Read Samburu Asat 16 Bible Online

Asat 16 - Samburu bible

Asat 16

¹Nebaya Paulo o Silas lkerenket le Derbe neitoki sii aapuo le Lisitira. Netii inie loiteng'eni oji Timoti, oara ng'otonye ntito ee Lyiaudi nairuko Yeso, nera papa lenye loo Lgirriki.

²Kore lolo ooiruko Kristo otii lkerenket le Lisitira o lolo otii Ikoniam, nelimu mbaa supati naaipirita Timoti.

³Naa kore amu keyieu apa Paulo nelo o Timoti, nemurat tankaraki Lyiaudi otii nenia bat, amu keyielo aajo kore papa lenye naa loo Lgirriki.

⁴Kore naa epuoito aidachaa lolo kerenketi, neitarasaki ltung'ana le nkanisa ootii lolo kerenketi nkitanapat naaimie lkipaareta o larikok le nkanisa e Yerusalem payie eibung.

⁵Nerrapai nenia anisani to nkurukoto, neponunye ltung'ana mparri pooki.

⁶Neim Paulo o lboitieii lenyena inia kop e Paragia o ne Galatia, amu keibooyie ꞉Ltau Sinyati payie melikoo rerei to nkop e Asia.

⁷Kore payie enyikaki lkirre le mbata e Masia, nejo entijing mbata e Bitinia, kake neitu eicho laduo Tau Sinyati le Yeso metijing'a inie.

⁸Neim Masia, nedoyio, nebaki lkerenket le Tiroa.

⁹Kore kuarie nedol ꞉Paulo to nduata ltung'ani le Makedonia oitache aomon ajoki, <<Talang'u mpaso wou Makedonia tereto iyioo.>>

¹⁰Kore eidipa Paulo atoduaa inia duata, nikinyok nabokata aapuo Makedonia, kitoduaa aajo Nkai naipoto iyioo matiliki ninche Lomon Supati teinie.

¹¹Kore payie kinyuototo te Tiroa nikidir meli nikimpidari aapuo lkuran le Samotarase, neikenyu nikipuo lkerenket le Niapolis.

¹²Nikintoki aapuo te inie Pilipi lkerenket lekue le inia bata e Makedonia otechata ꞉Rroman. Nikiwueni nkuti mperot te inie.

¹³Kore mparri e Sabato, nikimpung taatua lkerenket aapuo sere, kijo kebaki nikitum nikiomonie. Nikiwueni te inie, niking'asu airorie ntomonok naaotuo tenebo aatumo te inie.

¹⁴Kore nabo taatua ninche naa ntomononi naji Lidia naing'uaa lkerenket le Tiatira nera nkamirani ee nankan mugiein naagol nkinyang'a. Neurie ꞉ninye Nkai, nebol Laitoriani nkue enye metining'u lomon ojoito Paulo.

¹⁵Neipatisi ninye o ltung'ana le nkang enye, nelej iyioo ajo, <<Kore naa tanaa ikinkena aajo kairuko Laitoriani, woutu naa entewueni ta nkaji ai.>> Neitirrichaki iyioo oleng machom nkang enye.

¹⁶Kore mparri nabo kipuoito nadei ng'oji neomonieki, nenang'are iyioo nkaisiaayiani nabo naitoria ꞉lairirua le naibon. Naa kore apa to nkoibono enye neyaka lkutuaa lenyena dikir kitok oleng.

¹⁷Neirukurukore ꞉ninye Paulo o iyioo ebuakita ajo, <<Kore kulo tung'ana naa laisiaayiak le Nkai naisul pooki, nelikita ntae nkoitiei e njeunoto.>>

¹⁸Neas ana too mperot kumo ana metogoroi Paulo, neiwuatuwuatakino ilo oirirua nejoki, <<Kore ta nkarna e Yeso Kristo, mpung'u taatua ninye!>> Kore ake inia kata neipung.

¹⁹Kore payie edol lolo kutuaa lenyena aajo mekure eata lderro le inia dikir chiaake natumuto, neibung Paulo o Silas, neikirtitoo ana metabaki sokoni netii lkutuaa loo Rroman.

²⁰Kore payie eyau ninche tekue laing'uanak le ilo kerenket nejoki, <<Kore kulo tung'ana naa keyeutua ng'olng'ol ele kerenket lang nera ninche loo Lyiaudi,

²¹nelikita iyioo mairukurukore lkerreti lemeichiaakino iyioo kira loo Rroman, nimiking'amaa iyioo inia!>>

²²Nejing sii ꞉ltung'ana le ilo kerenket ilo arrabal aarare Paulo o Silas, neitoki laaduo aiguanak aajo meitaini ninche nankan, neidong'i.

²³Kore payie eidong'i oleng, nenang'akini jila neitaarriyianakini lkitok le jila meirrita oleng.

²⁴Kore payie ening ana, neirriki ninche lgilata le atua jila, nepik pukura lororoi nkejek.

²⁵Kore etaa keaku kiji kuarie, neranyaki ꞉Paulo o Silas Nkai sinkoliotin le nkisisa eomon, neinining'ito lkulie tung'ana oena tenebo o ninche.

²⁶Kore ake inia kata neikirikiro nkop oleng meikirikirai nkitamanyunoto e jila. Nebolo nabokata nkutukie pooki e inia jila, nelaa senke naainikino lolo ltung'ana pooki oena.

²⁷Kore payie echutunye larriponi le jila too njuo, nedol ajo kebolo nkutukie e jila nechutu lalem ajo tara koon amu ketejo keisiga lmampuusi.

²⁸Kake nebuaaki ꞉Paulo ajoki, <<Miar koon, ikitii ene pooki!>>

²⁹Neipotu lkilang'ilang'eta, nekuetiki atua ilo gilata le jila nerriakino tekue nkejek e Paulo o Silas eikirikira.

³⁰Neipung'unyie boo nejoki ninche, <<Lapayiani, nyo sa eyiere naas payie ajeu?>>

³¹Newoliki aajoki, <<Iruko Laitoriani Yeso, naa ikintejeuni iyie o nkang ino pooki.>>

³²Nepuo Paulo o Silas aaliki ninye o lolo pooki otii atua nkaji enye rerei la Laitoriani.

³³Neya Paulo o Silas inia kata kuarie aiwuang'ie, neituk nenia arat naatipikaki. Neipatisi inia kata o nkang enye pooki.

³⁴Neitidir nkaji enye, neitoomon aicho ndaa, neng'ida o nkang enye pooki tankaraki nairuko ꞉ninye o nkang enye Nkai.

³⁵Kore payie eikienyu nerewaki ꞉laaduo aiguanak le ilo lkerenket sikarini netii larriponi le jila nejoki, <<Talaai lolo tung'ana mechomo.>>

³⁶Nejoki naa ꞉ninye Paulo o Silas, <<Kejo larikok lo lkerenket payie kilaaya ntae enchom, naaku naa empung'u enchom te seriani.>>

³⁷Kake nejoki ꞉Paulo lolo sikarini, <<Keidong'o ninche iyioo tekue ltung'ana eitu edung'oki iyioo Nkiguana, neirrik iyioo atua jila abaki kira iyioo ltung'ana loo Rroman, eji naa kore taata keyieu ninche nelaaya iyioo meyieloi? Meaku inia! Ncho meotu ninche aalaaya iyioo maipung'o.>>

³⁸Nepuo sikarini aitabaki laaduo aiguanak lolo omon. Kore payie ening aajo kera ninche ltung'ana loo Rroman, neiputukuny oleng.

³⁹Nepuonu aaomon ninche mpalikinoto, neipung'ie taatua jila, neomon payie epuo aing'uaa ilo kerenket.

⁴⁰Kore payie eipung'u te jila, nepuo nkaji e Lidia, netumo o lolo ooiruko Kristo nerreten ninche, nepuo aaing'uaa.