Read Samburu Asat 17 Bible Online

Asat 17 - Samburu bible

Asat 17

¹Kore payie eim ꞉Paulo o Silas lkerenket le Ampipolis o le Apolonia, nebaki lkerenket le Tesalonike otii Sinagogi ee Lyiaudi.

²Kore ana chiaake neas Paulo, naa kechomo atum ninche taatua Sinagogi neasichere taa Sabatoni uni naijiparo Lkigerot Sinyat aimaki o ltung'ana.

³Neliki ninche lolo Kigerot, neitodol ajo, <<Kore ilo Aitejeunoni apa oanyutae naa meata ajo meitami sina, neri metua, nepiu taatua lootuata. Naa kore ilo Aitejeunoni naa ele Yeso lalikorita.>>

⁴Kore lbata loo Lyiaudi naa ketisiputua aajo kedede inia natejo ninye, nejing ꞉ninche mbata e Paulo o Silas, neitoki sii Lgirriki kumo oourie Nkai o ntomonok kumo kutuaa.

⁵Neiput Lyiaudi lom, neipotu lkuti tung'ana torrok taatua lolo lemeitoki easita te inie. Naa kore payie eiturrurru ltung'ana, neing'olng'ol ilo kerenket. Nepuo aagil nkaji e Yason eing'oru Paulo o Silas taatua inie payie eya tekue ltung'ana.

⁶Kore payie elau ninche, neyietu Yason o lolo kulie ooiruko Kristo tekue lolo kutuaa lo lkerenket ebuakita aajo, <<Kore kulo tung'ana ooitarroitie nkop pooki, naa eotuo taata ene,

⁷neitoomono ꞉Yason ninche ta nkaji enye. Naa kegilita ninche pooki nkitanapat e lkitok lang Kaisari, amu kejoito keatae likae kinkii oji Yeso.>>

⁸Kore payie ening ilo turrur o lkutuaa le ilo kerenket inia, nenyamalu.

⁹Kore payie eitakini Yason o lolo ooiruko Kristo ropiyiani e pain, nelaari mechomo.

¹⁰Kore ake inia kuarie, neisigie ꞉le Kristo Paulo o Silas mechomo Berea. Kore payie ebaya inie, nepuo aajing atua Sinagogi.

¹¹Naa kore apa Lyiaudi le Berea naa ltung'ana ooning'u mbaa aalang le Tesalonike, netang'amaitie rerei le Nkai te yieunoto kitok, eing'uraa Lkigerot Sinyat mparri pooki, payie eyielou tanaa kedede inia najoito Paulo.

¹²Naaku keiruko Lyiaudi kumo o ntomonok naayanyiti ee Lgirriki o lpayiani kumo le ilo orere.

¹³Kore payie eitoki Lyiaudi le Tesalonike aayielou aajo ketilikoyie sii ꞉Paulo rerei le Nkai te Berea, nepuonu aainyoyie ltung'ana meeing'olng'olata teinie.

¹⁴Kore ake inia kata neisigie ꞉lolo ooiruko Kristo Paulo mechomo ana metabaki nchepata e mpaso, kake neisiadu Silas o Timoti te Berea.

¹⁵Kore ꞉lolo ootiriko Paulo nerik ninye aaitabaki lkerenket le Aten. Neitanap ꞉Paulo ninche lkilikuai oyaki Silas o Timoti metesieku aapuonu netii ninye. Nechuko ninche aapuo Berea.

¹⁶Kore ewuon Paulo te lkerenket le Aten aanyita ninche, nenyamalu ltau lenye oleng tankaraki ketoduaa ajo kebore ilo kerenket nkitanyanyukot e nkaitok kumo e sapare.

¹⁷Naa kore te Sinagogi neimaki o Lyiaudi o ꞉lolo oourie Nkai lamara loo Lyiaudi, nemeata sii mparri neitu eimaki te nemirichiereki o ltung'ana ootumo teinie.

¹⁸Keatae apa ltung'ana ooimaki chiaake ndedei naipirita nkichon o mbaa e nkop oowueni aaiguana o Paulo. Keji lkulikae Epikureani neji lkulie Sitoik. Kore apa Paulo naa kelikorita Lomon Supati le Yeso o mpiunoto taatua lootuata. Nejo lkulie lenche, <<Nyo dei ejoito ele checheroi?>> Neitoki lkulikae aajo, <<Ketuwuana nkaitok eiching'a elimuta.>>

¹⁹Neya Paulo nerik tekue nkiguana naji Areopagas ejo, <<Ikindim nikiyielou aajo nyo sa ana kiteng'ena ng'ejuk nilikorita?

²⁰Kore amu keing'asia iyioo mbaa nijoito, naaku ikiyieu nikiyielou naipirita inia.>>

²¹Kore apa lolo tung'ana le Aten o lolo leiching'a, naa kecham aaimaki lomon ng'ejuko, neinining, nemeitoki eas.

²²Neinyuototo Paulo aitache tekue inia kiguana naji Areopagas nejo, <<Lotung'ana kulo le Aten! Kore taa mbaa pooki, naa kadolita ajo irara ntae ltung'ana oourie nkaitok oleng.

²³Naa kore aisabita tene aing'uraa nkitanyanyukot ee nkaitok, nadol abaki lperere la lasar oata lkigerot oojo, <Le Nkai nemeyieloi.> Kore naa inia ai nisaitata nimiyielolo naa kaliki taata ntae.

²⁴<<Kore Nkai naitibira nkop o ntoki pooki natii, naa Laitoriani le chumata o nkop, nemewuenie ninye atua nkajijik ee nkaitok naatecheta nkaik ee ltung'ana.

²⁵Nemeitaki ꞉nkaik ee ltung'ana ninye toki eji atuwuana keata ntoki nemeata, amu ninye naicho pooki ng'ae nkichon o nkiyeng'et o ntokitin pooki.

²⁶Naa ltung'ani obo eitainyie Nkai lochon pooki le nkop, payie eiput nkop pooki. Nedung'oki ꞉Nkai ninche ng'amat enche o nkop nawuenie o lkirren lenche.

²⁷Naa ketaasa Nkai ana payie eyiaya ꞉ltung'ana ninye, tanaa keidim aatum eing'oru aairrapurrapu, abaki melakuanikita hoo lobo lang.

²⁸Ana najo lkulikae aigerok linchi, <Amu ninye kinchiwue, naa ninye kipoyie, naa ninye payie kitii. Ikira iyioo ichoi enye.>

²⁹<<Kore naa kira ichoi e Nkai, Meyiere payie kinken aajo kore netiu Nkai naa keinyinyukore nkitanyanyukot naitibira ltung'ani ta nkarriyiano o to nduata enye peera ne saabu anaa ne nkocholai anaa ne soit.

³⁰Kore apa tekue naa kewa ꞉Nkai ajo meyielo ltung'ana ninye, kake kore taata naa keitarrapita ltung'ana pooki to ng'oji pooki payie eirriidu ng'ok enche neibelekenyakino ninye.

³¹Amu ketegelua Nkai mparri nabo nadung'okinyie nkop kiguana tee sipat, naa keas ana to ltung'ani otegelua ꞉ninye. Kore sipata naaitodol ltung'ana pooki ajo ketegelua ninye, naa keitipiwua ninye taatua lootuata.>>

³²Kore payie ening ꞉ninche Paulo eimakita mbaa naipirita mpiunoto taatua lootuata, neikordod lkulikae lenche kake nejo lkulie, <<Ikiyieu nikining ake te iyie kuna baa aitoki.>>

³³Kore payie ejoki nejia, neinyuototo alo aing'uaa ninche,

³⁴kake kore lbata loo lolo tung'ana nejing mbata e Paulo neiruk. Naa kore taatua lolo tung'ana netii Dionisio, oara lobo le inia kiguana naji Areopagas o ntomononi naji Damaris o lkulikae tung'ana.