Read Samburu Yoana 2 Bible Online

Yoana 2 - Samburu bible

Yoana 2

¹Kore eicha mperot are, naaku keatae nkiyema to lkerenket oji Kana, otii Galilaya. Ketii apa ng'otonye Yeso inia kiyema,

²neitoomonoki sii Yeso o looiteng'eni lenyena teinie.

³Kore payie eichunye naichuo e lmusabibu, nejoki ꞉ng'otonye Yeso, <<Eichunye naichuo.>>

⁴Nejoki Yeso ninye, <<Yieyio, nyo kirrikinyie ana? Ewuon eitu ebau nkata ai.>>

⁵Nejoki ꞉ng'otonye lolo aisiaayiak otii inie, <<Entaas najoki ꞉ninye ntae.>>

⁶Kore nkalo inie netii motioo e nkare ile ee soito, naauno te inie. Kore nenia motioo naa keasichere Lyiaudi tankaraki ntasimi enche. Kore apa moti nabo, naa keya litaii ntomoni isiet metabaki ip nabo o tikitam.

⁷Nejoki ꞉Yeso lolo aisiaayiak, <<Emputa kuna motioo nkare.>> Neiput ꞉ninche metowuana too nkutukie.

⁸Neitoki ajoki, <<Entooku naa taata nkiti are niyakiki ilo tung'ani oitacheki latim.>> Neas ninche inia.

⁹Kore payie eichamcham laitachekinoni la latim inia are naibelekenye aaku naichuo e lmusabibu, neipot ilo tung'ani oyemicho. Kore duo ilo aitachekinoni naa eitu eyielou neing'uaa inia aicho, kake keyielo lolo aisiaayiak,

¹⁰naa inia payie etiaka ilo oyemicho, <<Meata chiaake ltung'ani lemeichooyo naichuo e lmusabibu supat tekue. Kore payie eidip lolo ooitoomonoki ta latim aatemerata, neyau naichuo e lmusabibu torno, kake isudoyie iyie naichuo e lmusabibu supat metabaki ana kata!>>

¹¹Naa ana asata ekue e nking'asia nataasa Yeso ta Kana e Galilaya. Teinie eibalunyie nkitoo enye, neiruk looiteng'eni lenyena.

¹²Kore tesiedi ana, nedoyio Yeso alo Kapernaum tenebo o ng'otonye o lalachera lenyena o looiteng'eni lenyena. Nebik teinie nkuti perot.

¹³Kore payie enyiku nkata e ntasim e Pasaka, nelo Yeso lochi kerenket oji Yerusalem.

¹⁴Netum taatua nkaji e Nkai ltung'ana oomirita nkichu o nkerra o nkutukurruki o lkulikae eibelekeny ropiyiani ewueni too misaii.

¹⁵Neitibir liche too lgiitani, nemiraa nenia suom pooki meipung'o taatua nkaji e Nkai. Neibukoo ropiyiani ee laaduo ooibelekenyita ropiyiani, nepukuroki misaii enche nkop.

¹⁶Nejoki lolo oomirita nkutukurruki, <<Empung'ie kuna tokitin tene! Emintaa nkaji e Papa lai sokoni namirichiereki.>>

¹⁷Neparru looiteng'eni lenyena, aajo keigero too Lkigerot nchere, <<Kore nchaman nacham nkaji ino, naa kaanya ana nkima.>>

¹⁸Nejoki naa ꞉Larikok loo Lyiaudi ninye, <<Nyo nkitodolunoto e nking'asia nias, naitodolu ajo iata nkitoria niasie kuna pooki?>>

¹⁹Newoliki ꞉Yeso ajoki, <<Entar ana aji e Nkai, naa kachet taatua mperot uni.>>

²⁰Nejoki ꞉Lyiaudi, <<Kewa larin 46 echetitae ana aji e Nkai, eji naaku ninye ijo indim atecheta too mperot uni?>>

²¹Kake kore inia aji e Nkai najoito ꞉Yeso, naa sesen lenye.

²²Kore kenya payie eitipiuni ninye too lootuata, neparru ꞉looiteng'eni lenyena inia apa natejo, neiruk ninche Lkigerot o ilo rerei oiroro Yeso.

²³Kore ake ewuon etii Yeso Yerusalem te inia kata e ntasim e Pasaka, neiruk ꞉lkumo ninye[3] tankaraki natoduaa asat e nking'asia naataasa naaitodolu nkitoo enye.

²⁴Kake eitu eibalakinyie ꞉Yeso ninche koon, amu keyielo mpukunoto e ltung'ani,

²⁵nemeata tipat pee elikini netiu ltung'ani, amu keyielo ntoki pooki natii ltau lo ltung'ani.