Read Samburu Yoana 5 Bible Online

Yoana 5 - Samburu bible

Yoana 5

¹Kore tesiedi ana, nelo Yeso Yerusalem tankaraki ntasim nabo ee Lyiaudi.

²Netii apa inie ltim obo oji loo nkerra. Kore nkalo ilo tim netii lturoto oigilu ꞉sunta ee lng'opeta taa mbat pukura ong'uan o nabo naor aitiris. Naa keji inie ng'oji to nkutuk ee Lburania Betesaida.

³Kore teinie naa keperioo ltung'ana kumo oomoyiaa o lmodook o ltardo o lootigiligilete. Amu ketii nkatitin naalotu lmalaika le Nkai aing'olng'ol nkare naa kore ake ltung'ani otodoka tekue, payie eidipi aaing'olng'ola nkare, neichiunyieki mpukunoto pooki e moyian naata.[6]

⁴

⁵Netii sii apa inie ltung'ani oata larin osom o isiet emuai.

⁶Kore pee edol ꞉Yeso ilo tung'ani eperito teinie, neteyielo ajo kore ninye naa ketomoyia nkata naado, neipar ajoki, <<Iyieu payie inchiu?>>

⁷Newoliki ꞉ilo tamoyiai ajoki, <<Lokitok, maata nanu ltung'ani laaret aitodoki lturoto teneing'olng'oli, kore ake nkata pooki najo todoki, nedoki likae tung'ani tekue nanu.>>

⁸Nejoki ꞉Yeso, <<Inyuo, tarrapu lchoni lino, chomo.>>

⁹Neichiu ilo tung'ani nabokata, nerrapu lchoni lenye, nelo. Kore mparri nataase ana, naa ta Sabato.

¹⁰Inia payie etiakita ꞉larikok loo Lyiaudi ilo tung'ani oichiunyieki, <<Mparri e Sabato ana. Meichiaakino tee nkitanapat, payie inap lchoni lino.>>

¹¹Nejoki ninche, <<Ilo tung'ani naa laaichiunyie, ninye latiaka, <Tarrapu lchoni lino chomo.> >>

¹²Neipar aajoki, <<Eji, kalo tung'ani dei ele likitiaka tarrapu lchoni chomo?>>

¹³Naa kore ilo tung'ani oichiunyieki, neitu eyielou ajo ng'ae ilo, amu eimiso Yeso taatua ilo turrur.

¹⁴Kore tesiedi, netum ꞉Yeso ninye ta nkaji e Nkai nejoki, <<Mara itoduaa ajo inchiuwua pii! Kore ang'asu taata mias ng'ok, payie mikipukoki aitoki ntorrok.>>

¹⁵Nelo ilo tung'ani, neliki larikok loo Lyiaudi ajoki Yeso apake oichiuunyie.

¹⁶Naa kore tankaraki nataasa Yeso ana ta mparri e Sabato, neng'asu ꞉Lyiaudi aitar ninye kusaka.

¹⁷Nejoki ꞉Yeso ninche, <<Kore Papa lai naa keasicho abaki taata, naasicho sii nanu.>>

¹⁸Naa kore tankaraki ana, nenyok aitoki Lyiaudi oleng aajo payie ear ninye metua, amu mara nkitanapata ake apeny e Sabato etigila, kake ketejo kore Nkai naa Papa lenye, aitirisiere koon.

¹⁹Nejoki ꞉Yeso ninche, <<Kajoki ntae sipata nadede, meidim Nkerai ataasa mbae makoon, mara ake inia nadol eas Papa lenye. Kore ake naas Papa, neas sii Nkerai.

²⁰Amu kecham ꞉Papa Nkerai enye, neitodol inia pooki naas. Neitodol sii ninye mbaa kutuaa naalang kuna payie ing'asiasia ntae.

²¹Naa kore ana naitipiu ꞉Papa lootuata neicho nkichui, naa nejia sii eiko ꞉Nkerai teneicho nkichui lolo oyieu neicho.

²²Amu meatae ltung'ani odung'oki ꞉Papa nkiguana, kake ketipika nkitoria pooki e ndung'oto e nkiguana nkaina e Nkerai enye,

²³payie eyanyit ꞉pooki Nkerai ana neiko teneyanyit Papa. Kore pooki ng'ae lemeyanyit Nkerai, naa meyanyit abaki Papa oirriwua ninye.

²⁴<<Kajoki ntae sipata nadede, kore pooki oning rerei lai, neiruk ilo lairriwua naa keata nkichon nemeiting. Kore ninye naa medung'okini Nkiguana torno, kake keidipa aipung'o taatua lkiye, nejing atua nkichon ee ntarasi.

²⁵Kajoki naa ntae sipata nadede nchere, kelotu kenya nkata, neidipa dei atabau, naaku kore lootuata nening ltoilo le Nkerai e Nkai, naaku kore looning, netum nkichui.

²⁶Kore ana naa Papa oichooyo nkichui, eitaa sii ꞉Nkai Nkerai enye, metaa ninye oichooyo nkichui.

²⁷Neichoo ninye nkitoria nadung'ie nkiguana amu Nkerai e Ltung'ani ninye.

²⁸Naa eming'asia tankaraki ana, amu kelotu kenya nkata naa kore lolo pooki otii atua nkuraren nening ltoilo lenye neipung'u.

²⁹Kore lolo apa oaataasa supati nepiu, netum nkichon nemeiting, kake kore lolo oaataasa ntorrok nepiu, nedung'okini nkiguana torno.

³⁰<<Kore nanu makoon naa meata naidim ataasa, kadung'oki ake nkiguana, ana naning'ito ta Papa. Naaku ndung'oto e nkiguana ai ne sipata, amu mara inia nayieu nanu aing'oru kake ne ilo laairriwua.

³¹Tanaa kalimu sipata e makoon, naa medede inia limunoto ai.

³²Kake keatae likae olimu sipata naaipirita nanu, naa kayielo ajo kore sipata nalimuta ninye naaipirita, naa kedede.

³³Kore apa, naa iterewakita ltung'ana Yoana Laipatisani netilimua ninye sipata nadede.

³⁴Naa mara ake limunoto e ltung'ani ang'amaa, kake kaitaparruta ntae inia natejo Yoana, payie ijeuu.

³⁵Kore apa ninye naa kera lkilang'ilang'et oilu neong, niyieuu ning'idakinono wong'an enye te nkiti kata.

³⁶Kake kore nkae sipata naaipirita nanu naa kelang inia natilimua Yoana naaipirita nanu. Amu kore lolo siaaitin laichoo ꞉Papa maidipa, lolo lowuon ake aasita, naa keitodolu ajo ninye laairriwua nanu.

³⁷Naa kore Papa, ilo laairriwua nanu, naa ketilimua sipata naaipirita. Neitu aikata ining'ning ltoilo lenye anaa idoldol nkomom enye,

³⁸nemebik rerei lenye taatua ntae, tankaraki mirukuruk ilo oirriwua ꞉ninye.

³⁹Inyokitata aaing'uraa lkigerot, amu ijoijo iatata nkichui ee ntarasi taatua ninche. Naa kore lolo kigerot naa nanu elimu,

⁴⁰kake kore eyia naa itanya ipuonunu natii payie itumtum nkichon nemeiting.

⁴¹<<Mang'amaa nanu rrepeta too ltung'ana,

⁴²kake kore natiu, kayielo ajo miatata nchaman e Nkai taatua ntae.

⁴³Kayewuo nanu ta mpaach e Papa neitu king'amaa, kake tenelotu likae tung'ani ta mpaach enye makoon, naa ing'amaa.

⁴⁴Aji inkoko ntae tinirukuruk ooichooro rrepeta maate, niminyoknyok aang'amaa rrepeta naaing'uaa Nkai, inia ake nabo nadede?

⁴⁵<<Emijo kalikoo ntae ta Papa, kore lolikoo ntae naa Musa, laa ninye itipika siligi linchi.

⁴⁶Kore tanaa iruko Musa, anata kiruko sii nanu, amu keigero ꞉ninye lomon laaipirita.

⁴⁷Kake kore tanaa mirukuruk lkigerot lenyena kaji inkoko tinirukuruk lomon lajo nanu?>>