Read Samburu Yoana 21 Bible Online

Yoana 21 - Samburu bible

Yoana 21

¹Kore tesiedi, neigil Yeso aipung'oki lbata loo looiteng'eni lenyena ta Mpaso e Tiberias. Naa nchi apa eikuna payie eitodolu koon:

²Kore Simon Petero o Tomas oitokini aajo Lmaoi o Nataniel oing'uaa Kana e Galilaya o layiok le Sebedayo o lkulikae oare loo looiteng'eni le Yeso, naa ketii apa ng'oji nebo.

³Nejoki ꞉Simon Petero lolo kulie, <<Kalo nanu aibung sinkirri.>> Nejo ninche, <<Ikipuo tenebo o iyie.>> Neipung ninche aapuo nedir meli, kake eitu hoo eibung toki inia kuarie.

⁴Kore naikenyunyie, neitache Yeso te nchepata e nkare, kake eitu eyielou looiteng'eni aajo Yeso ilo.

⁵Neipar Yeso ninche ajoki, <<Nkera ainien, meitoki hoo imbung'a?>> Newoliki aajoki, <<Meitoki.>>

⁶Nejoki ninche, <<Entanang'aki lgiitani libung'ieng'ie sinkirri mbata e tetene e meli, naa imbung'bung sinkirri.>> Nenang'aa ninche lolo lgiitani, neiput sinkirri metaa merekure eidim aateyietu tankaraki nkirochi.

⁷Kore ilo oiteng'eni oacham ꞉Yeso nejoki Petero, <<Laitoriani dei ilo!>> Kore payie ening ꞉Simon Petero ajo Laitoriani ilo, nerreten nanka enye e oriong naitayia duo easicho, neng'orokino atua nkare.

⁸Kake kore lolo ooiteng'eni lkulikae naa melakuaniki apa ninche nchepata e mpaso, matejo riot 100 ake. Nepuo te meli, eyietita lolo giitani lenche ebore sinkirri.

⁹Kore payie elang'aki nchepata e lkokun nedou, nedol lpul otii sinkirri, nedol aitoki mukate.

¹⁰Nejoki ꞉Yeso ninche, <<Eyautu lkuti sinkirri limbung'a taata.>>

¹¹Neiliepaki ꞉Simon Petero lkokun, neyietu lolo giitani ayau nchepata e mpaso. Kore lolo giitani naa kebore sinkirri sapuki oara 153. Kore abaki ebore aaikonyi, naa eitu eng'urro.

¹²Nejoki ꞉Yeso ninche, <<Wootu entam ndaa nibolielie nkutukie.>> Nemeatae lobo too looiteng'eni oitieu aipara ajoki <<Ng'ae dei ira iyie?>> tankaraki nateyieloutua aajo Laitoriani.

¹³Nelo Yeso, nerrapu mukate neicho ninche, neitoki aiko nejia sinkirri.

¹⁴Naa nkata e uni ana, naipung'oka ꞉Yeso looiteng'eni lenyena eidipaki aaitipiu taatua lootuata.

¹⁵Kore payie eidip aatam ndaa, neikonyi ꞉Yeso aitalam Simon Petero lkulikae[16] neipar ajoki, <<Simon layieni le Yoana, ikicham nanu aitalang nchaman naacham lkulie?>>[17] Newoliki ajoki, <<Ee, Laitoriani, iyielo iyie ajo kaacham.>> Nejoki ꞉Yeso, <<Ng'ura naa lkuoo lainien lekerra.>>

¹⁶Neigil Yeso nkata e are ajoki, <<Simon layieni le Yoana, ikicham nanu?>> Newoliki ajoki, <<Ee, Laitoriani, iyielo iyie ajo kaacham.>> Nejoki ꞉Yeso, <<Irrita naa nkerra ainien.>>

¹⁷Neitoki ajoki nkata e uni, <<Simon layieni le Yoana, ikicham nanu?>> Nenyamalu Petero oleng tankaraki naipara ꞉Yeso nkata e uni ajoki, <<Ikicham nanu?>> Newoliki ninye ajoki, <<Laitoriani, iyielo iyie ntoki pooki, iyielo iyie ajo kaacham!>> Nejoki ꞉Yeso, <<Ng'ura naa nkerra ainien.

¹⁸Kaajoki iyie sipata nadede, kore apa ira lelerie naaku irreten ake nanka nilo ng'oji niyieu, kake kore payie iarrarru, nirruaaya nkaik inono nikirretenaki likae nanka nikirik ng'oji nimiyieu nilo.>>

¹⁹Ketiaka ꞉Yeso Petero ana aitodolu mpukunoto e lkiye oye Petero pee eibalunyie nkitoo e Nkai. Kore payie eidip atejo inia, nejoki, <<Irukurukoreeki nanu!>>

²⁰Neiwuatuwuata Petero nedol ilo oiteng'eni oacham ꞉Yeso, eirukurukore ninche. Kore ilo oiteng'eni, ninye apa oirichakino lgoo le Yeso enyeita ndaa, naa ninye sii oipara Yeso ajoki, <<Laitoriani, ng'ae dei ilo likilikoo iyie?>>

²¹Kore payie edol ꞉Petero, neipar Yeso ajoki, <<Laitoriani, oo dei ele?>>

²²Newoliki Yeso ajoki, <<Amaa tanaa kayieu nanu payie ewuon ninye eichu ana matuchukunyie, nyo imparunyie iyie? Irukurukoreeki iyie nanu!>>

²³Kore tankaraki inia, nebulaa taatua lalachera rerei lemesipa ojo kore ilo oiteng'eni naa meye. Kake eitu ejoki ꞉Yeso Petero meye ilo oiteng'eni, kake ketiaka, <<Amaa tanaa kayieu nanu payie ewuon ninye eichu ana matuchukunyie, nyo imparunyie iyie?>>

²⁴Kore kuna baa, naa ilo oiteng'eni otilimua, naa ninye sii oigero. Nikiyielo aajo kore limunoto enye naa kedede.

²⁵Keatae nkulie baa kumo naataasa Yeso, naa tanaa meatae hoo nabo nemeigeri, anata meatae mpaach naichaa nenia bukuii to nkop pooki.