Read Samburu Asat 18 Bible Online

Asat 18 - Samburu bible

Asat 18

¹Kore tesiedi inia, neinyuototo Paulo ta Aten nelo Korinto.

²Netum teinie Lyiaudii oji Akuila le nkop naji Pontos, lowuon era omoni eing'uaa nkop e Itali, o ntomononi enye naji Pirisila. Amu kore apa Kilaudio oara Kaisari inia kata, naa ketejo meata ajo mepuo Lyiaudi pooki aaing'uaa Rrom. Nelo Paulo adol ninche,

³newuon aasicho tenebo, amu kore apa siaai lenche naa imaii eitibir ana ninye.

⁴Kore chiaake mparri pooki e Sabato, neiguana ninye o Lyiaudi o Lgirriki te Sinagogi enyok aiteyielo sipata naipirita ilo Aitejeunoni oji Kristo.

⁵Kore payie edou Silas o Timoti te Makedonia, neirrachu Paulo eitayia koon aliki Lyiaudi sipat nchere kore Yeso naa ilo Aitejeunoni oanyutae oji Kristo.

⁶Kake kore payie eany ꞉Lyiaudi nedek ninye, neipiripiroki ꞉Paulo ninche nankan, enang'aki nkaik ejoki, <<Meipari ntae ana ta mparri e nkiguana! Aituko nanu nkaik ainien! Naa kore ang'asu taata kalo lkulie Oreren.>>

⁷Neinyuototo Paulo aing'uaa ninche nelo nkaji e ltung'ani oji Tito Yusuto oourie Nkai, oibung'are nkaji enye sinagogi.

⁸Kore lkitok le inia sinagogi oji Kirisipo o nkaji enye pooki neiruk Laitoriani. Neiruk sii ꞉ltung'ana kumo le ilo kerenket ooinining'ito Paulo neipatisi.

⁹Kore nkuarie nabo, neipung'oki ꞉Laitoriani Paulo neirorie ajoki, <<Miguretu, kake chomo kue tilikoi rerei lai nimigira.

¹⁰Amu kati nanu tenebo o iyie, nemeatae hoo ltung'ani likindim aiseyie nikiar, amu kaata ꞉nanu ltung'ana lainien kumo lairuk te ele kerenket.>>

¹¹Newuon Paulo teinie lari obo o lapatin ile, eiteng'enicho rerei le Nkai.

¹²Kore era Galio larikoni kitok loo Rroman oitore nkop e Akayia, neinyuototo Lyiaudi tanaboicho aarare Paulo, neyau tekue nkiguana

¹³nejo, <<Kore ele tung'ani naa keitopong'orita ltung'ana metasayia Nkai to nkoitiei nemeichiaakino tee nkitanapat ang.>>

¹⁴Naa kore najoyie Paulo tobolo nkutuk airo nejoki ꞉Galio Lyiaudi, <<Lo Yiaudi kulo, kore tanaa kegil ana bae nkitanapat ee Rroman nera mbae torno, naa keichiaakino payie aning ntae.

¹⁵Kake tanaa rerei o nkarn o nkitanapat inchi kinchankarare, naa eng'urai ntae maate, amu mayieu naaku ladung'oni le nenia baa inchi.>>

¹⁶Nemiraa ninche meipung'o teinie.

¹⁷Neibung taa ꞉ninche Sositenes lkitok le sinagogi neidong tekue inia kiguana. Kake kore Galio, naa eitu eya inia aitaa toki.

¹⁸Neitoki Paulo abik mperot kumo te Korinto tenebo o lkulie ooiruko Yeso. Kore payie eicho ninche lesere, nelo lkerenket oataaniki inie le Kenkerea nedung lpapit aitabaya mbae natudung'o apa ajo keas. Nedir meli alo nkop e Siria, nerubare Pirisila o Akuila.

¹⁹Kore payie ebaya ninche Epeso neing'uaa Prisila o Akuila, nelo ninye ajing sinagogi neirorie Lyiaudi.

²⁰Neomon metibiko nkuti perot teinie, kake neany.

²¹Neicho ninche lesere nejoki, <<Kore tenecham Nkai naa kachukunyie aitoki.>> Nedir meli te Epeso nelo Kaisaria.

²²Kore payie ebaya Kaisaria, neiliep alo Yerusalem airoroki nkanisa, neitoki adoyio alo Antiok.

²³Kore payie eikonyi abik teinie, neitoki alo amanaa taatua lubot pooki e Galatia o ne Paragia eitogol looiteng'eni pooki.

²⁴Nelotu inia kata Epeso ltung'ani obo loo Lyiaudi oji Apolos ootiwuaki te lkerenket le Alekisandiria. Kore apa ninye naa kera arriyia neyielo oleng Lkigerot Sinyat.

²⁵Naa keiteng'enaki apa taatua nkoitiei e Laitoriani, neiteng'enicho te nyuata mbaa naaipirita Yeso aaiririki, abaki aa nkipatisare e Yoana apeny eyielo.

²⁶Neng'asu aiteng'enicho meata lng'ach te Sinagogi. Kore payie ening ꞉Pirisila o Akuila ninye eiteng'enicho, neipot aya bata, neliki aaipidaa to nkoitiei e Nkai.

²⁷Kore payie ening lolo ooiruko Kristo aajo keyieu Apolos nelo Akayia, neretoo inia duaata enye, neigeroki looiteng'eni ootii inie mpalai payie eng'amaa ninye. Kore payie ebaya inie, nenyok aretu te munyani e Nkai lolo ooiruko Yeso.

²⁸Amu ketimira ninye Lyiaudi eirorie to ngolon tekue ltung'ana, easichere Lkigerot Sinyat aibalakinyie ajo, kore Yeso naa ilo Aitejeunoni oaanyutae oji Kristo.