Read Samburu Yoana 7 Bible Online

Yoana 7 - Samburu bible

Yoana 7

¹Kore payie eidipai inia, nemanaa ꞉Yeso ta Galilaya, amu meyieu apa nemanaa te Yudea tankaraki nayieta ꞉larikok loo Lyiaudi ninye payie ear metua.

²Kake kore amu ketinyikua nochi tasim ee Lyiaudi nachetieki nkorrimpani,

³nejoki ꞉lalachera lenyena Yeso, <<Tung'ai ene ng'oji chomo Yudea payie etum looiteng'eni linono aatodol siaitin le nking'asia niasita.

⁴Meatae ltung'ani oas mbae to lkutoto, tanaa keyieu neyielouni. Kore tanaa iasita iyie kuna baa, nchoo naa kiyielouni to nkop pooki!>>

⁵Amu kore abaki lalachera lenyena naa meiruk apa ninye.

⁶Nejoki ꞉Yeso ninche, <<Ewuon eitu elotu nkata naaichiaakino payie alo inie, kake kore taa ntae naa keichiaakino nkata pooki.

⁷Meidim nkop aibai ntae, kake kaaiba nanu amu kalimu sipata naipirita ninye ajo, kore mbaa naas naa keitorrok.

⁸Eiliepa enchom Yerusalem entam ntasim. Mailiepita nanu alo anya inia tasim amu ewuon eitu ebau nkata naaichiaakino.>>

⁹Kore payie ejo nejia, nebikoo ta Galilaya.

¹⁰Kore payie epuo lalachera lenyena aanya inia tasim, nelo Yeso ailiep medolitae aleliari.

¹¹Naa kore apa larikok loo Lyiaudi, keyieita Yeso taatua inia tasim eiparu aajo, <<Kore ilo tung'ani?>>

¹²Netii apa inie lturrurri naa kore taatua ninche, neing'unyung'unyita ltung'ana tankaraki Yeso. Keatae loojo, <<Keisupat ele tung'ani>>, nejo lkulie, <<Mara nejia! Keitopong'orito ltung'ana.>>

¹³Kake kore eyia, nemeatae ltung'ani oitieu atilimu mbaa e Yeso ening'itoi, tankaraki naurie larikok loo Lyiaudi.

¹⁴Kore payie eaku nkiji e ntasim, nelo Yeso nkaji e Nkai neng'asu aiteng'enicho.

¹⁵Neing'asia larikok loo Lyiaudi nejo, <<Kaji eikuna ꞉ele tung'ani payie eyielo kuna baa, eitu eiteng'eni?>>

¹⁶Nejoki ꞉Yeso, <<Kore nkiteng'ena ai naa mara nanai, kake ne ilo laairriwua.

¹⁷Kore pooki ng'ae oyieu neas yieunoto e Nkai naa keyielou tanaa Nkai eing'uaa nkiteng'ena ai, tanaa lomon lainien alimuta.

¹⁸Kore ilo oiro mbaa enyena, neing'uraki koon rrepeta, kake kore ꞉ilo oing'oru rrepeta naayaki ilo oirriwua, naa loosipat ninye, nemetii sapare atua ninye.

¹⁹Mara keichoo apa ntae Musa nkitanapat? Kake meatae hoo ꞉lobo linchi oibung'uta nenia kitanapat. Aanyo naa payie kiyieuu nikiarrar matua?>>

²⁰Nejoki ꞉ilo turrur, <<Iata taa lairirua! Ng'ae likiyieu nikiar?>>

²¹Nejoki ꞉Yeso, <<Kataasa apa mbae nabo e nking'asia ta Sabato, ning'asiasia pooki tankaraki inia.

²²Keitanapa apa Musa ntae payie imuratrat nkayiok inchi, namara sii Musa eing'uaa inia, kake loo papa lang. Naaku imuratrat ntae nkayieni ta mparri e Sabato.

²³Amaa tanaa keng'amaa ake ltung'ana aajo keyiere nemurati nkayieni abaki ta Sabato, payie megili nkitanapat e Musa, aanyo naa payie kigorokinono nanu eji, amu ltung'ani omuai aichiunyie katukul ta mparri e Sabato?

²⁴Emidung'oki nkiguana to nkung'urata e mbaa e oriong, kake etundung nkiguana te sipata.>>

²⁵Netii inie ltung'ana le Yerusalem, aaiparuta aajo, <<Mara lochi tung'ani ele oyieitai payie eri metua?

²⁶Naa lele ninye taata, oirorita tekue ltung'ana, nemeatae ltung'ani ejoki pito. Kebaki sa neteyieloutua lkutuaa aajo ninye ilo Aitejeunoni oanyutae?

²⁷Kake kore ele tung'ani, ikiyielo neing'uaa, naa kore kenya tenelotu ilo Aitejeunoni oanyutae, nemeatae ltung'ani oyielo neing'uaa ninye.>>

²⁸Kore inia kata, nebuak Yeso to ltoilo sapuk eiteng'enicho ta nkaji e Nkai ajo, <<Naaku ikiyielolo nanu o ng'oji naing'uaa? Eitu naa alotu nanu makoon, kore ilo laairriwua naa keisiligai, nimiyielolo ntae ninye.

²⁹Kayielo ninye, amu ninye aing'uaa nanu, naa ꞉ninye lairriwua.>>

³⁰Nenyok ninche aajo embung'a ninye, kake meatae hoo lobo oiseyie ninye, amu ewuon eng'or nkata enye.

³¹Naa keiruko ninye ꞉lkumo te ilo turrur, nejo, <<Amaa kenya tenelotu ilo Aitejeunoni oanyutae, keas ninye mbaa naaitodolu nkitoo enye alang ele tung'ani?>>

³²Nening ꞉Lparisayo ilo turrur eing'amng'am aaimaki nenia baa naipirita Yeso, Neirruaaya ꞉laitainok kutuaa la lasar o lolo Parisayo, sikarini meibung'a ninye.

³³Nejo ꞉Yeso, <<Ewuon ake ati tenebo o ntae te nkiti kata, naitoki arrinyokino ilo laairriwua.

³⁴Naa iking'oruru kenya inia kata, nimikitumtum, amu kore inie natii mindimdim aaotu.>>

³⁵Neipara larikok loo Lyiaudi aajokino, <<Kaji sa dei inie netaa kelo ele tung'ani nimikitumie? Kelo sa neti ꞉ltung'ana lang otii atua loreren? Naa keiteng'en lolo oreren?

³⁶Nyo sa eutu payie ejo, <Iking'oruru nanu, nimikitumtum,> o <Kore inie natii, mindimdim aaotu>?>>

³⁷Kore te inia parri e siedi naisul pooki te inia tasim, neinyuototo Yeso, nebuak to ltoilo sapuk nejo, <<Kore pooki ng'ae oata nkure, nchoo elotu natii nanu amat.

³⁸Kore pooki ng'ae laairuk nanu, <nerukunyie ta ltau lenye nkare e nkichui>, ana nejo Lkigerot.>>

³⁹Kore ana bae natejo Yeso, naa keipirita Ltau Sinyati otum kenya pooki ng'ae oiruko ninye, amu kore apa inia kata naa ewuon eitu eichoruni ilo Tau Sinyati, tankaraki ewuon eng'or nkata payie eiliepieki.

⁴⁰Kore payie ening lolo tung'ana le ilo turrur Yeso ejo kulo omon, nejo lbata, <<Kore ele tung'ani naa kesipa kera ilo Oiboni le Nkai oaanyutae.>>

⁴¹Nejo lkulie, <<Ele taa ilo Aitejeunoni oanyutae!>> Nejo lkulikae, <<Amaa sa, mara meing'uaa ilo Aitejeunoni oanyutae Galilaya?

⁴²Mara kejo Lkigerot nchere, kore apa ilo Aitejeunoni naa le ichoi e lkinkii Daudi, neing'uaa Beteleem, ilo lkerenket oing'uaa sii apa Daudi?>>

⁴³Nepuku oro te ilo turrur, tankaraki Yeso.

⁴⁴Kore apa lbata lenche neyieu payie eibung Yeso, kake meatae hoo lotoochoyie ninye.

⁴⁵Nerrinyo naa sikarini aapuo netii laitainok kutuaa la lasar o Lparisayo, nejoki ꞉ninche sikarini, <<Aanyo payie eitu iyau ninye ene?>>

⁴⁶Newoliki ꞉sikarini aajoki, <<Meatae aikata ltung'ani oiroro ana neikuna ele tung'ani!>>

⁴⁷Nejoki ꞉Lparisayo, <<Keitopong'oyieki abaki ntae?

⁴⁸Keatae sa lobo laa larikok tanaa loo Lparisayo oiruko Yeso?

⁴⁹Kake kore ele turrur lemeyielo nkitanapat, naa ketii ninche taabori ldeket le Nkai.>>

⁵⁰Kore Nikodemo oara lobo lenche, ochomo apa netii Yeso tekue, nejoki ninche,

⁵¹<<Amaa, kedung'oki nkitanapat ang ltung'ani nkiguana eitu eng'asi ainining ninye, neyielouni naasita?>>

⁵²Newoliki ajoki, <<Aa Galilaya aitoki ing'ua iyie? Terrerrekuanu soma Lkigerot, niyielou ajo meatae loiboni le Nkai oing'uaa Galilaya.>>

⁵³Nerrinyo pooki ng'ae alo nkang enye,