Read Samburu Yoana 17 Bible Online

Yoana 17 - Samburu bible

Yoana 17

¹Kore payie eidip Yeso atejo ana, neapu nkonyek aing'or keper nejo, <<Papa, etabawua nkata! Iliepunyie Nkerai ino, payie eitodolu ꞉Nkerai ino nkitoo ino,

²ana ninchoo ninye meitoria ltung'ana pooki, payie etum aichoo lolo pooki linchoo nkichon nemeiting.

³Naa ana nkichon nemeiting nchere payie kiyielou ltung'ana, iyie Nkai nabo ake nadede, neyielou Yeso Kristo ilo lirriwua.

⁴Kaitodolua nkitoo ino to nkop, te nkidipata e siaai likinchoo mataasa.

⁵Papa, kore naa taata, iliepieki teinie nitii, te inia kitoo apake naata tenebo o iyie ewuon meatae nkop.

⁶Kaiteyielo lolo likinchoo to nkop nkarna ino. Kore ninche naa linono apa, nikinchoo ninche, neibung'a rerei lino.

⁷Kore taata keteyieloutua ninche aajo kore ntoki pooki nikinchoo naa iyie eing'uaa.

⁸Kore rereii likinchoo, naa kaichoo nanu ninche, neng'amaa, neyielou katukul aajo iyie aing'uaa neiruk sii aajo iyie likirriwua.

⁹Kaamonoki ninche, mara taa nkop aomonoki, kake lolo likinchoo amu linono.

¹⁰Kore pooki ainien naa ninono, naa kore pooki inono naa nainien, naa katum nanu rrepeta tee ninche.

¹¹Merekure awuon tana kop, kake ewuon ake etii ninche nkop, naa kalotuta nitii. Papa Sinyati, tirripo ninche taatua nkarna ino, inia arna nikinchoo, payie etum ninche aataa nabo ana payie kira iyioo nabo.

¹²Kore apa ewuon atii nanu tenebo o ninche natirripo ninche taatua nkarna ino, inia arna nikinchoo. Katirripo ninche, nemeatae hoo lobo oimina mara ake ilo tung'ani ogelakino nkiminata, payie ebaya lkigerot.

¹³Kalotuta naa taata nitii, kake kajo kuna baa ewuon atii nkop payie etum ninche ng'ida ai nabore.

¹⁴Kaichoo ninche rerei lino, neibayie ꞉nkop ninche tankaraki namara lena nkop, ana namara nanu lena nkop.

¹⁵Kore naamonito, naa mara payie intai ninche aitung'aa nkop, kake payie irrip te ilo torno.

¹⁶Mara ninche lena kop ana namara sii nanu lena kop.

¹⁷Ntisinya ninche te ndedei, rerei lino ndedei.

¹⁸Kore ana nikirriwua nanu nkop, airruaayie sii nanu ninche nkop.

¹⁹Kaitai koon aaku lasar sinyati anang ninche, payie eitisinyi sii ninche te ndedei.

²⁰<<Mara taa kulo aapeny aomonoki, kake kaamonoki sii naboicho e lolo pooki laairuk tankaraki lkilikuai lenche. Papa, kore ana niti iyie atua nanu nati sii nanu atua iyie, kaamon metaa sii ninche nabo o iyioo, payie etum nkop airuko ajo iyie likirriwua.

²²Aichoo ninche nkitoo apa nikinchoo, payie eaku nabo ana payie kira iyioo nabo,

²³ati nanu atua ninche nitii iyie atua nanu, payie eaku ninche katukul nabo, netum nkop ateyielo ajo ikirriwua, nitachama ninche ana nikitachama nanu.

²⁴<<Papa, kayieu paa kore lolo likinchoo neaku tenebo o nanu to ng'oji natii, payie edol nkitoo ai, inia kitoo nikinchoo tankaraki nikitachama ewuon eng'or nkitainoto e nkop.

²⁵Papa loosipat, kore abaki mikiyielo iyie nkop, kaayielo nanu, neyielo sii kulo aajo ikirriwua.

²⁶Kaiteyielo ninche nkarna ino, naa kaitoki ake alo kue aiteyielo, paa kore nchaman nikitachama, newuon taatua ninche, nawoun sii nanu taatua ninche.>>