Read Samburu Asat 12 Bible Online

Asat 12 - Samburu bible

Asat 12

¹Kore te inia kata, neng'asu Lkinkii Erode aibung lbata loo ltung'ana le nkanisa aar.

²Neichooyo metari lalache le Yoana oji Yakobo ta lalem metua.

³Kore payie edol ajo kecham Lyiaudi inia, neitoki alo kue aibung Petero. Naa ng'amata apa ana e ntasim ee mukateni nemeisiichieki.

⁴Kore payie eibung Petero, nepik jila neichooyo meirrita ꞉lturrurri oong'uan loo sikarini maa oong'uan, oong'uan eyieu neya Petero meiguanareki tekue ltung'ana loo Lyiaudi eicha Pasaka.

⁵Naaku kore eena Petero te jila, neomonoki ꞉nkanisa ninye Nkai oleng.

⁶Kore kuarie eikienyu payie eaku mparri nayieu Erode neyauni Petero tekue ltung'ana, naa keilura apa Petero terichet sikarini oare eenikino ninche tee senke, neitachoo lkulie sikarini to nkutuk e ltim airritita jila.

⁷Nejo pang lmalaika la Laitoriani aipung'oki ninye, newong'u ilo gilata le jila. Neoch Petero ntoop neinyuoyie ajoki, <<Tejo dum ntacho.>> Kore nenia senke natii nkaik enyena nelaari.

⁸Nejoki ꞉lmalaika, <<Inyuo terretenai ninchop namuka inono.>> Neas Petero inia. Neitoki ajoki, <<Nchopo nanka ino e oriong nikinjipu.>>

⁹Neipung Petero eirukurukore ninye, neitu eyielou ajo kedede ana naitaasita lmalaika, kake ketuwuana ake keidetdetita.

¹⁰Kore payie erepaa ꞉ninche lturrur loo sikarini lekue o le oare, nebaki ilo tim le senkei oipung'okinyieki nkoitiei nalo lkerenket. Nebolo ilo tim makoon, payie etum ninche aaima aapuo. Kore payie eipung'u, neim nkoitiei nabo e ilo kerenket, neing'uaa lmalaika ninye nabokata.

¹¹Naa kore payie ejo Petero nkue de nejo, <<Kedede taa ajo Laitoriani oterewua lmalaika lenye payie aalaku nanu taa nkaik e Erode o taa mbaa pooki naayiewuokita ꞉Lyiaudi.>>

¹²Kore payie eyielou ninye ana, nelo nkaji e Maria ng'otonye Yoana oitokini aajo Marko, inie neotuo ltung'ana kumo aaomon tenebo.

¹³Neochoch ltim le inia ang, nelotu nkaisiaayiani naji Roda abolu.

¹⁴Naa kore payie eyielou ajo ltoilo le Petero ilo, nekuet te ng'ida arrinyo eitu ebol ltim, neliki lolo tung'ana ajoki <<Keitache Petero to nkutuk e ltim.>>

¹⁵Nejoki ꞉ninche, <<Itamade dei!>> Nereki ajoki, <<Kedede!>> Nejoki, <<Kebaki naa lmalaika lenye ilo.>>

¹⁶Kake neochoch ake Petero ltim, naa kore payie ebol ninche ltim, nedol ninye, neing'asia.

¹⁷Neitigir ꞉Petero ninche ta nkaina, neliki neikuna Laitoriani payie eipung'unyie ninye te jila. Nejoki, <<Enterewaki Yakobo o lalachera o nkanachera ele kilikuai.>> Neinyuototo alo nkae ng'oji.

¹⁸Kore payie eikienyu neirrana sikarini oleng, eing'asia aajo nyo sa naipung'oka Petero.

¹⁹Nejo Erode meteyiari Petero, kake nelau ꞉ninche. Kore payie eidip aiparichiere lolo sikarini ootirripo Petero inia kuarie, neimie metari metuata. Neing'uaa Erode Yudea nedoyio alo awuon ta Kaisaria.

²⁰Kore apa lkinkii Erode naa keata apa larrabal o ltung'ana le Tiro o Sidon. Nepuo lolo tung'ana tenebo netii ninye. Kore payie eidip aatining'ore laisiaayiani kitok le nkaji enye oji Balisito, neyiaya melet amu kore apa nkop enche naa nkop e ilo kinkii etumie ndaa.

²¹Kore payie ebau inia parri nategeluaki, neichop Erode nankan enyena e lkinkii, newuon to lorika lenye odung'ie nkiguana, neirorie ninche.

²²Nebuak inia siamu ajo, <<Ltoilo le nkai ele mara lo ltung'ani!>>

²³Naa kore amu eitu eicho ꞉Erode Nkai nkisisa, neoch ꞉lmalaika la Laitoriani nabokata, nenya ꞉lkuru, neye.

²⁴Kake nelo rerei le Nkai kue, nebulaa.

²⁵Kore payie eidip Barnabas o Saulo aaichooi naduo reto te Yerusalem, nechuko eata Yoana oitokini aajo Marko.