Read Samburu Yoana 20 Bible Online

Yoana 20 - Samburu bible

Yoana 20

¹Kore payie enyiku siran e Jumapili, ewuon emismis, nelo Maria Magadalena nkurarei, nedol ajo eiwuang'ieki soit to nkutuk e inia kurarei.

²Nekuet alo nebaki netii Simon Petero o ilo likae oiteng'eni, oacham ꞉Yeso, nejoki, <<Ewaki sesen la Laitoriani to nkurarei, nimikiyielo ng'oji netipikaki!>>

³Neipung ꞉Petero o ilo likae oiteng'eni aapuo nkurarei.

⁴Nekuet pukura oare, kake neilany ꞉ilo likae ooiteng'eni Petero, neng'as nkurarei.

⁵Neirrigo airumurum, nedol lolo kijat laa nankan naapuyiapui naairinieki sesen, kake eitu ejing ninye.

⁶Kore ake inia kata nebau Simon Petero, nejing atua nkurarei, nedol lolo kijat laa nankan naairinieki sesen eperi teinie,

⁷o nanka nairinakino apa nkue e Yeso. Kore inia anka e nkue nemechulare lolo kijat laa nankan naairinieki sesen, kake keper ake to ng'oji enye.

⁸Kore likae oiteng'eni, otabaka duo tekue nkurarei, nejing sii ninye atua nedol nenia ankan, neiruk ajo ketipiwua Yeso.

⁹Kore apake metabaki inia kata, ewuon ake eitu ening'u Lkigerot oojo meata nchere payie mepiu aing'uaa lootuata.

¹⁰Nerrinyo looiteng'eni aapuo inie newuenie.

¹¹Kake neitache Maria to nkutuk e nkurarei eichirita. Kore ake ewuon eichirita, neirrigo airumurum nkurarei,

¹²nedol lmalaikani oare ooichopito nkilani naaibor, ewueni to ng'oji neperie apa sesen le Yeso, ewuon lobo to ng'oji neing'orita apa nkue, newuon likae to ng'oji neing'orita nkejek.

¹³Neipar aajoki, <<Natomononi, nyo nikinyia?>> Newoliki ajoki, <<Ewaki Laitoriani lai to nkurarei, namayielo ng'oji netipikaki!>>

¹⁴Kore payie ejo nejia, neiwuatuwuata nedol Yeso eitache teinie, kake eitu eyielou ajo Yeso ilo.

¹⁵Neipar ꞉Yeso ajoki, <<Natomononi, nyo nikinyia? Ng'ae dei iyieita?>> Kore amu kejo ninye laisiaayiani lo lchampa, newoliki ajoki, <<Lokitok, tanaa iyie owa ninye, nikiliki nitipika payie alo aya.>>

¹⁶Nejoki ꞉Yeso ninye, <<Maria!>> Neiwuatiwuatakino nejoki to nkutuk ee Lburania, <<Rraboni!>> Kore inia naa laiteng'enani to nkutuk ee Lburania.

¹⁷Nejoki ꞉Yeso, <<Mikintoki aibung, amu ewuon eitu aailiep alo netii Papa. Kake chomo netii lalachera lainien nijoki, <Kailiepita alo netii Papa lai naa Papa linchi, netii Nkai ai naa Nkai inchi.> >>

¹⁸Nelo Maria Magadalena, netii looiteng'eni le Yeso nejoki, <<Atoduaa nanu Laitoriani!>> Neitoki anyaki mbaa pooki natiaka ꞉Laitoriani.

¹⁹Kore inia parri Jumapili teipa, naa keikeno inia aji naaiturrurrore looiteng'eni, tankaraki naurie larikok loo Lyiaudi. Nelotu Yeso neitache te nkiji enche nejoki, <<Metaa seriani tenebo o ntae!>>

²⁰Kore payie eidip atejo ana, neitodol ninche nkaik o ntoop enye. Neng'ida looiteng'eni payie edol Laitoriani.

²¹Neitoki ꞉Yeso ajoki ninche, <<Metaa seriani tenebo o ntae! Kore ana naairriwua nanu Papa, kairruaaya sii nanu ntae.>>

²²Kore payie ejo nejia, neyang'aki ninche nejoki, <<Entang'amai Nkiyeng'et Sinyati.

²³Kore ltung'ana lipalikiki ng'ok enche, nepalikini, naa kore ltung'ana limipalikiki, naaku mepalikino.>>

²⁴Kore Tomas, ilo oji aitoki Lmaoi, oara lobo loo looiteng'eni 12, nemetii apa ninye tenebo o looiteng'eni teinia kata payie elotu Yeso.

²⁵Nejoki ninye ꞉lolo lkulie ooiteng'eni, <<Ikitoduaa iyioo Laitoriani!>> Nejoki ꞉Tomas ninche, <<Kore teneitu adol remot e lchumai taa nkaik enyena nairriki lkumojinoo lai, nairriki sii nkaina ai ntoop nateremoki, maairuk aikata.>>

²⁶Kore payie eichunye uki nabo neitoki looiteng'eni aatumo tenebo taatua inia aji, netii sii Tomas tenebo o ninche. Kore eikeno inia aji, neipung'oki ꞉Yeso ninche nejoki, <<Metaa seriani tenebo o ntae!>>

²⁷Nejoki ꞉Yeso Tomas, <<Rruu lkumojino lino rriki ene, ning'or nkaik ainien. Nintoki airruu nkaina ino, nirriki ntoop ai. Mintoki aata lng'ach, kake iruko.>>

²⁸Newoliki ꞉Tomas ajoki, <<Ira Laitoriani lai, nira Nkai ai!>>

²⁹Nejoki ꞉Yeso ninye, <<Kore tankaraki nikitoduaa, naa inia payie iruko iyie, kake emayiana lolo oiruk abaki eitu aadol!>>

³⁰Ketii mbaa kumo e nking'asia naaitodolu nkitoo e Yeso, naataasa edolita looiteng'eni lenyena, neitu eigeri tana buku.

³¹Kake keigeroki kuna payie itumtum aairuko aajo kore Yeso naa ilo Aitejeunoni oaanyutae oji Kristo, nera Nkerai e Nkai. Naa kore ta nkarna enye, niatata nkichon nemeiting tinirukuruk inia.