Read Samburu Yoana 4 Bible Online

Yoana 4 - Samburu bible

Yoana 4

¹Nening ꞉Lparisayo aajo kore Yeso naa keipatisicho, netumuto looiteng'eni kumo alang Yoana. Naa mara apa Yeso oipatisita, kake looiteng'eni lenyena. Kore payie eyielou Yeso ajo eteyieloutua ꞉Lparisayo, neing'uaa Yudea nerrinyo alo Galilaya.

⁴Naa meatae ajo meimaa apa ꞉ninye Samaria eloito.

⁵Kore payie ebaki Samaria nelo lkerenket oji Sikar, onyikita lchampa oichoo ꞉Yakobo layieni lenye oji Yosep.

⁶Ketii apa lare le Yakobo inie, naa kore tankaraki nainaura Yeso, newuon to nkutuk e ilo are. Kore inia kata, naa matejo saai tomon oare e nteipa.

⁷Nelotu ntomononi nabo ee Samaria aoku nkare, nejoki ꞉Yeso, <<Nchooki nkare namat.>>

⁸Ketiaka apa ꞉Yeso ninye nejia, amu kechomo duo looiteng'eni lenyena lkerenket aainyiang'u ndaa.

⁹Kore amu mechulare apa ltung'ana loo Lyiaudi ltung'ana loo Samaria, newoliki ꞉inia tomononi ajoki, <<Aji inko payie kiomon nkare, iyielo ajo loo Lyiaudi ira, nara noo Samaria?>>

¹⁰Nejoki ꞉Yeso, <<Tanaa iyielo nkichooroto e Nkai, nintoki ayielo ajo ng'ae ele likijokita, <Nchooki nkare namat>, anata itoomono iyie ninye, naa ikincho iyie ꞉ninye nkare e nkichui.>>

¹¹Nejoki ꞉inia tomononi, <<Lkitok, kore ele are naa kegut, nimiata loket liokunyie. Aji itumie inia are e nkichui?

¹²Aa, ira dei iyie kitok alang akuyia lang Yakobo oichoo iyioo ele are, netamata ninye koon o layiok lenyena o suom enyena?>>

¹³Newoliki ꞉Yeso ajoki, <<Kore pooki ng'ae omat ana are naa keitoki ꞉nkure atir,

¹⁴kake kore pooki ng'ae omat inia are naicho kenya, nemetiru ꞉nkure aikata. Neaku inia are kenya naicho ninye lchoro oijirrijirru taatua ninye, neicho nkichon ee ntarasi.>>

¹⁵Nejoki ꞉inia kitok, <<Lkitok, nchooki nanu inia are payie maaigil nkure atir, namaitoki alotu aoku nkare tene.>>

¹⁶Nejoki ꞉Yeso, <<Chomo mpotu lpayian lino, nichukunyie.>>

¹⁷Nejo, <<Maata nanu lpayian.>> Nejoki ꞉Yeso, <<Kedede taa inia nitejo miata lpayian,

¹⁸amu iata apa iyie lewa imiet, naa kore abaki liata taata mara lpayian lino. Kore naa nijoito, naa kedede.>>

¹⁹Nejoki, <<Lokitok, kadol taa ajo loiboni ira iyie.

²⁰Kore apa loo papa lang naa kesai Nkai te ele donyuo, kake ijoitoto ntae Lyiaudi meatae nkae ng'oji nesayieki mara ake Yerusalem.>>

²¹Nejoki ꞉Yeso, <<Natomononi rukooki, kelotu kenya nkata nimisaisai Papa te ele donyuo tanaa sii te Yerusalem.

²²Kore ntae Samaria, naa isaisai inia nimiyielolo kake kore iyioo, Lyiaudi naa ikisai inia nikiyielo, amu kore njeunoto naa iyioo eing'uaa.

²³Kake kelotuta nkata, neidipa ayeu, naa kore ꞉lolo osai Nkai te ndedei, naa kesai Papa ta ltau o te ndedei amu lolo oasai ninye aiko nejia eing'oru ꞉Papa.

²⁴Kore Nkai naa nkiyeng'et, naa kore lolo oaasai ninye, naa meatae ajo payie mesai ta ltau o te ndedei.>>

²⁵Nejoki ꞉inia kitok, <<Kayielo ajo kelotu ilo Aitejeunoni oanyutae, oji aitoki Kristo naa kore tenelotu, keiteng'en iyioo mbaa pooki.>>

²⁶Nejoki ꞉Yeso, <<Kore ilo lijoito, naa nanu, ninye taa ele likirorie.>>

²⁷Kore te inia kata nebau looiteng'eni le Yeso, neing'asia payie etum ninye eirorie ntomononi. Kore eyia, meatae lobo otiaka, <<Nyo iyieu?>> tanaa <<Aanyo payie irorie ana tomononi?>>

²⁸Kore inia kata neing'uaa ꞉inia kitok loket, nerrinyo alo lkerenket, nejoki ltung'ana,

²⁹<<Wootu entodol ltung'ani laatilika mbaa pooki nataasa. Kebaki sa naa ninye ilo Kristo?>>

³⁰Neipung'u ninche taatua lkerenket aapuo netii ninye.

³¹Kore echomo inia tomononi lkerenket, nelej ꞉looiteng'eni lenyena aajoki, <<Laiteng'enani, tama ndaa!>>

³²Kake nejoki ꞉Yeso ninche, <<Kaata ndaa nanya nimiyielolo netiu.>>

³³Nejokino looiteng'eni lenyena, <<Mara meatae ꞉ltung'ani oyaka ninye ndaa?>>

³⁴Nejoki ꞉Yeso, <<Kore naaitiemu nanu naa payie aas nayieu ilo laaterewua, naidip siaai lenye.

³⁵Aa mijiejo, <Ewuon eng'or lapatin oong'uan payie eng'asuni aadung lchampai.> Kake kajoki ntae, entaapu nkonyek inchi eng'ura lchampai! Keoto neiririkinete payie edung'i!

³⁶Kore abaki taata, ketumuto loodung'uto lchampa laata, ebosuta lng'anayio le nkichon ee ntarasi, metaa kore ilo oun o ilo odung lchampa neng'ida tenebo.

³⁷Neaku kedede apa ana natejoki, <Keun lobo, nedung likae.>

³⁸Naa kairruayie ntae entudung neitu iunun, naa ketonyua apa lkulikae aas siaai ogol, niwaita lng'anayio le nkinyinyiret enche.>>

³⁹Kore lkumo laa Samaria le ilo kerenket naa keiruko Yeso tankaraki nadei limunoto natejo inia kitok, <<Kaatilika mbaa pooki nataasa apake.>>

⁴⁰Kore payie epuonu lolo Samaria netii Yeso, neomon metowuana tenebo o ninche, nebik mperot are te inie.

⁴¹Neiruk aitoki lkulikae kumo, tankaraki lkilikuai lenye.

⁴²Nejoki naa ꞉ninche inia kitok, <<Mekure kiruk tankaraki inia nitejo ake, amu kitining'okita ate, nikiteyielo aajo ee ninye taa Laitejeunoni le nkop.>>

⁴³Kore tesiedi nenia perot are, neing'uaa ꞉Yeso inie, nelo Galilaya.

⁴⁴Naa ketejo apa ninye nchere, <<Meyanyiti loiboni to nkop enye.>>

⁴⁵Kore apa lolo tung'ana le Galilaya, naa ketoduaa nenia pooki naataasa ninye te Yerusalem ng'amata e ntasim e Pasaka, amu ketii apa ninche inie. Inia paa kore payie ebau Yeso Galilaya, neitoomon ꞉ninche ninye.

⁴⁶Neitoki Yeso arrinyo Kana e Galilaya, inie apa neibelekenyie nkare metaa naichuo. Kore inia kata netii Kapernaum lkitok le sirikali omuai nkerai enye.

⁴⁷Kore payie ening ajo keyewuo Yeso Galilaya eing'uaa Yudea, nelo netii, neomon metodoi alo aichiunyie layieni lenye, amu ketaa payie edung'o tau.

⁴⁸Nejoki ꞉Yeso, <<Kore tanaa midoldol asat naaitodolu nkitoo naata o mbaa e nking'asia naa mirukuruk aikata.>>

⁴⁹Nejo ilo kitok le sirikali, <<Lokitok, todou tenebo o nanu ewuon eitu eper nkerai ai.>>

⁵⁰Nejoki ꞉Yeso, <<Chomo, amu keichu layieni lino.>> Neiruk ꞉ilo tung'ani ilo rerei otiaka ꞉Yeso, nelo.

⁵¹Kore eibung'uta nkoitiei adoyio alo nkang, nenang'are ꞉laisiaayiak lenyena eata lkilikuai ejo, keichiuwua layieni lenye.

⁵²Neipar ninche nkata natang'asua ilo ayieni lenye asupatu, nejoki, <<Saa nabo e nkuarie ng'ole etung'ayie ninye ꞉nkirewua.>>

⁵³Neparru papa lenye ajo inia saa ake etiaka ninye ꞉Yeso, <<Keichiu layieni lino.>> Neiruk ꞉ninye tenebo o nkang enye pooki.

⁵⁴Naa ana asata e nking'asia e are naitodolu nkitoo e Yeso nataasa payie elotu Galilaya eing'uaa Yudea.