Read Samburu Yoana 8 Bible Online

Yoana 8 - Samburu bible

Yoana 8

²Kore payie eikienyu nelo aitoki Yeso nkaji e Nkai. Nepuonu ltung'ana pooki aaiturrurrokino, newuon, neng'asu aiteng'en ninche.

³Neyau ꞉laiteng'enak loo nkitanapat o Lparisayo ntomononi naibung'aki easita loloito, neitacheyie tekue Yeso.

⁴Nejoki Yeso, <<Laiteng'enani, keibung'aki ana tomononi easita loloito.

⁵Naa kore tee Nkitanapat, keitanapa apa iyioo Musa ajoki, kore ntomonok naatuwuana ana, naa keichiaakino nenang'i too soito metuata. Kaa ijo iyie?>>

⁶Naa keiparuta ana payie etum ntoki naibung'ie Yeso, nelikoo meiguanareki. Neirrigo Yeso, neng'asu aiger nkop to lkumojino.

⁷Kore payie epuo kue eiparichiere, neapunye ꞉Yeso nejoki ninche, <<Enchoo ilo taa ntae leitu aikata eas ng'oki, eaku ninye lekue onang ninye to soit.>>

⁸Neitoki aitoki airrigo, neiger nkop.

⁹Kore payie ening ꞉ninche inia, nepuo ma obo obo, aang'asu lkutuaa ana metung'ari Yeso apeny o inia kitok eitache tekue ninye.

¹⁰Neapunye Yeso neipar inia kitok ajoki, <<Natomononi, koree laaduo tung'ana? Meatae duaake ltung'ani obo likidung'oki nkiguana?>>

¹¹Nejoki, <<Lkitok meatae hooyia.>> Nejoki ꞉Yeso ninye, <<Kore abaki nanu, naa maadung'oki nkiguana, chomo kake mintoki awuon taatua ng'ok.>>

¹²Neitoki Yeso ajoki lolo tung'ana, <<Kara nanu wong'an e nkop, kore pooki ng'ae laairukurukore, naa melo aikata taatua naimin kake keata wong'an e nkichon.>>

¹³Nejoki ꞉Lparisayo, <<Sipata nikimpirita ilimuta, naaku medede inia limunoto ino.>>

¹⁴Nejoki ꞉Yeso ninche, <<Kore abaki tanalimu sipata naaipirita, naa kedede limunoto ai, amu kayielo naing'uaa, nayielo sii naloito. Kake miyielolo ntae naing'uaa, nimiyielo sii naloito.

¹⁵Idung'okiki ntae ltung'ana nkiguana ana ltung'ana, namadung'oki ꞉nanu hoo ltung'ani obo.

¹⁶Kake tanaa duaake kadung'oki nanu ltung'ani nkiguana, naa kedede nkiguana ai, amu mara nanu ake apeny oas inia. Kore Papa laairriwua naa ketii tenebo o nanu.

¹⁷Kore abaki tee nkitanapat e Nkai nirukurukorere naa keigero ajo kore tanaa kelimu ltung'ana oare sipata nabo naipirita mbae naje, naaku keikeni ajo kedede inia limunoto enche.

¹⁸Kalimu nanu sipata naaipirita, nelimu sii Papa lai lairriwua.>>

¹⁹Neipar ꞉ninche Yeso aajoki, <<Kore Papa lino?>> Nejoki ꞉Yeso, <<Mikiyielolo nanu nimiyielolo sii Papa lai. Tanaa duaake ikiteyielo nanu, anata sii iteyielo Papa lai.>>

²⁰Keiroro ꞉Yeso kuna baa pooki eiteng'enicho ta nkaji e Nkai, tankalo sanduku loo nkichoorot. Nemeatae ltung'ani oibung'a ninye, amu ewuon apa eitu ebau nkata enye.

²¹Neitoki Yeso ajoki ninche, <<Kaloito aing'uaa ntae, naa iking'oruru, niyeye taatua ng'ok inchi. Kore inie naloito, naa mindimdim aaotu.>>

²²Nejo larikok loo Lyiaudi, <<Amaa, kejo sa payie ear koon metua? Tankaraki natejo, <Kore inie naloito, naa mindimdim aaotu>?>>

²³Nejoki ꞉Yeso, <<Ing'uaa ntae ana kop e abori, naing'uaa nanu ne keper, nirara lena kop, nara nanu le chumata.

²⁴Naa katiaka ntae iyeye taatua ng'ok inchi, amu tinimikurukuruk aajo kara nanu ilo lara naa iyeye taatua ng'ok inchi.>>

²⁵Neipar aajoki, <<Ng'ae dei ira iyie?>> Nejoki ꞉Yeso, <<Kara ilo tung'ani latilika apake ntae ta ng'asunoto ajo kara.

²⁶Kaata mbaa kumo nayieu najo naaipirita ntae o mbaa kumo nadung'okinyie ntae nkiguana, kake kore ilo laairriwua naa loosipat, naa nenia ake natining'o te ninye aliki nkop.>>

²⁷Neitu apa eyielou ninche aajo mbaa naaipirita Papa lenye elikita ꞉Yeso.

²⁸Nejoki ꞉Yeso ninche, <<Kore tiniliepiepie Nkerai e Ltung'ani[9] niyielouu aajo kara nanu ilo lara. Naa meatae ntoki naas nanu te nkitoria ai makoon, kake kore nenia naatuutaka Papa lai naa ninche aairo.

²⁹Kore ilo laairriwua naa kaatii tenebo, eitu aaing'uaa aa nanu apeny, amu kaas nkata pooki nenia naiting'id ꞉ninye.>>

³⁰Kore lkumo ootining'o Yeso elimu kuna baa, neiruk ninye.

³¹Nejoki ꞉Yeso lolo Yiaudi ooiruko ninye, <<Kore tiniwuenini taatua rerei lai, naa irara looiteng'eni lainien katukul,

³²niyielouu ndedei, nelaku ntae inia dedei.>>

³³Nejo ninche, <<Kore iyioo naa ikira ichoi e Abraam, neitu aikata kiaku iyioo rrindiki lo ltung'ani. Naaku aji inko tinijo <Kelakuni ntae>?>>

³⁴Newoliki ꞉Yeso ajoki, <<Kajoki ntae sipata nadede, kore pooki ng'ae oas ng'ok naa rrindik loo ng'ok.

³⁵Kore rrindik nemeata ninye mbikoto ta nkang natii, kake kore inoti le inia ang, naa le inia ang ake ninye ntarasi.

³⁶Kore tenelaku ntae inia Kerai inoti, naaku ilakunono katukul.

³⁷Kayielo ajo irara ichoi e Abraam. Kake kore eyia, ikiyieitata aar matua, amu meata rerei lai mpaach taatua ntae.

³⁸Kore nenia nairo, naa nenia natoduaa aboitiere Papa, kake kore nenia niasias naa nenia nitining'o ta papa linchi.>>

³⁹Newoliki aajoki, <<Kore papa lang naa Abraam.>> Nejoki ꞉Yeso, <<Kore tanaa kedede nkera ee Abraam irara, anata iasias naataasa apa ninye.

⁴⁰Kara ꞉ltung'ani otining'o sipata naing'uaa Nkai, naa kore taata ikiyieuu nikiarrar matua. Eitu aikata eas Abraam mbae naijo inia!

⁴¹Kore ntae naa asat e papa linchi iasitata.>> Newoliki Yeso aajoki, <<Mikira iyioo nkera naataluno! Lobo ake papa likiata, naa Nkai ilo.>>

⁴²Nejoki ꞉Yeso, <<Kore tanaa Nkai Papa linchi, anata kichamcham amu netii Nkai aing'uaa nanu. Neitu alotu makoon kake ninye laairriwua.

⁴³Aanyo payie mining'ung'u inia najoito? Tankaraki nimindimdim aaibung'a rerei lai.

⁴⁴Kore ntae naa irara nkera e papa linchi Chitani, niyieuu niasias mbaa naang'uar ninye ataasa. Kore ninye naa larani apake ta ng'asunoto oar ltung'ana metuata, nemeitache ta mbata e ndedei, amu metii ndedei atua ninye. Kore payie esapicho ninye naaku mbaa naatiu te ninye eiro, amu lasapani ninye nera aitoki menye saparia.

⁴⁵Kake kore tankaraki sipata alikita ntae, naa inia payie mikirukuruk.

⁴⁶Ng'ae taa ntae laaidim aitukurru ajo kataasa ng'oki? Amaa tanaa sipata alikita ntae, aanyo payie mikirukuruk?

⁴⁷Kore pooki ng'ae oara le Nkai naa kening rerei le Nkai. Kore payie mining'ning ntae rerei le Nkai, naa tankaraki nimirara lenyena.>>

⁴⁸Newoliki ꞉lolo Yiaudi Yeso aajoki, <<Medede sa tinikijo ira iyie Samariai niata aitoki lairirua?>>

⁴⁹Nejoki ꞉Yeso, <<Maata nanu lairirua. Kayanyit ꞉nanu Papa, nikintamtam ꞉ntae nanu anyit.

⁵⁰Maing'oru nanu maaterrepi, kake keatae loing'oru, naa ninye odung nkiguana.

⁵¹Kajoki ntae sipata nadede, kore pooki ng'ae oibung rerei lai nemeichamcham aikata lkiye.>>

⁵²Nejoki ꞉lolo arikok loo Lyiaudi ninye, <<Kiteyieloutua taata aajo iata lairirua. Ketua apa Abraam, netuata sii loibonok le Nkai, eji nijo iyie kore ꞉pooki ng'ae oning rerei lino, nemeichamcham aikata lkiye.

⁵³Ira sa iyie kitok ta papa lang Abraam? Ketua apa ninye netuata sii loibonok le Nkai. Ng'ae dei intaa iyie koon?>>

⁵⁴Newoliki ꞉Yeso ajoki, <<Tanaa koon arrep naaku meitoki inia rrepet. Kore laaicho nanu rrepet naa ꞉Papa lai, ilo laa ninye ijoijo Nkai inchi.

⁵⁵Miyielolo ninye kake kayielo nanu. Naa tanaa kajo mayielo, naaku lasapani atuwuana ntae. Kake kayielo ninye, naibung rerei lenye.

⁵⁶Kore apa papa linchi Abraam naa keting'ide ejo keichori metoduaa mparri ai, nedol, neng'ida.>>

⁵⁷Nejoki Yeso, <<Kore iyie eitu intabaki larin onom, tung'ai duo inia nijo itodua Abraam!>>

⁵⁸Newoliki ꞉Yeso ajoki, <<Kajoki ntae sipata nadede, kore ewuon meatae Abraam, natii nanu.>>

⁵⁹Kore te inia kata, nerrapu ninche soito aanang Yeso, kake neisudori ninye, neipung ta nkaji e Nkai.