Read Samburu Asat 13 Bible Online

Asat 13 - Samburu bible

Asat 13

¹Kore apa ta nkanisa e Antiok naa keatae loibonok le Nkai o laiteng'enak aa Barnabas o Simion oji Lorok o Lusio lo lkerenket oji Kirene o Saulo o Manaen otubulua tenebo o Erode oara apa larikoni le Galilaya.

²Kore esaita ꞉ninche Laitoriani neteena nkutukie, nejoki ꞉Ltau Sinyati, <<Entegelakaaki nanu Barnabas o Saulo payie epuo aas siaai laipotoka.>>

³Neen ꞉ninche nkutukie, neomon, neiteleki Barnabas o Saulo nkaik, nereu mechomo.

⁴Kore naa payie eirruaaya ꞉Ltau Sinyati Barnabas o Saulo, nedoyio aapuo lkerenket le Seleusia, neitoki aapuo te meli lkuran oji Saipiras.

⁵Nepuonu lkerenket otii inie oji Salamis, nelikoo rerei le Nkai taatua Sinagogini ee Lyiaudi. Kore apa Yoana oitokini ajo Marko oara laisiaayiani lenche naa ketii tenebo.

⁶Kore payie edung ꞉ninche inia kop pooki ana metabai lkerenket oji Papos, netum loiboni obo le sapare oirupucho loo Lyiaudi oji Bariyeso.

⁷Naa ketii apa ninye tenebo o Sergio Paulo larikoni kitok loo Rroman oitore inia kop, oara apa ltung'ani ng'en oleng. Kore Sergio naa keata apa nkure e rerei le Nkai, neipotu Barnabas o Saulo.

⁸Kake kore laduo airuponi oitokini aajo Elimas too nkutuk ee Lgirriki, neiboyoo ninche, nenyok aitopong'oo ilo kitok payie meiruk Yeso.

⁹Kake kore Saulo oitokini aajo Paulo, eiputa ꞉Ltau Sinyati, neing'or aing'ode ninye

¹⁰nejoki, <<Oi iyie nkerai e Chitani nira lmang'antita loosipat, nikibore sapare o nkitamaaya. Anu kenya ipal mikord nkoitieii naacho e Laitoriani?

¹¹Kore taata naa ikioch iyie Laitoriani ta nkaina enye, nimodoku, nimintoki adol ndama te nkiti kata.>> Kore ake inia kata neirupurupu nkonyek enyena, nemodoku, nemanaa ayiaya ltung'ani oibung nkaina arik.

¹²Kore payie edol ilo kitok inia nataase neiruk, neing'asia teinia naiteng'enaki naipirita Laitoriani.

¹³Neinyuototo Paulo o lboitiei lenyena te ilo kerenket le Papos te meli aalang'aki lkerenket oji Perga otii mbata e Pampilia. Neing'uaa ꞉Yoana oitokini aajo Marko ninche teinie nechuko alo Yerusalem.

¹⁴Nelo Paulo o Barnabas te lkerenket le Perga oitokini sii aajo Antiok e Pisidia. Kore mparri e Sabato nepuo Sinagogi nejo siap aawueni.

¹⁵Kore tesiedi nochi kata naisomi mbuku ee nkitanapat o loibonok le Nkai, neirruaaya ꞉lkutuaa le Sinagogi meipotuni ninche ejo, <<Lalachera lang, kore tanaa iatata rerei orreten ltung'ana entilimu ake.>>

¹⁶Neinyuototo Paulo, neapaki ltung'ana nkaina nejoki, <<Koree ntae lewa le Isirael o ntae oourie Nkai, entining!

¹⁷Kore Nkai ee kulo tung'ana le Isirael, naa ketegelua lmakui lang, neitaparakuon too suom o too ltung'ana etii nkop eiching'a naji Misiri, nerikoo ta nkaina enye nagol aipung'unyie taatua inia kop.

¹⁸Kore taa larin artam, neng'iri ꞉ninye ninche te lkees.

¹⁹Kore payie ear lochon sapa le nkop e Kanan, neicho inia kop metaa nenche.

²⁰Kewa ana larin oaabaya 450. Naa kore tesiedi ana, negelaki ꞉Nkai ninche laiguanak oorik ninche ana metabaki ng'amata e ilo oiboni le Nkai oji Samuel.

²¹Neomon ltung'ana Samuel meichori lkinkii, neicho Nkai ninche Saulo layieni le Kich, lo lmarei le Benjamin, neitore ninche larin artam.

²²Kore payie eworu Nkai Saulo lorika, neiliepunyie Daudi metaa lkinkii. Nelimu sipata naipirita ninye ejo, <Katoduaa Daudi layieni le Yese ajo kera ltung'ani laaiting'id neas kenya pooki nayieu.> >>

²³Neitoki Paulo ajo, <<Naa te ichoi e Daudi eyaka ꞉Nkai Isirael Laitejeunoni Yeso ana apake naitaka te lekutuk lenye.

²⁴Kore apa ewuon eitu eng'asu Yeso siaai lenye, naa ketilika ꞉Yoana ltung'ana pooki le Isirael nkipatisare naitodolu ajo keirriiditua ng'ok enche.

²⁵Kore eidipita Yoana siaai enye nejo, <Kore ilo lijoijo ntae kara, naa mara. Kelotu ninye tesiedi nanu, namaaichiaakino nalak nkeenita ee namuka enyena.>

²⁶<<Lalachera lainien, ichoi ee Abraam o ntae ourie Nkai lamara Lyiaudi, kore kulo omon le njeunoto naa iyioo eterewakaki.

²⁷Kore lolo tung'ana oaamanya apa Yerusalem o lkutuaa lenche, naa eitu eyielou aajo ng'ae Yeso, kake kore payie edung'oki nkiguana e lkiye naa keitabaitie rerei lo loibonok le Nkai ooisomi chiaake te mparri e Sabato.

²⁸Naa kore abaki etala mbae nadung'okinyie lkiye, neomon ꞉ninche larikoni loo Rroman oji Pilato meichooi metari metua.

²⁹Kore payie eidip aaitabai nenia pooki naaigeroki naaipirita ninye, neitodou sesen lenye to lmusalaba, nepuo aiteper to nkurarei.

³⁰Kake neitipiu ꞉Nkai ninye taatua lootuata,

³¹neipung'oki apa ꞉ninye mperot kumo lolo oiteng'eni lenyena ooirukurukore eing'uaa mbata e Galilaya ana metabaki Yerusalem. Kore taata ninche naa keliki ltung'ana lang sipata enye.

³²Naa ikiakita ntae Lomon Supati, nchere kore apa ilo lekutuk oitaka ꞉Nkai lmakui lang,

³³naa keitabayie tee iyioo oaara nkera enche, te mpiunoto e Yeso. Keigero ana taatua Sinkolio le Nkai le oare nchere <Ira iyie Nkerai ai, nataa anapar Papa lino.>

³⁴<<Neitipiwua ꞉Nkai Yeso taatua lootuata nemeitoki sesen lenye aisamisu, ana apake natejo, <Kaitabaya lolo lekutukie sinyat oodede taa ntae laitaka apa Daudi.>

³⁵<<Neinyiaaka ajo te likae kereri, <Naa mincho iyie Sinyati lino meisamisa taatua nkurarei.>

³⁶<<Naa kore eidipa Daudi aisiaai ntowuo enye ana apa nayieu Nkai, neye neiteperi tenebo o lmakui lenye, neisamisu sesen.

³⁷Kake kore ilo oitipiwua Nkai taatua lootuata naa eitu eisamisu.

³⁸<<Naaku naa lalachera lainien, kore lomon layieu niyielouu naa kepalikini ntae ng'ok inchi taatua Yeso. Naa kore pooki ng'ae oiruk neitae loosipat, nelakuni ntae taa mbaa pooki nemeidimi aatalaku ewuon apa itii taabori nkitanapat e Musa.

³⁹

⁴⁰Naa entodol meirrachu ntae inia natejo apa lkipaareta nchere,

⁴¹<Koree ntae oomenicho, eng'asiata nindayaya! Amu kalo nanu aas mbae too nkuaritin inchi inia nimirukuruk aikata, abaki tinikinyaki ltung'ani.> >>

⁴²Kore eipung'uto Paulo o Barnabas taatua Sinagogi, nejoki ꞉ltung'ana ninye payie eigil aanyau kulo omon ta Sabato naijipu.

⁴³Kore payie esachari ltung'ana te inie, neirukurukore Lyiaudi kumo o lolo oourie Nkai oaatang'asutua aaibung nkurukoto ee Lyiaudi Paulo o Barnabas. Nereki aaliki ninche metowuana taatua munyani e Nkai.

⁴⁴Kore ta Sabato naijipu, nedotunyie lkerenket pooki ainining rerei la Laitoriani.

⁴⁵Kake kore payie edol Lyiaudi inia kumoi ee ltung'ana, neiput ninche lom neng'asu aany lomon le Paulo ejo medede inia najoito esujuta ninye.

⁴⁶Kake nejoki ꞉Paulo o Barnabas ninche meata ngureticho, <<Ntae apa eyiere nelikini rerei le Nkai tekue. Naa kore amu itanya, nitumuta aajo meichiaakino ntae nkichon ee ntarasi, enteyielo aajo ikiroyie naa aayaki lkulie oreren.

⁴⁷Amu nejia apake eitanapa iyioo Laitoriani ajoki too lkigerot sinyat: <Kaitaa nanu iyie wong'an too lkulie oreren, payie eitejeuni nkop pooki.> >>

⁴⁸Kore payie ening lkulie oreren inia, neng'ida ninche, neiliepie rerei la Laitoriani, naa kore lolo pooki ootegelakaki nkichon ee ntarasi, neiruk.

⁴⁹Nebulaa rerei la Laitoriani too lubot pooki e inia kop.

⁵⁰Kake nepuo Lyiaudi aajoki ntomonok naayanyiti neurie Nkai o lkutuaa le ilo kerenket mbaa nainyoyie yieuna naitamie Paulo o Barnabas sina, nemiraa ninche to nkop enche.

⁵¹Neipiripiroki Paulo o Barnabas nkop nterit ee nkejek enche enang'aki nkaik, nepuo lkerenket le Ikoniam.

⁵²Kake kore looiteng'eni ootii Antiok neiput ng'ida o Ltau Sinyati.