Read Samburu Asat 15 Bible Online

Asat 15 - Samburu bible

Asat 15

¹Nedou lkulie tung'ana te Yudea aapuonu Antiok, aaiteng'en looiteng'eni ejo, <<Kore tanaa mimuratata pooki ana nejo lkerreti le Musa, naa meitejeuni ntae.>>

²Neichankarrare ꞉Paulo o Barnabas lolo tung'ana oleng. Negeluni Paulo o Barnabas tenebo o lkulie alachera meiliepa aapuo Yerusalem aayaki lkipaareta o lpayiani le nkanisa ana bae.

³Neitanap ninche ꞉nkanisa mechomo, kore eimaa nkop e Penisia o ne Samaria, nenyaki looiteng'eni otii inie neikuna lkulie oreren payie eibelekenya aairukurukore Yeso. Neng'ida lalachera pooki oleng tana.

⁴Kore payie epuonu Paulo o Barnabas Yerusalem, neng'amaa ꞉nkanisa o Lkipaareta o lpayiani ninche. Neliki mbaa pooki naataasie Nkai ninche.

⁵Kake kore apa ꞉lkulie Parisayo ooiruko Yeso neitachoo aajo, <<Meata ajo memurati lewa pooki loo lkulie oreren metaa loo ltung'ana le Nkai, neitokini aaitanap meibung'a nkitanapat e Musa.>>

⁶Netumo lkipaareta o lolo arikok le nkanisa aadol naas tana bae.

⁷Kore payie eichankarra ninche tana bae nkata naado, neinyuototo Petero aiguan ninche nejoki, <<Lalachera lainien, kaategelua apa Nkai taatua ntae payie ening loreren Lomon Supati to nkutuk ai neiruk.

⁸Naa kore Nkai nayielo ltauja loo ltung'ana, neitodolua ajo ketang'amaitie loreren nkichooroto e Ltau Sinyati ooichoo ninche ana sii payie eichoo iyioo.

⁹Naa kore tekue Nkai, meatae ntoki nagel iyioo o ninche amu keitisinya ltauja lenche to nkurukoto.

¹⁰Naaku naa aanyo payie igilunorere Nkai aayeniki nkirochi murto ee looiteng'eni, nemeidim lmakui lang tana iyioo aatanap?

¹¹Mara nejia! Ikiruk iyioo aajo kore munyani e Laitoriani Yeso, naa ninye eitejeunyieki iyioo, naa ninye sii eitejeunyieki ninche.>>

¹²Kore inia kiguana pooki negira ajo tau aainining Barnabas o Paulo enyau mbaa pooki naataasa Nkai taatua loreren, aasichere ninche metaasa asat naaitodolu nkitoo enye o mbaa e nking'asia.

¹³Kore payie eidip ninche aairoro, neinyuototo Yakobo nejo, <<Lalachera lainien entining'oki!

¹⁴Ketilika iyioo Petero[2] neikuna ꞉Nkai payie egelu taatua loreren, lorere lenye.

¹⁵Naa kore lomon ootejo Petero naa nabo o inia natejo loibonok le Nkai too Lkigerot Sinyat nchere,

¹⁶<Kore tesiedi ana kachukunyie, nachet nkang e Daudi naterriee. Kachet pooki toki enye naidaayie, naitoki aitacheyie inia,

¹⁷payie eing'oru ꞉lkulie ltung'ana pooki Laitoriani, lolo oreren pooki ooipotoki ta nkarna ai. Nejia ejo Laitoriani,

¹⁸/oibalunyie kuna pooki ta ng'asunoto.>

¹⁹<<Naa kore nduata ai naa payie mikintanyamal lolo tung'ana loo lkulie oreren ooibelekenyete aairukurukore Nkai,

²⁰kake payie kingeroki ninche metung'ai mbaa torrok ee nkaitok e sapare, nemeboitare likae tung'ani te sesen mara ake ntomononi enye anaa lpayian lenye, nemenya nkiri ee suom o ng'uesi naatogoroki, nememat lodo.

²¹Amu kelikoritae nkitanapat e Musa ta ng'asunoto taatua lkerenketi pooki, neisomi te Sinagogini chiaake mparri e Sabato.>>

²²Kore lolo kipaareta o larikok, neng'amaa tenebo o nkanisa pooki payie eirruaaya lkulie lewa lenche Antiok tenebo o Paulo o Barnabas. Naa kore lolo lewa ootegeluaki naa Yudas ooitokini aajo Barsabas o Silas oaara larikok taatua lolo ooiruko Kristo.

²³Neitanap ana palai najo, Kore ana palai naa keing'uaa lkipaareta o larikok linchi taatua lolo ooiruko Kristo. Naa keigerokaki ltung'ana lamara loo Lyiaudi ooiruko Kristo ootii Antiok o Siria o Kilikia. Ikiroroki ntae.

²⁴Ikitining'o aajo keotuo lkulikae tung'ana ooing'uaa atua iyioo aapuonu aaitanyamal ntae tee rerei oopik ltauja linchi nkirochi, namara iyioo ooitanapa ninche metaasa inia nataasa.

²⁵Naaku ikitachamaitie iyioo tanaboicho aagelu Yuda o Silas nikireuu meotu nitii tenebo o lolo alachera lang likicham, aa Barnabas o Paulo,

²⁶ootipika ate nkue e larrabal tankaraki nkarna e Laitoriani lang Yeso Kristo.

²⁷Naaku naa ikirruaki ntae Yudas o Silas meotu alimu sipata too nkutukie enche ee kulo omon likingero.

²⁸Kore inia nikitachamaitie iyioo nechamaa sii Ltau Sinyati nchere, mikintoki aiteleki ntae ai kirochi kitok. Kuna ake naachiaakino:

²⁹eminya ndaa naitakaki nkaitok e sapare, nimimatmat lodo, niminyanya nkiri ee suom o nee ng'uesi naatogoroki, nimiboitarere likae tung'ani te sesen mara ake ntomononi ino anaa lpayian lino. Tinintapaacherere ate kuna baa naa iasitata nairirikino. Lesere naa.

³⁰Nepalaa lolo tung'ana, neinyuototo aadoyio aapuo Antiok. Kore payie ebaki inie, neipotu ltung'ana pooki le nkanisa meotu tenebo neicho inia palai.

³¹Kore payie eisom inia palai, neng'ida oleng tankaraki naterretena lolo omon.

³²Kore Yudas o Silas oaara loibonok le Nkai, neirorie lolo ooiruko Kristo aaitogol oleng.

³³Kore payie ebik ninche te inie nkuti perot, nereu ninche mechomo aachukokino te seriani lolo apa ootereutua ninche.

³⁵Kake kore Paulo o Barnabas newueni ta Antiok eiteng'enicho nelikoo rerei la Laitoriani tenebo o lkulie tung'ana kumo.

³⁶Kore etibiko ninche nkuti perot, nejoki ꞉Paulo Barnabas, <<Matirrinyoto aisabaki lalachera lang too lkerenketi pooki likitilikorie rerei la Laitoriani, nikidol netiu.>>

³⁷Naa keyieu apa Barnabas neya Yoana oitokini ajo Marko tenebo o ninche,

³⁸kake kore apa Paulo naa ketudong'o ajo meichiaakino payie eirukurukore ꞉Yoana ninche amu ketung'ayie apa ta Pampilia, neitu elo aas siaai o ninche.

³⁹Nejing'u Paulo o Barnabas nchankar nairewua, neroyie aaoro. Nerik ꞉Barnabas Marko nepuo lkuran oji Saipiras te meli,

⁴⁰negelu ꞉Paulo Silas. Kore payie epik ꞉lalachera o nkanachera ninye nkaina e Laitoriani meing'ura te munyani enye, nelo aaing'uaa inie.

⁴¹Nekirraa nkop e Siria o ne Kilikia, eitogolito nkanisani e inie.