Read Samburu Yoana 19 Bible Online

Yoana 19 - Samburu bible

Yoana 19

¹Kore te inia kata, neya ꞉Pilato Yeso neichooyo meidong'i.

²Neitibir sikarini nkopiyia ee lkuku nepik nkue enye, neichopoki nkila mugie e oriong.

³Nenyikaki ninye nejoki, <<Oi siake iyie! Tibiko ntoricho, Lkinkii loo Lyiaudi!>> Neitejo seder mag.

⁴Neitoki Pilato apuku nejoki larikok loo Lyiaudi, <<Eng'ura! Kaitupuku taata ninye ayau ene payie iyielouu aajo eitu atum mbae nadung'okinyie ninye nkiguana.>>

⁵Nepuku Yeso eichopito nkopiyia ee lkuku o nkila mugie e oriong. Nejoki ꞉Pilato ninche, <<Leilo naa ltung'ani!>>

⁶Kore payie edol ꞉laitainok kutuaa la lasar o laretok lenche Yeso, nebuak aajo, <<Techo ninye! Techo ninye to lmusalaba!>> Nejoki ꞉Pilato, <<Ewaita ntae ninye enteche to lmusalaba, amu eitu atum mbae nadung'okinyie nkiguana.>>

⁷Newoliki larikok loo Lyiaudi aajoki, <<Ikiata iyioo nkitanapat, naa kore ana najo nenia kitanapat, keichiaakino payie eye amu /keitaa koon Nkerai e Nkai.>>

⁸Kore payie ening ꞉Pilato inia, neguretu oleng.

⁹Nechukokino lgilata le nkaji oitorichere oji Praitoria, neyauni Yeso neipar ajoki, <<Kaji ing'uaa iyie?>> Kake eitu eng'amaa ꞉Yeso.

¹⁰Nejoki ꞉Pilato, <<Meata nikijoki nanu? Miyielo ajo kaata nanu nkitoria naalakunyie o naacheyie?>>

¹¹Nejoki ꞉Yeso, <<Miata iyie nkitoo nikintoreyie nanu, mara ake inia nikinchoo Nkai[15]. Naaku kore ilo ltung'ani laatipika nkaik inono, ninye oata ng'oki alang iyie.>>

¹²Kore payie ening ꞉Pilato inia, nenyok ayiaya nkoitiei nalakunyie Yeso, kake nebuak larikok loo Lyiaudi aajo, <<Kore payie ipalaa ele tung'ani naaku mira iyie lchore le Kaisari. Naa kore pooki ng'ae oitaa koon lkinkii naaku Kaisari erare!>>

¹³Kore payie ening ꞉Pilato ilo rerei, neipung'unyie Yeso boo, newuon to lorika la laiguanani to ng'oji neji Lketiketi le Soit, oji to nkutuk ee Lburania Gabata.

¹⁴Kore inia kata naa matejo saai 12 e siran, mparri nanapae payie eikienyu eaku Sabato e uki e ntasim e Pasaka. Nejoki ꞉Pilato larikok loo Lyiaudi, <<Leilo Lkinkii linchi!>>

¹⁵Nebuak aajo, <<Iwa tara! Iwa tara! Techo ninye!>> Neipar ꞉Pilato ninche ajoki, <<Lkinkii linchi ache?>> Newoliki Laitainok kutuaa la lasar aajoki, <<Mikiata iyioo likae kinkii mara ake Kaisari!>>

¹⁶Neichooyo ꞉Pilato ninye metechei ana nayieu ninche. Neyae Yeso,

¹⁷naa kore enapita ninye koon lmusalaba lenye, neipung te lkerenket alo ng'oji neji mborbor e Nkue, aa taa Golgota to nkutuk ee Lburania.

¹⁸Neche ninye to lmusalaba teinie o lkulie tung'ana oare, etii likae nkaina enye e tetene netii likae ne kidienye. Kore Yeso, netii terichet ninche.

¹⁹Neitanapicho Pilato meeigeri lkigerot nepetokini lmusalaba. Kore lolo kigerot oigeroki naa kejo <<YESO LE NASARET, LKINKII LOO LYIAUDI.>>

²⁰Neisom Lyiaudi kumo inia naigero amu kore ng'oji netecheyieki Yeso naa kenyikita lkerenket, neigeroki to nkutuk ee Lburania o nee Rroman o nee Lgirriki.

²¹Nejoki ꞉Laitainok kutuaa la lasar loo Lyiaudi Pilato, <<Minger ajo, <Lkinkii loo Lyiaudi> kake ngero ajo, <Kejo ele tung'ani kara Lkinkii loo Lyiaudi.> >>

²²Newoliki ꞉Pilato ajoki, <<Kore inia naigero, kewuon ake eigero etiu nejia.>>

²³Kore payie eidip sikarini aateche Yeso, neya nankan enyena e oriong, neor nkatitin ong'uan, metaa meatae lemeata ng'urroti tee ninche. Neitoki aaya nanka enye e atua, naa kore inia anka nemetii lkererin loo ripat, kake nabo ake ang'asu te keper meipung'o.

²⁴Nejokino sikarini, <<Miking'ur ana anka, kake matunuk nkuko payie kiyielou aajo ng'ae oya.>> Neasai ana payie ebaya Lkigerot oojo, <<Etooro ninche nankan ainien, nenuk nkuko aayielou loya nkila ai.>> Kore sikarini naa inia etaasa,

²⁵kore ng'otonye o anache ng'otonye o nkitok e Kilopas naji Maria o Maria Magadalena neitachoo tankalo lmusalaba le Yeso.

²⁶Kore payie edol ꞉Yeso ng'otonye o ilo oiteng'eni oacham eitache teinie, nejoki ng'otonye, <<Yieyio, leilo layieni lino!>>

²⁷Neitoki ajoki ilo oiteng'eni, <<Neinia ng'utunyi!>> Kore ang'asu inia kata nerik ꞉ilo oiteng'eni ng'oto Yeso nkang enye.

²⁸Kore payie eidipai inia, eyielo Yeso ajo eidipate mbaa pooki, nejo ana payie ebaya Lkigerot, <<Kaata nkure!>>

²⁹Neatae apa loket ouno teinie obore naichuo naisiicho, nemug ninche mputaput te inia aicho metoboreyia, neremoki sempei e lcheni oji hisop, neiliepie aapik nkutuk enye.

³⁰Kore payie eichamcham ꞉Yeso inia aichuo nejo, <<Eidipe!>> Neirrig nkue enye, neichooyo nkichui enye.

³¹Kore apa inia parri, naa mparri nanapae tankaraki Sabato. Naa kore inia Sabato, naa Sabato apa naata tipat oleng. Naaku inia payie echomo larikok loo Lyiaudi netii Pilato aomon meichoo metigila nkejek ee ltung'ana ootechoki, neitai too lmusalabani amu meyieu apa Lyiaudi neing'uari seseni eika to lmusalaba ta mparri e Sabato.

³²Nepuo sikarini negil nkejek ee lolo ltung'ana oare ootechoki tenebo o Yeso, ang'asunyie lobo kore payie eidip neitoki likae.

³³Kake kore payie epuonu netii Yeso, nedol aajo etundung'ie tau, naaku eitu egil nkejek enyena.

³⁴Neipok ꞉sikarii obo Yeso ntoop te mpere, nepuku nabokata lodo o nkare.

³⁵Kore ltung'ani otoduaa inia, netilimua sipata enye payie itumtum airuko. Naa kore inia sipata natilimua ninye naa kedede, neyielo ninye ajo ndedei eiro.

³⁶Kore kuna baa naa ketaasate payie ebaya Lkigerot oojo, <<Meatae hoo loito lenye obo ogili.>>

³⁷Nejo sii aitoki Lkigerot ta nkae ng'oji, <<Keing'or ltung'ana ilo oipoko te mpere.>>

³⁸Keatae apa ltung'ani oji Yosep oing'uaa lkerenket oji Arimataya. Kore apa ninye naa kera loiteng'eni le Yeso taatua nkop, tankaraki naurie larikok loo Lyiaudi. Kore payie eich kuna baa, nelo aomon Pilato sesen le Yeso. Nechamaa ꞉Pilato inia, nelo Yosep aya ilo sesen.

³⁹Kore sii aitoki Nikodemo, lapa taa ochomo adol Yeso kuarie, nelotu eata lkeek oorropili, aa naing'urre e mir echula o sukuroi, oyelieki echi seseni loo ltung'ana ootuata payie mesioki aang'uai. Kore nkirochi ee kulo keek pooki naa matejo lkiloii osom.

⁴⁰Neya lolo tung'ana pukura are sesen le Yeso, neirin taa nankan naapuyiapui, aairinaa tenebo o lolo keek oorropili, ana neiko chiaake Lyiaudi tenenukaa ltung'ana.

⁴¹Kore apa inie netecheyieki Yeso, naa ketii lchampa otii nkurarei ng'ejuk neitu aikata eiteperieki ltung'ani.

⁴²Kore amu mparri apa inia nanapa Lyiaudi tankaraki Sabato, netaaniki inia kurarei inie netecheyieki Yeso, neroyie aapik Yeso inie.