tanamalo naaku melotu Laretoni nitii. Kake tanalo, nairriuu meeu nitii.

⁸Naa kore tenelotu neibalakinyie nkop ajo nyo ng'oki naa nyo sipata e Nkai o ndung'oto e nkiguana enye.

⁹Keibalakinyie ajo kore ng'oki naa maairuk nanu ꞉ltung'ana,

¹⁰neibalunyie sii aitoki ajo sipata e Nkai payie alo netii Papa nimikintokiki aadol.

¹¹Neibalakinyie sii ndung'oto e nkiguana nchere kore loitore ana kop, neidipaki aatudung'oki nkiguana torno.

¹²<<Ewuon aata mbaa kumo nayieu naliki ntae, kake mindimarere taata.

¹³Kake kore tenelotu Ltau le ndedei nerikoki ntae ndedei pooki, amu melimu ninye mbaa enyena makoon. Kore ake pooki naning, nelimu, neliki sii ntae mbaa naawuon epuonu.

¹⁴Kaailiepunyie ꞉ninye nanu, amu mbaa ainien eng'amaa neibalakinyie ntae.

¹⁵Kore pooki naata ꞉Papa naa nainien, naaku inia payie atejo keng'amaa Ltau Sinyati nenia baa ainien, neibalakinyie ntae.

¹⁶<<Kore te nkini kata mikintokiki aadol, kake kore aitoki te nkini nkata nikintokiki aadol.>>

¹⁷Neipara lbata loo looiteng'eni lenyena aajokino, <<Nyo dei ana najokita iyioo, <Kore te nkini kata mikintokiki aadol, kake kore aitoki te nkini kata nikintokiki aadol> o ana sii najo <Kaloito netii Papa>?>>

¹⁸Neitoki aipara aajokino <<Nyo dei ejoito <te nkini kata>? Mikiyielo hoo nejoito!>>

¹⁹Kore amu keyielo Yeso ntoki nayieu ninche neiparu, nejoki, <<Amaa, ana bae dei imparara ntae natejo, <Kore te nkini kata mikintokiki aadol, kake kore aitoki te nkini kata nikintokiki aadol>?

²⁰Kajoki ntae sipata nadede, inchirchir aayeku nintokiki aaisinanio kake keng'ida nkop. Isinanionio, kake keibelekenya sina linchi aaku ng'ida.

²¹Kore tenesaisai ntomononi, naaku keata mion tankaraki natabawua nkata enye, kake kore payie ejing aji, nerikino naduo mion, neng'ida tankaraki natabawua nkerai nkop.

²²Nchi naa abaki itiuu ntae, isinaniono taata kake kaitoki adol ntae, neng'ida ltauja linchi. Kore inia ng'ida nitumutum, meatae looru ntae.

²³Kore te inia parri, mikintokiki aomon toki. Kajoki ntae sipata nadede, kore ntoki pooki niomonmon Papa ta nkarna ai, neicho ntae.

²⁴Kore o taata meatae ntoki nitoomonutua ta nkarna ai. Entoomonu, naa ing'amaa payie etum ng'ida inchi atoboreyia.

²⁵<<Katilika ntae kuna baa te rereii ooisudoro. Kake kelotu nkata namaitoki airorie ntae aiko nejia, kake kaliki ntae mbaa naaipirita ꞉Papa aipidaki.

²⁶Kore te inia parri naa iomonunu ta nkarna ai. Majoito taa, nanu oomonoki ntae taa Papa,

²⁷amu Papa koon oacham ntae, tankaraki nikitachama nanu, nikiruko sii ajo Nkai aing'uaa.

²⁸Papa apa aing'uaa nanu, nayewuo nkop. Naa kore aitoki taata, kaing'uarita nkop aloito netii Papa.>>

²⁹Nejoki ꞉looiteng'eni lenyena, <<Irorita taa taata aipidaki, merekure irorita too lomon ooisudoro!

³⁰Kore taata, ikiteyieloutua aajo iyielo iyie mbaa pooki, nemeata tipat payie kimparichiereki. Kore tankaraki inia, ikiruko aajo Nkai ing'uaa.>>

³¹Newoliki ꞉Yeso ninche ajoki, <<Taata irukuruk?

³²Kelotu nkata, netabawua dei pii, naa kesachari ntae pooki, metaa meatae lemeim ng'oji enye, naaiung'uari ake aa nanu apeny. Kake mara nanu apeny amu ketii Papa tenebo o nanu.

³³Katilika ntae kuna baa payie iatata seriani taatua nanu. Iatata sina to nkop, kake entogolo nkochua amu katimira nanu nkop!>>