Read Samburu Yoana 18 Bible Online

Yoana 18 - Samburu bible

Yoana 18

¹Kore payie eidip Yeso atoomono, neipung tenebo o looiteng'eni lenyena alang sere e Kidiron. Kore te ilo kokun, netii apa lchampa obo otijing'a ninye tenebo o looiteng'eni lenyena.

²Kore Yudas, ilo otilikoyie ninye meibung'i, naa keyielo inie ng'oji, amu ketumo chiaake Yeso tenebo o looiteng'eni lenyena teinie.

³Nelo naa ꞉Yudas ilo lchampa, erikito lturrur loo sikarini loo Rroman o laretok loo laitainok kutuaa la lasar o loo Lparisayo, eata lkilang'ilang'eta o ltaii o masaa e larrabal.

⁴Naa kore eyielo ꞉Yeso ntoki pooki nayieu ninche neitaas ninye, neipung'oki, neipar ajoki, <<Ng'ae dei iyieitata?>>

⁵Newoliki aajoki, <<Yeso le Nasaret.>> Nejoki Yeso, <<Nanu ilo.>> Kore Yudas olikoo ninye meibung'i, neitache tenebo o sikarini.

⁶Kore payie ejo Yeso, <<Nanu ilo>>, nerrinyo tesiedi nenang nkop arriaa.

⁷Neitoki Yeso aipar ninche ajoki, <<Ng'ae dei iyieitata?>> Nejo, <<Yeso le Nasaret.>>

⁸Newoliki ꞉Yeso ajoki, <<Katilika ntae ajoki nanu dei ilo. Naa tanaa nanu iyieitata, enchoo naa kulo lewa laairukurukore epuo.>>

⁹Ketaase apa ana payie ebaya laduo rereii otejo, <<Kore to lolo likinchoo naa eitu hoo eimin lobo.>>

¹⁰Nechutu ꞉Simon Petero lalem oata duaake, neoch laisiaayiani la laitainoni kitok la lasar oji nkarna Malkus nedung'oo nkiok e tetene.

¹¹Nejoki ꞉Yeso Petero, <<Tirrinyoki lalem lino nchachur! Ijo iyie maimaa nanu sina otegelua Papa lai maimai?[14]>>

¹²Neibung laaduo sikarini loo Rroman tenebo o lkitok lenche o lolo aretok loo larikok loo Lyiaudi Yeso neen.

¹³Neng'as aaya ninye netii Anas, laa ninye pakiteng le Kayapas, ilo oara laitainoni kitok la lasar te ilo ari,

¹⁴naa ninye apa otuutaka laitoriak loo Lyiaudi ajoki, naikach teneye ltung'ani obo anang ltung'ana.

¹⁵Neirukurukore ꞉Petero Yeso tenebo o likae oiteng'eni. Kore ilo oiteng'eni, naa keyielore oleng ilo aitainoni kitok la lasar, tankaraki inia payie eirukurukore ninye Yeso metabaki atua boo e nkaji nageluno e ilo aitainoni kitok la lasar.

¹⁶Kake neitache Petero to nkutuk e ltim. Kore laduo likae ooiteng'eni oyielore laitainoni kitok la lasar, nelo airorie ntito naibokito ltung'ana to nkutuk e ltim, neriku Petero atua boo.

¹⁷Nejoki ꞉inia tito Petero, <<Mara mira ake iyie lobo loo looiteng'eni le elde tung'ani?>> Newoliki ꞉Petero ajoki, <<Mara.>>

¹⁸Kore apa laisiaayiak o larripok, naa keinuaa nkima, neigeru pooki aaij tankaraki keirobi nkop teinia kata. Neitache sii ꞉Petero teinie, tenebo o ninche aij nkima.

¹⁹Neiparichiere ꞉laitainoni kitok la lasar Yeso mbaa naaipirita looiteng'eni lenyena o nkiteng'ena enye.

²⁰Newoliki ꞉Yeso ajoki, <<Kairorie chiaake nanu nkop ening'ito pooki ng'ae. Kore tee Sinagogini o ta nkaji e Nkai, inie netumore Lyiaudi pooki naa kaiteng'enichie nkata pooki. Eitu aikata ajo nanu mbae too nkurrat.

²¹Aanyo naa payie kimparicherere nanu? Mparichiere ltung'ana laatining'o airo amu keyielo mbaa natejo.>>

²²Kore payie eidip ꞉Yeso atejo nejia, neoch ꞉laretoni obo la laitainoni kitok la lasar oitache tankalo ninye seder nejoki, <<Nejia inko tiniwoliki laitainoni kitok la lasar?>>

²³Newoliki ꞉Yeso ajoki, <<Tanaa keatae mbae torno natejo, tilimu sipata enye. Kake kore tanaa sipata airoro, aanyo payie kioch seder?>>

²⁴Neirruaaya ꞉Anas Yeso eena nkaik meawae netii Kayapas, laitainoni kitok la lasar.

²⁵Kore eitache Simon Petero aijito nkima tanaduo ng'oji, neipari aajoki, <<Mara mira ake iyie lobo loo looiteng'eni le elde tung'ani?>> Kake nemiki ꞉Petero nejo, <<Mara.>>

²⁶Kore laisiaayiani obo la laitainoni kitok la lasar oara le ntipat nabo o ltung'ani otudung'o ꞉Petero nkiok, neipar ajoki, <<Mara iyie atoduaa ta laduo champa iboitiere ninye?>>

²⁷Neitoki Petero amiki nejo, <<Mara nanu.>> Kore ake inia kata neiru lkoko.

²⁸Kore ta siran, nerik ꞉larikok loo Lyiaudi Yeso aaipung'ie ta nkaji e Kayapas, neya lgilata le nkaji oji Praitoria nawuenie lkitok loo Rroman oji Pilato oitore nkop e Yudea. Kore larikok loo Lyiaudi neitu ejing atua inia aji, amu meyieu apa neitarruo ate metaa meichiaakino nenya ntasim e Pasaka.

²⁹Neipung'oki ꞉Pilato nejoki, <<Kaa iatayieyie ele tung'ani?>>

³⁰Newoliki aajoki, <<Kore teneitu eas ele tung'ani ntoki torno, anata mikiyau nitii iyie.>>

³¹Nejoki ꞉Pilato ninche, <<Ewata ntae ninye enguana maate, ana naichiaakino tee nkitanapat inchi.>> Newoliki aajoki, <<Meicho iyioo nkitoria ee Rroman, metaa ikiar ltung'ani metua.>>

³²Ketaase ana paa kore lomon ootejo Yeso ooitodolu mpukunoto e lkiye lenye, nebaya.

³³Nechuko Pilato ajing laduo gilata le nkaji oji Praitoria, neipot Yeso neipar ajoki, <<Iyie dei lkinkii loo Lyiaudi?>>

³⁴Neng'amaa ꞉Yeso ajoki, <<Iyie makoon eing'uaa ana bae nimparu, tana lkulie likitilikita naaipirita nanu?>>

³⁵Nejoki ꞉Pilato, <<Ijo dei iyie loo Lyiaudi ara nanu? Ltung'ana linchi ake o laitainok kutuaa la lasar likiyeutua natii nanu. Nyo itaasa iyie?>>

³⁶Newoliki ꞉Yeso ajoki, <<Kore nkitoria ai naa mara ne ana kop. Kore tanaa ne ana kop nkitoria ai, anata aa kore laisiaayiak lainien nenya larrabal payie maayakini larikok loo Lyiaudi. Kake kore nkitoria ai naa mara ne ana kop.>>

³⁷Neipar ꞉Pilato Yeso ajoki, <<Naaku lkinkii ira iyie?>> Newoliki ꞉Yeso ajoki, <<Iyie ojoito kara nanu lkinkii. Kaatiwuaki, nayewuo ana kop payie alimu sipata naipirita ndedei. Kore pooki ng'ae oara le ndedei naa kaaning nanu.>>

³⁸Neipar ꞉Pilato ajoki, <<Nyo eji ndedei?>> Kore payie eidip aiparu inia, neitoki aipung'oki larikok loo Lyiaudi nejoki, <<Eitu atum mbae nadung'okinyie ele tung'ani nkiguana.

³⁹Kake kore chiaake netiu taa ntae, naa kalaaki ntae ltung'ani obo ta ng'amata e Pasaka, naaku iyieuu nalaaki ntae lkinkii loo Lyiaudi?>>

⁴⁰Neitoki aabuak aajo, <<Mara ele tung'ani! Talaku Barabas!>> Kore apa Barabas naa ltung'ani oricho.