Read Samburu Asat 10 Bible Online

Asat 10 - Samburu bible

Asat 10

¹Keatae apa ta Kaisaria ltung'ani oji Kornelio, lkitok loo sikarini loo Rroman, oitore lturrur oji loo Ltalian.

²Nera ltung'ani ourie Nkai, nesai ꞉ninye Nkai e Isirael tenebo o nkang enye pooki. Neret tung'ana pooki oomena loo Lyiaudi, neomon sii Nkai nkata pooki.

³Kore mparri nabo matejo saai saal e mparkiji, etuwuana keidetdetita nedol asipu lmalaika le Nkai oyewuo netii ninye ajoki, <<Kornelio.>>

⁴Nekurraki lmalaika nkonyek to ngureticho nejoki, <<Lkitok, nyo sa nikiyewua natii?>> Nejoki, <<Kore nkomono o nkichoorot inono naa ketang'amayie netaparrua ꞉Nkai.

⁵Rruai taata ltung'ana mechomo Yopa, meipotu ltung'ani oji Simon oitokini aajo Petero.

⁶Kore ninye naa kera lomoni obikito ta nkang e Simon ilo akitoni loo lchonito o ndapan oamanya nchepata e mpaso.>>

⁷Kore eidipa lmalaika oirorie ninye achomo, neipotu laisiaayiak le nkang enye oare o sikarii obo ourie Nkai, nera lobo loo lolo aisiaayiak oretito nkata pooki Kornelio.

⁸Kore payie enyaki ninche ntoki pooki, neirruaaya mechomo Yopa.

⁹Kore mparri naijipu inia etinyikayie saai ile e mparkiji, eibung'uta laaduo aisiaayiak nkoitiei netaa kebaki ilo kerenket, neiliep Petero aomon te nkeper e nkaji naiperere.

¹⁰Near ninye sumach neyieuu ndaa nanya, naa kore eitibiritae ndaa neikonyi atuwuana keidetdet,

¹¹nedol chumata ebolo o ntoki nadouta nkop. Kore ana toki naa ketuwuana nanka sapuk naitodoutae nkop eibung'utae sarkuda pukura oong'uan.

¹²Kore atua inia anka netii nkajijik pooki ee suom o nee ng'uesi naaju o naasipa netii mpukunot pooki ee nkueeny.

¹³Nening ltoilo ejoki, <<Petero inyuo, tara tama.>>

¹⁴Nejoki, <<Laitoriani manya hooyia! Amu eitu aikata anya nanu ntoki nemeichiaakino nenyae, nemeisupat te lkerreti lang.>>

¹⁵Neitoki ilo ltoilo ajoki ninye nkata e are ejo, <<Kore ntoki pooki naitaa ꞉Nkai supat, naa mijo mera supat.>>

¹⁶Neasai ana nkatitin uni, nerrinyi nabokata inia anka aaya chumata.

¹⁷Kore ake inia kata eomonito Petero, neiparu laapa ꞉tung'ana ooirriwuayie Kornelio nkaji e Simon ana metumo. Naa kore ake nochi naiting'ie inia duata, nebau ninche nkutuk e ltim ewuon ake erere Petero ayielou ntoki naipirita nduata.

¹⁸Neipoticho eiparu aajo <<Ene sa etii lomoni oji Simon oitokini aajo Petero?>>

¹⁹Kore enyokita Petero arere ayielou ntoki naipirita inia duata, nejoki ꞉Ltau Sinyati ninye, <<Lo lolo ltung'ana okuni likiyieita.

²⁰Inyuo todoi chomo irukurukore miata lng'ach, amu nanu oirriwua ninche.>>

²¹Nedou ꞉Petero alo netii ninche nejoki, <<Lele nanu liyietata. Nyo nayewua ntae?>>

²²Nejoki ꞉ninche, <<Kornelio oara lkitok loo sikarini oterewua iyioo. Naa kore ninye naa kera ltung'ani loosipat ourie Nkai, nerrepita ꞉Lyiaudi pooki. Naa lmalaika sinyati otiaka ninye payie kimpoti chomo nkang enye payie ening inia nilo ajo.>>

²³Neitoomon ꞉Petero ninche inia kuarie ana lomon lenyena. Kore mparri naijipu inia, neirukurukore ninche, neitoki sii lkulikae alachera le nkanisa e Yopa aapuo tenebo o ninye Kaisaria.

²⁴Kore echomo ninche mparri nabo, nebaki Kaisaria. Neanyuta apa Kornelio ninche, neipoto sii ltung'ana lenyena o sotuatin meotu inie.

²⁵Kore payie ebaki Petero inia ang, nelo Kornelio atumore ninye, neirrabalakino nkop tekue nkejek enyena, nesai ninye.

²⁶Neinyoyie Petero ninye meitacho nejoki, <<Inyuo! Ltung'ani ake ara nanu otuwuana iyie.>>

²⁷Kore ake ewuon eirorie ꞉Petero Kornelio, nejing atua nkaji, netum ltung'ana kumo oleng ootuo tenebo inie.

²⁸Nejoki ninche, <<Mara iyielolo naa ntae aajo meichiaakino te lkerreti lang loo Lyiaudii teneata nchula lpayian lang tanaa eisabaki ilo lamara loo Lyiaudi? Kake Kaaitodua nanu ꞉Nkai payie majo ltung'ani keitorruno tanaa mecho ta ntasim.

²⁹Naaku kore payie aaipotuni, neitu aany alotu. Kayieu naa nayielou mbae nikimpoitie.>>

³⁰Nejoki ꞉Kornelio ninye, <<Kore mperot uni naaima, nkata natuwuana ana, saai saal e mparkiji naa katii nkaji ai aomonito. Nejo pang ltung'ani oata nankan naitintil

³¹nejo, <Kornelio, ketining'o Nkai nkomono ino, netaparrua nkichoorot inono too loomena.

³²Rruai ltung'ana Yopa meeipotu Simon oitokini aajo Petero, oara lomoni le Simon, lakitoni loo nchonito o ndapan oamanya nchepata e mpaso.>

³³Naaipotu naa iyie wou nabokata, naa itaasa ntoki supat iyewuo. Naaku naa ikiotuo pooki tekue Nkai, payie kitum aatining inia nikitiaka Laitoriani.>>

³⁴Neng'asu Petero airo ajo, <<Kateyielo taa ajo, meata Nkai ngela,

³⁵kake keng'amaa pooki ng'ae ourie ninye, neas sipat menya ajo le alo orere ninye.

³⁶Iyielolo apa lomon oichoo ꞉Nkai ltung'ana lang lee Isirael elikoo Lomon Supati le sotua ooicharu Yeso Kristo, oara Laitoriani loo pooki.

³⁷Ketilikoyieki kulo omon too lubot pooki e Yudea, ang'asunyie Galilaya, eidipe nkipatisare natilikoyie Yoana.

³⁸Kore ana likoroto nitining'o naa keipirita Yeso le Nasaret, neikuna Nkai payie egelu ninye to ngolon e Ltau Sinyati. Ketamanayie apa ninye aas mbaa supati, neichiunyie lolo pooki ooitoria ꞉Chitani, amu ketii Nkai tenebo o ninye.

³⁹<<Kore iyioo naa ikiata sipata ee nenia pooki naataasa ninye te Yerusalem o taatua ltung'ana laa nkang'itie e inia kop pooki e Yudea. Ketechoki ninye too lmusalaba neri metua,

⁴⁰Kake neitipiwua Nkai ninye taatua lootuata ta mparri e uni, neicharu ninye metodoli.

⁴¹Eitu eicho ꞉Nkai ninye metoduaa ꞉ltung'ana pooki le Isirael, mara ake lolo ootegelua apake payie etum aatilikoi sipata naipirita ninye. Naa iyioo taa lolo, oaatamata nikitama ndaa tenebo o ninye eidipa atipiu taatua lootuata.

⁴²Neitanapa iyioo payie kiliki ltung'ana lang nikintemioki nchere ninye taa etegelua Nkai metaa laiguanani loo loichu o lootuata.

⁴³Ninye etilimutua loibonok le Nkai pooki aajo, kore pooki ng'ae oiruk Yeso naa kepalikini ng'ok ta nkarna enye.>>

⁴⁴Kore ake ewuon eirorita Petero, nedoki Ltau Sinyati lolo ooning'ito ilo rerei.

⁴⁵Kore tankaraki natining'o lolo Lyiaudi ooiruko Yeso ootuo tenebo o Petero ltung'ana lamara loo Yiaudi eiro too nkulie kutukie eisis Nkai, neing'asia payie edol aajo keichooki abaki ninche Ltau Sinyati ana nkichooroto. Nejo Petero,

⁴⁶

⁴⁷<<Mara meatae hoo ltung'ani oany eipatisi ninche ta nkare etaa ketumo Ltau Sinyati ana iyioo?>>

⁴⁸Neitanapicho meipatisi ninche ta nkarna e Yeso Kristo. Neomon ꞉lolo tung'ana Petero metowuana tenebo o ninche nkuti perot.