Read Samburu Asat 11 Bible Online

Asat 11 - Samburu bible

Asat 11

¹Nening Lkipaareta o lkulie ooiruko Yeso ootii mbat pooki e Yudea nchere, ketang'amaitie abaki ltung'ana lamara loo Lyiaudi rerei le Nkai.

²Kore payie eiliep Petero alo Yerusalem, nekusakan lolo ꞉Yiaudi ooiruko Yeso

³aajoki, <<Eji ichomo iyie nkaji ee ltung'ana leiching'a ninya ndaa o ninche!>>

⁴Kake neng'asu Petero anyaki ninche mbaa ana neikuna payie easai ejoki,

⁵<<Kaomonito apa te lkerenket le Yopa, naikonji atuwuana kaidetdet, nadol ntoki natuwuana nanka sapuk naitodoutae nkop eing'uaa chumata eibung'utae sarkuda pukura oong'uan, nelotu anyiku natii.

⁶Kore payie aaing'or atua asipu, nadol nkajijik pooki ee suom o nee ng'uesi naaju o naasipa, netii mpukunot pooki ee nkueeny.

⁷Naning ltoilo laajoki, <Petero inyuo, tara tama.>

⁸Kake najoki, <Laitoriani manya hooyia! Amu eitu aikata apik nkutuk ai ntoki nemeichiaakino nenyae o nemeisupat.>

⁹Naaitoki ilo toilo ooing'uaa chumata ajoki nkata e are, <Kore ntoki pooki naitaa ꞉Nkai supat, naa mijo mera supat.>

¹⁰Neasaia ana nkatitin uni, neyiatari taa inia anka o ntoki pooki natii aachuk chumata.

¹¹<<Kore ake inia kata nebau lewa okuni inia aji nawuenie, laairruakaki eing'uaa Kaisaria.

¹²Naajoki Ltau Sinyati mairukurukore ninche maata lng'ach. Naairukurukore aitoki nanu kulo alachera ile, nikipuo aajing nkang e ilo tung'ani oirriwua ninche.

¹³Neliki iyioo ajo ketoduaa ꞉ninye lmalaika eitache taatua nkaji enye ejoki, <Rruai ltung'ana Yopa meeipotu Simon oitokini aajo Petero,

¹⁴naa ikiliki ꞉ninye lomon likintejeu iyie o nkang ino pooki.>

¹⁵<<Kore payie ang'asu airo, nedoki ninche ꞉Ltau Sinyati ana neikunakine apa iyioo ta ng'asunoto.

¹⁶Kore inia kata naparru natejo apa Laitoriani, <Keipatisa Yoana ta nkare, kake keipatisi ntae ta Ltau Sinyati.>

¹⁷Amaa naa tanaa keichoo ꞉Nkai ninche inia kichooroto ana naichoo apa iyioo payie kiruk Laitoriani Yeso Kristo, ng'ae naa ara nanu payie aany inia nayieu Nkai?>>

¹⁸Kore payie ening ninche ana, neing'uaa long'unyung'unyi neisis Nkai ejo, <<Keichoo naa ꞉Nkai ltung'ana lamara loo Lyiaudi meirriidu neibelekenya payie etum nkichon nemeiting.>>

¹⁹Kore apa lolo pooki oaatasachari aaisig tankaraki sina oitamitae looiruko Yeso, oatang'asua payie eri Sitepano metua, nepuo metabai nkop e Penisia o lkuran oji Saipiras o lkerenket le Antiok. Nemeatae hoo ltung'ani otilikita rerei le Nkai mara ake loo Lyiaudi.

²⁰Kake kore lewa lbata loo lolo tung'ana ooing'uaa apa Saipiras o Kirene, oochomo Antiok, neng'asu aaliki ltung'ana loo Lgirriki Lomon Supati la Laitoriani Yeso.

²¹Naa ketii nkaina e Laitoriani tenebo o ninche, neiruk ltung'ana kumo oleng neibelekenyakino Laitoriani.

²²Kore payie ebaki ele rerei nkanisa natii Yerusalem, neirruaaya ꞉ninche Barnabas mechomo Antiok.

²³Kore payie ebaki ninye inie, nedol inia nataasa Nkai to munyani enye, neng'ida neitogol ninche pooki payie emut nabo taa ltauja lenche aawueni taatua Laitoriani.

²⁴Kore apa Barnabas naa kera ltung'ani supat, obore Ltau Sinyati o nkurukoto. Neponikino ltung'ana kumo oleng atua ilo turrur la Laitoriani.

²⁵Neinyuototo Barnabas alo Tarso ayiaya Saulo,

²⁶kore payie etum, neya ninye Antiok. Netumore ninche nkanisa lari obo, neiteng'en ltung'ana kumo oleng. Naa ta Antiok apa eipotoki tekue looiteng'eni le Yeso aajo Le Kristo.

²⁷Kore tee nenia perot, nepuonu loibonok le Nkai ooing'uaa Yerusalem Antiok.

²⁸Kore lobo lenche oji Agabas, neinyuototo aibonu eutaa Ltau Sinyati, ajo kelotu nkolong kitok nkop pooki ee Rroman. Naa ketabayie apa ana te nkitoria e Kilaudio.

²⁹Nechamaa looiteng'eni aajo kerewaki lalachera o nkanachera enche naatii Yudea reto, nemeata tee ninche lemeitai te nkidimata enye.

³⁰Neas ninche inia natamakinete, neitanap Barnabas o Saulo inia reto meeyaki lpayiani le nkanisa.