Read Samburu Asat 1 Bible Online

Asat 1 - Samburu bible

Asat 1

¹Kore to mbuku ai ekue, Teopilo, naa kaigero nanu mbaa pooki naataasa Yeso o naaiteng'eniche,

²ana metabau inia parri nailiepieki apa ninye aaya chumata, eidipa aitanapa Lkipaareta lenyena ta Ltau Sinyati.

³Kore eidipaki aaitama sina neri metua, neibalie koon too lolo kipaareta lenyena, eitodolu nkatitin kumo sipat nchere keichu. Ketaase ana taatua mperot 40 eipung'oki ninche, neliki mbaa naaipirita nkitoria e Nkai.

⁴Kore mparri nabo enyeita ninche ndaa, neicho ana kitanapata, <<Eming'uaa Yerusalem, kake entaanyu ilo lekutuk oitaka ntae Papa, ilo litining'o apa ta nanu.

⁵Amu kore apa Yoana naa keipatisa ntae ta nkare, kake kore too nkuti mperot naa keipatisi ntae ta Ltau Sinyati.>>

⁶Kore payie etumo lkipaareta o Yeso, neipar aajoki, <<Laitoriani, amaa, irrinyoki Isirael nkitoria taata?>>

⁷Nejoki ninche, <<Mara siaai linchi payie iyielouu ng'amat o mperot naategelua Papa te nkitoria enye.

⁸Kake itumtum ngolon kenya tenelotu Ltau Sinyati atua ntae, nilimumu sipata ai te Yerusalem o to nkop pooki e Yudea o Samaria o neiting'ie nkop.>>

⁹Kore payie eidip atejo kuna baa, neiliepieki aaya chumata edolita ninche, neisiapaa ꞉nkidis.

¹⁰Kore eapaa nkonyek aaimariri chumata eiliepita, nejo pang lewa oare ooichopito nankan naaibor neiitachoo tankalo ninche.

¹¹Nejoki, <<Lolewa kulo le Galilaya, aanyo payie intachoo aing'or chumata? Kore ele Yeso, oiliepieki aitung'aa ntae aaya chumata, naa kechukunyie ana nitoduaa payie eiliep alo chumata.>>

¹²Nedoyio Lkipaareta aarrinyo aapuo Yerusalem eing'uaa lowua oji Loo Lng'erriyio, onyikita ilo kerenket matejo kilomita nabo.

¹³Kore payie ejing ilo kerenket, neiliapaki lngilata le nkurupa owuenie chiaake ninche. Naa kulo tung'ana taa ootijing'a inie: Petero o Yoana o Yakobo o Andirea o Pilipo o Tomas o Batolomayo o Matayo o Yakobo layieni le Alpayo o Simon oji Silote o Yudas layieni le Yakobo.

¹⁴Naa ketumo ninche pooki nkata pooki aaomon tanaboicho tenebo o nkulie tomonok, netii sii Maria ng'otonye Yeso tenebo o ninche o lalachera le Yeso.

¹⁵Kore mparri nabo, neitache Petero taatua lalachera o nkanachera oaabaki ltung'ana ip nabo o tikitam, nejo,

¹⁶<<Lalachera o nkanachera, kore apa naa ketilimua Ltau Sinyat aimu Daudi mbaa naasai te ꞉Yudas ilo otiriko lolo oibung'a Yeso. Naa meata ajo meitabari kulo kigerot.

¹⁷Kera sii apa Yudas lkipaaret le Yeso, netaasa siaai tenebo o iyioo.>>

¹⁸Kore apa ninye naa keinyeng'ua lchampa too ropiyiani naatumo ta asata enye torno. Nenang nkop te ilo champa, nedanya nkocheke neibukori sorri.

¹⁹Neyielou ltung'ana pooki le Yerusalem ana, neng'amaki ilo champa nkarna naji to nkutuk enche Akeldama, nautu ajo Lchampa lo lodo.

²⁰<<Keigeroki to mbuku ee Sinkoliotin le nkisisa e Nkai nchere, <Metaa inie newuenie ninye mijoni, nemeatae ltung'ani omany inie,> <<neigero sii ajo, <Keya likae tung'ani mpaach enye e rikore.>

²¹<<Naaku meata ajo megeluni lobo loo lolo lewa meawa mpaach enye, otii apake tenebo o iyioo nkata pooki kiata Laitoriani Yeso,

²²ang'asu ta nkata apa naipatisicho ꞉Yoana, ana metabaki mparri apa nawaki Yeso aaitung'aa iyioo. Kore ilo tung'ani, naa keaku lobo olimu tenebo o iyioo sipata e mpiunoto e lkiye lenye.>>

²³Neyau ꞉ninche ltung'ana oare, Yosep oitokini aajo Barsabas neji aitoki Yusuto, o likae oji Matias.

²⁴Neomon aajo, <<Laitoriani, iyielo iyie ltau loo ltung'ana pooki, mbalakinyie iyioo ajo alo too kulo pukura oare itegelua,

²⁵payie eya mpaach e siaai natung'ayie Yudas alo ng'oji torno neichiaakino ninye.>>

²⁶Nenuk ꞉ninche nkuko, nerriakino Matias, neponikini ninye atua lolo kipaareta tomon o obo.