Read Samburu Yoana 6 Bible Online

Yoana 6 - Samburu bible

Yoana 6

¹Kore tesiedi inia, nelang ꞉Yeso mpaso e Galilaya, naitokini aajo mpaso e Tiberias.

²Neirukurukore ninye ꞉lturrur kitok tankaraki nadolita apa asat naasita naaitodolu nkitoo enye, eichiunyie ltamoyia.

³Neitoki Yeso ailiep alo ndonyuo, newuon o looiteng'eni lenyena teinie.

⁴Kore apa inia kata naa ketinyikua ntasim ee Lyiaudi naji Pasaka.

⁵Kore payie eapu ꞉Yeso nkonyek nedol lturrur kitok elotuta netii ninye, nejoki Pilipo, <<Kaji kinyieng'unyie ndaa naitiemu kulo tung'ana?>>

⁶Keiparua ake Yeso ana bae payie esaan Pilipo, kake keyielo apake ajo kaa eas.

⁷Nejoki ꞉Pilipo, <<Mebaki abaki laata ee lapatin isiet ainyiang'u ndaa naichamicham ꞉ltung'ani pooki otii ene!>>

⁸Kore loiteng'eni obo oji Andirea, lalache Simon Petero, nejo,

⁹<<Ketii layieni ene oata mukateni imiet[7] o sinkirri oare, kake nyo ana tele turrur owuenyi?>>

¹⁰Nejoki ꞉Yeso, <<Entowuana ltung'ana pooki.>> Kore apa inie, naa kebore nkujita. Newueni lewa, oobaya apa nkalupuni imiet.

¹¹Nerrapu ꞉Yeso naaduo mukateni, neicho Nkai nache, neoroki ltung'ana pooki oowueni teinie. Neitoki aiko nejia sinkirri, neicho ꞉ltung'ani pooki ana nayieu.

¹²Kore payie enya ltung'ana ndaa aaimu, nejoki ꞉Yeso looiteng'eni lenyena, <<Enturrurro ng'urrot ee mukateni o sinkirri ootelekunye, paa meatae hoo ntoki naim siu.>>

¹³Neiturrur ꞉ninche inia daa pooki natelekunye, neiput nkikapuni tomon o oare mbelesat ee naaduo mukateni imiet, naatelekutua ꞉lolo tung'ana oaatama ndaa.

¹⁴Kore payie edol ꞉ltung'ana inia bae e nking'asia nataasa ninye naitodolu nkitoo enye, nejo, <<Kesipa ele taa ꞉ilo oiboni le Nkai olotu nkop.>>

¹⁵Kore amu keyielo apa Yeso ajo keyieu ꞉ninche nepuonu aaibung ninye aaisimaki metaa lkinkii, neing'uaa inie ng'oji nelo adir naduo donyuo apeny.

¹⁶Kore payie eaku teipa, nedoyio looiteng'eni le Yeso aapuo mpaso,

¹⁷nedir meli aalang aapuo Kapernaum. Kore inia kata naa ketimisimiso, newuon eitu elotu Yeso netii ninche.

¹⁸Neinyuototo lkutati kitok aliman nkare, neinyoyie lopir.

¹⁹Kore payie ereu ꞉looiteng'eni meli kilomitani oabaki imiet anaa ile, nedol Yeso eporu nkare alotu anyikaki meli, neiputukuny.

²⁰Nejoki ꞉Yeso ninche, <<Emimputukuny! Nanu dei ele!>>

²¹Naaku, neyieu ꞉ninche payie ediru ninye meli, naa kore ake inia kata, nebaki inia meli ildo kokun oloito duo.

²²Kore mparri naijipu inia, neyielou ꞉ilo lturrur otii lkokun ajo meli nabo ake natii ng'ole inie, neitu sii ejing Yeso tenebo o looiteng'eni lenyena, kake looiteng'eni lenyena aapeny oochomo.

²³Nepuonu nkuti melin eing'uaa Tiberias nkalo ng'oji netamie ltung'ana mukateni, eidipa Laitoriani aichoo Nkai nache.

²⁴Kore payie edol lturrur ajo meti Yeso o looiteng'eni lenyena inie, nejing nenia melin, nelang aapuo Kapernaum ayiaya ninye.

²⁵Kore payie etum ꞉lolo tung'ana Yeso teilo kokun le Kapernaum, nejoki, <<Laiteng'enani, anu dei iyewuo ene?>>

²⁶Nejoki ꞉Yeso, <<Kajoki ntae sipata nadede, miking'orutata tankaraki nitoduaa asat naaitodolu nkitoo ai, kake tankaraki nitama naapa mukateni aaimu.

²⁷Eminyok aas siaai payie itumtum ndaa narroyo, kake entaas siaai payie itumtum ndaa nemerroyo nayau nkichui ee ntarasi. Kore inia daa naa Nkerai e Ltung'ani naicho ntae, amu ninye etipika ꞉Nkai Papa lminchire lenye le nkitoo.>>

²⁸Nejoki ꞉ninche Yeso, <<Nyo kias payie kitum aataas siaatin oyieu Nkai?>>

²⁹Nejoki ꞉Yeso, <<Kore siaai e Nkai naa payie irukuruk ilo oirriwua ꞉ninye.>>

³⁰Nejo ꞉ninche, <<Kaa asata naitodolu nkitoo ino nias payie kidol, nikiruk iyie? Kaa naa ias iyie?

³¹Kore apa ꞉lmakui lang naa ketama mana[8] to lkees, ana nejo Lkigerot Sinyat, <Keichoo ninche mukate naing'uaa chumata metama.> >>

³²Nejoki ꞉Yeso, <<Kajoki ntae sipata nadede, mara Musa oichoo ntae inia daa naing'uaa chumata, kake kore ndaa e chumata nadede naa Papa lai oichoru.

³³Kore inia daa e Nkai naa ilo otodowua eing'uaa chumata, neicho nkop nkichui.>>

³⁴Nejo ꞉ninche, <<Lkitok, nchoo iyioo ana daa nkata pooki.>>

³⁵Nejoki ꞉Yeso, <<Kara nanu inia ndaa e nkichui. Kore pooki ng'ae olotu natii, nemear aikata sumach, naa kore laairuk, nemetir aikata nkure.

³⁶Kake katilika apa ntae ana, <Kindipa aatodol, newuon ake mikirukuruk.>

³⁷Kore lolo pooki laaicho ꞉Papa, naa kepuonu natii. Naa kore pooki ng'ae olotu natii, mamiraa aikata.

³⁸Amu katodowua nanu to chumata payie aas inia nayieu ꞉ilo laairriwua, namara payie aas inia nayieu makoon.

³⁹Naa kore nayieu ꞉ilo lairriwua nanu naa payie maiminie lolo laichoo ꞉ninye, kake payie aitipiu te inia parri e nkiting'oto.

⁴⁰Amu kore nayieu ꞉Papa lai, naa metaa kore pooki ng'ae ooing'or Nkerai enye neiruk, netum nkichon nemeiting. Naa kaitipiu nanu ninche te inia parri e nkiting'oto.>>

⁴¹Kore inia kata neng'asu larikok loo Lyiaudi aaing'unyung'uny tankaraki ninye, amu ketejo, <<Kara nanu ndaa natodowua to chumata.>>

⁴²Nejo ꞉ninche, <<Aa mara Yeso dei ele, layieni le Yosep, likiyielo menye o ng'otonye? Naaku aji eiko taata payie ejoito, <Te chumata atodowua>?>>

⁴³Newoliki ꞉Yeso ajoki, <<Emintoki aaing'unyung'unyakino.

⁴⁴Meatae ltung'ani oidim ayeu natii nanu mara ake ilo oyietu ꞉Papa lairriwua, naa kaitipiu nanu ninye te inia parri e nkiting'oto.

⁴⁵Keigero too loibonok le Nkai ajo, <Keiteng'en ꞉Nkai ninche pooki.> Kore pooki ng'ae oning Papa neyielou mbaa naaing'uaa ninye, naa ninye olotu natii.

⁴⁶Majoito naa keatae ꞉obo otodua Papa. Kake ꞉ilo oing'uaa netii Nkai, ninye ake otodua Papa.

⁴⁷Kajoki ntae sipata nadede, kore ilo oiruk naa keata nkichon nemeiting.

⁴⁸Kara nanu ndaa e nkichui.

⁴⁹Ketama apa ꞉lmakui linchi mana to lkees, kake ketuata eyia.

⁵⁰Kore ana daa natodowua eing'uaa chumata naa nchi etiu: kore pooki ng'ae oanya nemeye.

⁵¹Kara nanu ndaa naichu natodowua eing'uaa chumata. Naa kore tanaa kenya ltung'ani ana daa, naaku keichu ntarasi. Kore ana daa naa sesen lai, oichoruaki payie etum nkop nkichui.>>

⁵²Neng'asu larikok loo Lyiaudi aaikarnyasa maate aajo, <<Kaji eiko ele tung'ani teneidim aichoo iyioo sesen lenye matam?>>

⁵³Nejoki ꞉Yeso ninche, <<Kajoki ntae sipata nadede, kore tiniminyanya sesen le Nkerai e Ltung'ani, nimatmat lodo lenye, naa miatata nkichui taatua ntae.

⁵⁴Kore pooki ng'ae oanya sesen lai, nemat lodo lai naa keata nkichon nemeiting, naa kaitipiu ninye ta mparri e nkiting'oto.

⁵⁵Amu kore sesen lai naa ndaa nadede, naa kore aitoki lodo lai naa matata nadede.

⁵⁶Kore ꞉pooki ng'ae oanya sesen lai, nemat lodo lai, naa kewuon taatua nanu, nawuon sii nanu taatua ninye.

⁵⁷Naa kore ana naairriwua nanu ꞉Papa oichu, naa kaichu sii nanu tankaraki ninye, naa nejia sii etiu pooki ng'ae oanya sesen lai, nchere keichu ninye tankaraki nanu.

⁵⁸Kore ndaa natodowua eing'uaa chumata, naa metuwuana ninye napa daa natama lmakui linchi, neitoki ake aaye. Kore loanya ana daa naa keichu ntarasi.>>

⁵⁹Kore kuna baa, naa ketejo Yeso eiteng'enicho te Sinagogi ta Kapernaum.

⁶⁰Kore lkumo loo looiteng'eni lenyena ootining'o ana nejo, <<Kegol ana kiteng'ena oleng, ng'ae sa oidimare?>>

⁶¹Kore amu keyielo apa Yeso ta ltau lenye ajo keing'unyung'unyuta looiteng'eni lenyena tankaraki inia, nejoki ninche, <<Amaa, kerrek dei ntae ana?

⁶²Oo sa tinidoldol Nkerai e Ltung'ani eiliep alo chumata naing'uaa apa?

⁶³Kore Ltau Sinyati naa ninye oichoru nkichui, naa kore ngolon e ltung'ani naa meitoki eidim ataasa. Kore rerei latiaka ntae, naa nkiyeng'et o nkichui.

⁶⁴Kake kore taatua ntae, naa keatae lolo lemeiruk.>> Amu keyielo apake ꞉Yeso ta ng'asunoto ajo kakua too lolo tung'ana lemeiruk, naa kalo olikoo ninye.

⁶⁵Neitoki ajo, <<Naa inia payie atiaka ntae nchere, meatae ltung'ani oidim ayeu natii, mara ꞉Papa oidimie.>>

⁶⁶Kore tankaraki inia, neibelekenya looiteng'eni lenyena kumo aing'uaa, mekure eirukurukore ninye.

⁶⁷Nejoki ꞉Yeso loochi ooiteng'eni lenyena tomon o oare, <<Oo ntae, mara mikiyieuu sii niking'uaa?>>

⁶⁸Newoliki ꞉Simon Petero ajoki, <<Laitoriani, neti ng'ae kipuo iyioo? Iata iyie rerei le nkichon nemeiting.

⁶⁹Kore iyioo, naa ikiruko, nikiteyielo nchere, iyie ilo Sinyati le Nkai.>>

⁷⁰Nejoki ꞉Yeso, <<Mara dei nanu otegelua ntae pukura tomon oare? Naa kore eyia, kore lobo taatua ntae naa lairirua.>>

⁷¹Kore apa ilo oimakita ninye naa Yudas, layieni le Simon oji Isikariot, ilo kenya olikoo ninye. Kore apa ninye naa kera lobo lo lolo tomon oare.